កណ្តុរបំផ្លាញដំណាំពេក កសិករបែកគំនិតធ្វើរឿងមួយ ចំណេញបានទាំងប្រាក់ទៀត
- 2018-03-06 04:27:53
- ចំនួនមតិ 0 | ចំនួនចែករំលែក 0
កណ្តុរបំផ្លាញដំណាំពេក កសិករបែកគំនិតធ្វើរឿងមួយ ចំណេញបានទាំងប្រាក់ទៀត
ចន្លោះមិនឃើញ
កសិករមួយចំនួននៅក្នុងស្រុកកោះអណ្តែត ខេត្តតាកែវ នាប៉ុន្មានឆ្នាំចុងក្រោយនេះបានបង្កើតមុខរបរចាប់កណ្តុរលក់ឲ្យឈ្មួញវៀតណាមដោយថាដើម្បីជាចំណូលបន្ថែមផង និងការពារដំណាំពីការបំផ្លាញពីសត្វកណ្តុរផង។
លោកចាន់ ថា វ័យ៤០ឆ្នាំរស់នៅស្រុកកោះអណ្តែត ឲ្យដឹងថាលោក និងអ្នកភូមិជាច្រើនទៀតបានដាក់អន្ទាក់ចាប់កណ្តុរលក់ឲ្យឈ្មួយវៀតណាមបន្ទាប់ពីមើលឃើញថាមានកណ្តុរច្រើនចេញមកបំផ្លាញផលដំណាំ។ លោកថាកណ្តុរមួយគីឡូក្រាមលក់បានតម្លៃ៣ ០០០រៀល។ ជាធម្មតាលោកថាលោករកចំណូលពីរបរនេះ បានប្រហែលជា៣០ ០០០រៀលក្នុងមួយថ្ងៃ។
ទោះយ៉ាងណាលោកថា របរនេះមិនមែនជារបរសំខាន់សម្រាប់គ្រួសារលោកនោះទេ បុន្តែលោកថាធ្វើនេះដើម្បីទប់ស្កាត់សត្វកណ្តុរកុំឲ្យបំផ្លាញផលដំណាំប៉ុណ្ណោះ។ លោកបន្ថែមថាៈ «ប្រកបរបរនេះដើម្បីគ្រាន់តែចង់ការពារកសិផលរបស់ខ្ញុំដែលតែងតែរងការបំផ្លាញដោយសត្វកណ្តុរនេះជាហូរហែរ...មិនចង់ប្រកបរបរនេះទេតែដោយសារតែគ្មានវិធីពិសេសណាអាចកំចាត់សត្វកណ្តុរនេះបាន...សត្វកណ្តុរនៅតាមវាលស្រែមានចំនួនច្រើនដូចហ្វូងគោអញ្ចឹង»។
អ្នកភូមិជាមួយគ្នាដែរ លោក សុខ សារ៉ុម ថ្លែងថាលោកបានប្រកបរបរនេះបីឆ្នាំមកហើយ ដោយប្រើអង្គប់សម្រាប់ចាប់កណ្តុរ។ លោកឲ្យដឹងថាលោកប្រកបរបរនេះដោយមើលឃើញពីចំនួនសត្វកណ្តុរមានច្រើន និងមានទីផ្សារសម្រាប់លក់ទៀតផង។ លោកថាមួយយប់លោកអាចចាប់កណ្តុរបានចន្លោះពី១០ទៅ១៥គីឡូក្រាម រួចលក់ឲ្យឈ្មួញកណ្តាល ដែលនឹងយកលក់បន្តឲ្យឈ្មួញវៀតណាម។
ចំណែកលោកសុខ ខុម ជាឈ្មួញកណ្តាលឲ្យដឹងថាសព្វថ្ងៃលោកបានទទួលទិញកណ្តុរពីប្រជាពលរដ្ឋទូទាំងស្រុកកោះអណ្តែតបានមិនតិចជាង៣០០គីឡូក្រាមទេក្នុងមួយថ្ងៃៗ និងថាបើនៅរដូចច្រូតកាត់វិញអាចទិញបានរហូតដល់មួយតោនក៏មាន។ លោកបញ្ជាក់ថាកណ្តុរទាំងនេះលោកយកទៅលក់បន្តឲ្យឈ្មួញវៀតណាម។ លោកឲ្យដឹងទៀតថាសត្វកណ្តុរទាំងនេះយកទៅវៀតណាមសម្រាប់ធ្វើជាម្ហូបអាហារនៅតាមអាហារដ្ឋាន៕
ចុចអាន៖
យ៉ាងហោចមានកត្តាប្រាំយ៉ាង នាំឲ្យមានគ្រោះថ្នាក់ចរាចរណ៍រាល់ថ្ងៃ
បង្ហាញលេខ៦ខ្សែសម្រាប់ទាក់ទង បើជួបបញ្ហាចោរលួច-ឆក់ នៅពិធីបុណ្យទន្លេខេត្តកណ្ដាល