ធ្លាប់លួចសាប៊ូមួយដុំជិត២០ឆ្នាំមុន ទីបំផុតស្ត្រីម្នាក់ធ្វើរឿងរំជួលចិត្តមួយដល់ម្ចាស់ហាងវិញ

2018-02-16 06:45:50
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ វីដេអូមួយខ្សែ បង្ហាញពីសកម្មភាពស្ត្រីវ័យ ៣០ឆ្នាំម្នាក់កំពុងយកសាប៊ូ១០០ដុំមកសងហាងលក់ទំនិញវិញ ដោយសារខ្លួនធ្លាប់លួចសាប៊ូមួយដុំកាលពី១៨ឆ្នាំមុន។

អ្នកស្រី Qu រស់នៅខេត្ត Henan ប្រទេសចិនបានឲ្យដឹងថា កាលពីក្មេង អ្នកស្រីធ្លាប់បានលួចសាប៊ូក្លិនល្ហុងមួយដុំពីហាងមួយ។ ដោយសារតែ ម្ដាយអ្នកស្រីចង់បានសាប៊ូម៉ាកនេះ និងក្លិននេះ ហើយអ្នកស្រីមិនមានលុយទិញវា ទើបសម្រេចចិត្តលួចតែម្ដង។ ចាប់តាំងពីពេលនោះមក អ្នកស្រីមានអារម្មណ៍ថា ខុសឆ្គងចំពោះហាងនេះយ៉ាងខ្លាំង ដូច្នេះហើយទើបអ្នកស្រី សម្រេចចិត្តយកសាប៊ូចំនួន ១០០ ដុំដើម្បីជាការតបស្នង។

អ្នកស្រី Qu បានប្រាប់កាសែត Shanghaiist ថា "រយៈពេលប៉ុន្មានឆ្នាំមកនេះ កំហុសឆ្គងមួយនេះ តែងតែស្ថិតក្នុងចិត្តខ្ញុំរហូត។ ដោយសារតែ វាជារឿងដ៏អាក្រក់បំផុត ដែលខ្ញុំបានធ្វើក្នុងជីវិតរបស់ខ្ញុំ"។

ទោះជាយ៉ាងណាក៏ដោយ ក្រោយពីបានស្ដាប់រឿងរ៉ាវដ៏រំជួលចិត្តរបស់អ្នកស្រី Qu ម្ចាស់ហាងខាងលើ សម្រេចថាមិនទទួលយកសាប៊ូទាំងនេះទេ។ ផ្ទុយទៅវិញ ម្ចាស់ហាង បានប្រគល់សាប៊ូទាំងអស់ឲ្យទៅបុគ្គលិកអនាម័យក្នុងតំបន់ជំនួសវិញ៕