មូលហេតុពិត ចិន ជួលអ្នករាំស្រាត ក្នុងពិធីបុណ្យសព

2018-03-05 08:37:15
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងផ្នែកខ្លះនៃប្រទេសចិន អ្នកនឹងបានឃើញអ្នករាំស្រាត និងឮសំឡេងតន្ត្រីយ៉ាងលាន់រំពង នៅក្នុងអំឡុងពិធីបុណ្យសព។

ហេតុអ្វីបានជាត្រូវជួលអ្នករាំស្រាតនៅក្នុងពិធីបុណ្យសព?

យោងតាមទ្រឹស្ដីមួយ បានឲ្យដឹងថា អ្នករាំស្រាត ត្រូវបានគេប្រើដើម្បីបង្កើនចំនួនអ្នកចូលរួមពិធីបុណ្យសព ពីព្រោះហ្វូងមនុស្សដ៏ច្រើន គឺជាកិត្តិយសសម្រាប់អ្នកស្លាប់។ រីឯទ្រឹស្ដីមួយទៀតវិញ គឺ វាអាចជាប់ពាក់ព័ន្ធនឹងវប្បធម៌គោរពបូជានៃការបន្តពូជ។

លោកសាស្ត្រាចារ្យ Huang Jianxing នៃសកលវិទ្យាល័យ Fujian Normal University បានប្រាប់គេហទំព័រ Global Times ឲ្យដឹងថា «នៅក្នុងវប្បធម៌អ្នកស្រុកខ្លះ ការរាំជាធាតុមួយដែលអាចប្រើដើម្បីបង្ហាញពីបំណងប្រាថ្នារបស់អ្នកស្លាប់ ដែលចង់បានកូនច្រើន»។

មិនតែប៉ុណ្ណោះ ទ្រឹស្ដីជាក់ស្ដែងមួយ គឺ ការជួលអ្នករាំស្រាតនៅក្នុងពិធីបុណ្យសព ក៏បង្ហាញឲ្យឃើញពីសញ្ញានៃការមានទ្រព្យសម្បត្តិផងដែរ។

«ប្រជាជនចិននៅតាមជនបទ តែងមានទំនោរបង្ហាញទ្រព្យសម្បត្តិរបស់ពួកគេ ដោយការចំណាយប្រាក់ច្រើនជាងប្រាក់ចំណូលប្រចាំឆ្នាំទ្វេដង ទៅលើតារាសម្ដែង , តារាចម្រៀង , តារាកំប្លែង និង អ្នករាំស្រាត ជាដើម ដើម្បីសម្រាលទុក្ខអ្នកចូលរួមពិធី»។ នេះបើយោងតាមគេហទំព័រ Global Times។

តើការជួលអ្នករាំស្រាតក្នុងពិធីបុណ្យសពជារឿងធម្មតាដែរឬទេ?

ភាគច្រើន វាត្រូវបានគេមើលឃើញនៅក្នុងតំបន់ជនបទនៃប្រទេសចិន ប៉ុន្តែជាទូទៅ វាកើតឡើងជាធម្មតានៅកោះតៃវ៉ាន់ ដែលជាប្រភពដើមស្រាប់។

លោកសាស្ត្រាចារ្យ Marc Moskowitz មកពីសកលវិទ្យាល័យ University of South Carolina បានប្រាប់សារព័ត៌មាន BBC ថា «ការអនុវត្តនេះបានទាក់ទាញចំណាប់អារម្មណ៍សាធារណជនយ៉ាងទូលំទូលាយដំបូងបង្អស់ នៅកោះតៃវ៉ាន់ ក្នុងឆ្នាំ ១៩៨០។ វាបានក្លាយជារឿងធម្មតានៅតៃវ៉ាន់ ប៉ុន្តែនៅក្នុងប្រទេសចិន រដ្ឋាភិបាលបានរឹតត្បិតខ្លាំងឡើងៗ ដូច្នេះមនុស្សជាច្រើនមិនធ្លាប់បានឃើញ និងឮពីរឿងនេះឡើយ។ ប៉ុន្តែនៅតៃវ៉ាន់ គេក៏មិនសូវបានឃើញវាកើតឡើងក្នុងទីក្រុងធំៗដែរ ព្រោះវាជាសកម្មភាពស្របច្បាប់ផង និងខុសច្បាប់ផង»៕

ចុចអាន៖

ប្រភព៖ BBC ប្រែសម្រួល៖ សេង ឡុង