រថយន្ត ៧ ម៉ូឌែល ចេញ Concept អនាគតយ៉ាងណាពិបាកឆ្លើយណាស់

2018-03-05 09:43:01
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនថាតែគ្រឿងអេឡិចត្រូនិក សូម្បីតែរថយន្តទំនើប ក៏ក្រុមហ៊ុននិងអ្នករចនាជាច្រើនបានបញ្ចេញនូវ Concept គរដូចភ្នំ។ ក្រឡេកមកមើលការស្រមើស្រមៃទាំង ៧ ម៉ូឌែលមានតាំងពីត្រកូល Audi ដល់ Lamborghini បានបញ្ចេញជាសាធារណៈ តែពុំធ្លាប់ហក់ចូលចង្វាក់ផលិតកម្មឡើយ។

១.Lamborghini Miura 2006:

ប្រធានផ្នែករចនាលោក Walter de Silva បានបញ្ចេញ Concept នៃម៉ូឌែល Miura ក្នុងឆ្នាំ ២០០៦ ជាការអបអរគម្រប់ខួប ៤០ ឆ្នាំ។ លុះចាំអស់ប៉ុន្មានរយៈកាល CEO នៃក្រុមហ៊ុនផ្ទាល់លោក Stephan Winkelmann ក៏ចេញបកស្រាយ "ត្រកូល Miura គ្រាន់ជា Concept អបអរប្រវត្តិសាស្រ្តរបស់យើងប៉ុណ្ណោះ តែវាជា Lamborghini ទៅថ្ងៃអនាគត ដោយពុំមែនជាពេលនេះទេ"។

២.Audi Quattro 2010:

ត្រលប់ទៅកាលពី ៨ ឆ្នាំមុនក្នុងទីក្រុងប៉ារីស ប្រទេសបារាំង ក្រុមហ៊ុន Audi បានចេញនូវ Concept ម៉ូឌែល Quattro ប្រភេទទ្វារពីរ ដើម្បីអបអរខួប ៣០ ឆ្នាំនៃរថយន្តប្រើប្រព័ន្ធបើកបរដោយកង់ទាំង ៤។ កាលនោះយកលំនាំតាមសេរ៊ី RS5 ល្បីថាមានទម្ងន់ខ្លួន ២ ៨៦៦ ផោន ប្រើម៉ាស៊ីនចំណុះ ២,៥ លីត្រ ផលិតកម្លាំងបាន ៤០៣ សេះ ប៉ុន្តែគ្រប់យ៉ាងពុំអាចលេចជារូបរាងទល់បច្ចុប្បន្ន។

៣.Bugatti 16C Galibier 2009:

គ្រប់គ្នាកំពុងចង់ដឹងចង់លឺត្រកូល Veyron គាប់ជួន Bugatti ក៏ប្រកាសបង្ហាញនូវអាថ៌កំបាំងពីម៉ូឌែល 16C Galibier ក្នុងទីក្រុង Frankfurt ប្រទេសអាល្លឺម៉ង់ កាលពីឆ្នាំ ២០០៩។ ធ្លាប់បញ្ជាក់ថាមានប្រើដល់ម៉ាស៊ីន Twin-supercharged W16 ចំណុះ ៨,០ លីត្រ ប្រភេទធន់ធ្ងន់ថែមទៀតផង។

៤.Hyundai PassoCorto 2014:

វិលទៅឆ្នាំ ២០១៤ ក្រុមហ៊ុន Hyundai ផ្ទាល់ បានដាក់បង្ហាញនូវ Concept នៃរថយន្ត PassoCorto ដែលជាប្រភេទរថយន្តស្ព័រ មានកៅអី ២ ប្រើម៉ាស៊ីន ១,៦ លីត្រ Inline-4 រត់ដោយកង់ក្រោយ។

៥.Jaguar C-X75 2010:

អំឡុងទសវត្សឆ្នាំ ១៩៩០ រថយន្ត Jaguar XJ220 ជាប់កំណត់ត្រាល្បឿនលឿនបំផុត ហើយទើបតែបំបាក់បានដោយគូប្រជែង McLaren F1។ លុះចូលឆ្នាំ ២០១០ Concept នៃម៉ូឌែលនេះ ក៏បង្ហាញទៅកាន់ពិភពលោកសារជាថ្មី ដោយល្បីមានប្រើម៉ាស៊ីន Hybird ប្រភេទ Turbo-Gasoline តែបានត្រឹមគិត ធាតុពិតស្ថិតក្នុងការស្រមៃតរៀងមក។

៦.Nissan Idx 2013:

គំរូនេះត្រូវបានបង្ហាញជាគោលដៅចង់ប្រជែងគូបដិបក្ខ Toyota 86 តែយ៉ាងណាមិញពេលនេះ ៥ ឆ្នាំហើយ Concept នៅរក្សាដដែល តែការផលិតមិនទាន់មកដល់។

៧.BMW 3.0 CSL Hommage R 2015:

ត្រកូល R ប្រភេទ EDITION ឆ្នាំ ២០១៥ របស់ក្រុមហ៊ុន BMW បានលេច Concept ក្នុងប្រទេសអ៊ីតាលី ជាមួយដំណឹងលេចលឺមានប្រើម៉ាស៊ីន Inline six-cylinder គាំទ្រប្រព័ន្ធ eBoost Hybird ហើយមានគ្រឿងបរិក្ខារខាងក្នុងយ៉ាងទំនើប លំអរូបរាងពីខាងក្រៅក៏មិនណយ។