កោះទាំង ១០ នេះ មិនមែនជាកោះឋានសួគ៌ តែបើបានទៅដល់ ច្បាស់ជាស៊យមិនខាន

2018-03-11 04:22:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនជាកោះឋានសួគ៌សម្រាប់ការទៅកម្សាន្ត កោះទាំង ១០ នេះខុសប្លែកនិងបង្កប់រឿងអាថ៌កំបាំងដែលគ្រប់គ្នាច្បាស់ជាស៊យធំ បើទៅកម្សាន្តកោះទាំងនេះ។

១០ កោះហ្វារ៉ាឡុង (The Farallon Islands) សហរដ្ឋអាមេរិក

កោះហ្វារ៉ាឡុង ស្ថិតនៅក្នុងសមុទ្រសាន់ហ្វ្រាន់ស៊ីស្កូសហរដ្ឋអាមេរិក ជាកោះដែលក្នុងទឹកពោរពេញទៅដោយជាតិវិទ្យុសកម្ម ដោយសារកាកសំណល់វិទ្យុសកម្មប្រមាណ ៤៧ ៨០០ បារ៉ែលត្រូវបានគេបោះទំលាក់នៅទីនោះចន្លោះពីឆ្នាំ ១៩៤៦-១៩៧០។ មានន័យថា បើអ្នកអណ្តែតនៅលើទឹកដែលពោរពេញទៅដោយជាតិវិទ្យុសកម្មនោះ អ្នកនឹងរស់មិនបានយូរឡើយ បើគ្មានអ្នកស្រង់ទៅដីគោក ប៉ុន្តែអ្វីដែលចម្លែក គឺថានៅទីនោះបែរជាសំបូរត្រី។

**៩ កោះ Isla De Las Munecas មិកស៊ិក **

បើនរណា ដែលបានទៅពើបលើកោះ Isla De Las Munecas ភាគខាងត្បូងនៃទីក្រុង ម៉ិកស៊ីកូ មិនជារឿងអាក្រក់ពេកទេ ប៉ុន្តែអ្នកនឹងឃើញតុក្តតាចាស់ៗ នៅគ្រប់ទីកន្លែង លើដើមឈើ ឬ គេដោតឆ្កាងនឹងឈើ។ ហេតុអ្វីមានតុក្តតាច្រើនម្ល៉េះ? រឿងដ៏សោកសៅបានចាប់ផ្តើម ដោយសារអ្នកថែរក្សាកោះនេះឈ្មោះ Don Julian Santana Barrera បានរកឃើញក្មេងស្រីតូចម្នាក់ លង់ទឹកតែលោកជួយមិនបាន។

ដើម្បីផ្តល់កិត្តិយសដល់ ក្មេងស្រីនោះ លោកបានព្យួរតុក្កតាដែលអណ្តែតពីទីផ្សេងៗដែលមកទើរលើកោះនេះ។ លោកបានព្យួរតុក្កតាកាន់តែច្រើនឡើងៗ ដើម្បីធ្វើឱ្យព្រលឹងរបស់ក្មេងស្រីបានស្ងប់។ កន្លះសតវត្សក្រោយមក លោក Barrera ត្រូវបានគេរកឃើញថាបានលង់ទឹកកន្លែងដដែល ដែលគាត់បានរកឃើញក្មេងស្រីនោះ។ គេជឿថាមនុស្សភាគច្រើនដែលបានទៅដល់កោះនោះ ទោះត្រលប់មកវិញដោយសុវត្ថិភាព បើមិនឆ្កួត ក៏ប្រែជាមនុស្សឡប់សតិ ដោយរន្ធត់នឹងហេតុភេទផ្សេងៗនៅទីនោះ។

៨ កោះ Isola Della Gaiola នៅអ៊ីតាលី

ជាកោះដែលស្ថិតនៅក្នុងឈូងសមុទ្រ Naples នៃប្រទេសអ៊ីតាលី។ កោះនេះមានទម្រង់ដូចជាកោះភ្លោះ ដែលនៅកៀកបំផុតនឹងឆ្នេរសមុទ្រ។ ប៉ុន្តែអ្វីដែលអ្នកមិនបានដឹងអំពីកោះនេះ គឺ វាជាកោះ "បណ្ដាសា" ដែលមានវីឡាដែលគេបោះបង់ចោលមួយនៅលើនោះ។ រឿងរ៉ាវបានចាប់ផ្តើមនៅឆ្នាំ ១៩២០ នៅពេលដែលម្ចាស់ឈ្មោះ Gaiola បានស្លាប់ស្អុយរលួយនៅទីនោះ។ ម្ចាស់បន្ទាប់ឈ្មោះ Hans Braun ត្រូវបានគេសម្លាប់ ហើយរុំក្នុងព្រំនៅលើវីឡានោះ។ បន្ទាប់មក ប្រពន្ធរបស់លោកស្លាប់ដោយលង់ទឹក។ ក្រោយមក លោក Otto Grunback បានទិញវីឡានោះ ហើយបានស្លាប់ភ្លាមៗដោយសារគាំងបេះដូង។ លោក Maurice-Yves Sandoz បានទិញវីឡានោះបន្ត ហើយបានធ្វើអត្តឃាតខ្លួនឯង។ លោកBaron Karl Paul Langheim បានក្ស័យធនបន្ទាប់ពីបានក្លាយជាម្ចាស់កោះ និង វីឡានោះ។ កូនប្រុសលោក Gianni Agnelli ប្រធានក្រុមហ៊ុន Fiat បានបាត់បង់បានធ្វើអត្តឃាត ហើយក្មួយប្រុសរបស់លោកមានជម្ងឺមហារីកនៅអាយុ ៣៣ ឆ្នាំ។ លោក Paul Getty បានទិញកោះនេះ ហើយចៅប្រុសរបស់លោកត្រូវបានចាប់ជំរិត។

ម្ចាស់ចុងក្រោយ ឈ្មោះ Gianpasquale Grappone ត្រូវបានគេចាប់ដាក់ពន្ធនាគារភ្លាមៗបន្ទាប់ពីទិញកោះនេះ។

៧ កោះ Bikini Atoll នៅសហរដ្ឋអាមេរិក

ជាកោះដ៏ស្រស់ស្អាត មានខ្សាច់សម៉ត់ខៃ នៅសហរដ្ឋអាមេរិក ប៉ុន្តែវាជាកន្លែងធ្វើតេស្តនុយក្លេអ៊ែររបស់រដ្ឋាភិបាលអាមេរិកចាប់ពីឆ្នាំ ១៩៤៦ ដល់ឆ្នាំ ១៩៥៨ ។

សហរដ្ឋអាមេរិកបានសាកល្បងអាវុធនុយក្លេអ៊ែរចំនួន ២៣ នៅលើឆ្នេរខ្សាច់ Bikini ដែលមួយក្នុងចំណោមគ្រាប់បែកអ៊ីដ្រូសែនគឺ Castle Bravo មានកម្លាំងខ្លាំងជាង ១ ០០០ ដងបើធៀបនឹងគ្រាប់បែកដែលទម្លាក់នៅហ៊ីរ៉ូស៊ីម៉ានៅក្នុងសង្គ្រាមលោកលើកទី ២ ។

ដូច្នេះបើអ្នកលង់នឹងសម្រស់កោះ ហើយចង់សម្រាកនៅទីនោះឲ្យបានយូរ ប្រៀបដូចសម្លាប់ខ្លួនឯងដោយសារធាតុវិទ្យុសកម្មនៅទីនោះ។

៦ កោះ Ilha Da Queimada Grande នៅប្រេស៊ីល

កោះ Ilha da Queimada Grande របស់ប្រទេសប្រេស៊ីល គឺជាកោះមរណៈមួយ ដែលមានប្រភេទពស់ពិសពណ៌មាស ជាពស់ពិសដ៏សាហាវបំផុតមិនតិចជាង ៤ ០០០ ក្បាល។ យោងតាមអាជ្ញាធរប្រេស៊ីល ដែលបានដាក់កំហិតយ៉ាងតឹងរ៉ឹងសម្រាប់អ្នកចង់ទៅលើកោះនេះ ព្រោះកន្លងមក ពស់ប្រភេទនេះបានសម្លាប់មនុស្សមួយគ្រួសារត្រឹម១យប់ ដោយវាបានលូនចូលតាមបង្អួច ហើយបានចឹកមនុស្ស លឺតែសម្រែកយំឈឺចាប់ និង ក្រោយមកស្លាប់មនុស្សទាំងគ្រួសារគរគ្នាពេញលើឆ្នេរ។

៥ កោះ Plum (Plum Island) សហរដ្ឋអាមេរិក

ជាកន្លែងដែលរដ្ឋាភិបាលអាមេរិក ប្រើប្រាស់ដើម្បីពិសោធន៍វេជ្ជសាស្ត្រ នៃប្រភេទជំងឺសត្វ។ ជាកោះដែលពោរពេញទៅដោយអាថ៌កំបាំង នៃប្រភេទជំងឺឆ្លងនានា ដែលអ្នកអាចនឹងក្លាយទៅជាជនរងគ្រោះដោយសារជំងឺឆ្លងទាំងនោះ។

៤ កោះ Sentinel ខាងជើង (North Sentinel Island) ឥណ្ឌា

ជាកោះមានទឹកថ្លាដូចពណ៌ខៀវគ្រីស្តាល់នៃឈូងសមុទ្របេងហ្គាល់ នៃប្រទេសឥណ្ឌា។ កុលសម្ព័ន្ធនៅលើកោះនោះ ផ្ដាច់ទំនាក់ទំនងពីពិភពខាងក្រៅ។ នរណាក៏ដោយ ឲ្យតែបានទៅដល់កោះនោះ នឹងត្រូវមនុស្សព្រៃទាំងនោះសម្លាប់។

រដ្ឋាភិបាលឥណ្ឌាបានសម្រេចចិត្តទុកកោះនោះចោលឲ្យនៅឯកោ ហើយនិងបរិវេណជុំវិញនោះ ៤,៨ គីឡូម៉ែត្រមិនឲ្យនរណាទៅទីនោះដាច់ខាត។

៣ កោះ Miyakejima នៅជប៉ុន

កោះ Miyakejima របស់ជប៉ុន សំបូរទៅដោយភ្នំភ្លើង ដែលបានបញ្ចេញឧស្ម័នពុលទៅក្នុងលំហជាប្រចាំ ពោលគឺបើមានកប៉ាល់ណាប្រថុយចូលចតដោយមិនបានស្គាល់កោះនេះ មុខជានឹងស្លាប់បើគ្មានបំពង់អុកស៊ីសែនពាក់។

២ កោះ Gruinard Island នៅស្កុតឡែន

ជាកោះមួយនៅក្នុងប្រទេសស្កុតឡែន ត្រូវគេស្គាល់ថាជាកោះដែលមានខ្យល់ពុល។ ក្នុងអំឡុងសង្គ្រាមលោកលើកទី២ ទីនោះជាកន្លែងធ្វើតេស្តសាកល្បងទៅលើប្រភេទជំងឺអាសន្នរោគដែលគេចាក់ទៅលើសត្វចៀម បំណងគឺបង្កើតសារធាតុពុលក្នុងអាវុធនុយក្លេអ៊ែរ។

១ កោះ Ramree នៅភូមា

Ramree គឺជាកោះធំមួយដែលឋិតនៅឆ្នេរសមុទ្រភូមា។ ក្នុងឆ្នាំ ១៩៤៥ ទាហានជប៉ុនជិត ១ ០០០ នាក់ត្រូវបានក្រពើស៊ីជាចំណីអាហារ។ ក្នុងចំណោមនោះ មានទាហានតែ២០នាក់ប៉ុណ្ណោះ ដែលបានគេចផុតពីមាត់ក្រពើ ដែលសភាពរបស់ពួកគេតក់ស្លុតខ្លាំងបំផុត ដែលជាហេតុការណ៍មួយគួរឲ្យភ្ញាក់ផ្អើល ព្រោះទាហានជប៉ុនត្រូវគេស្គាល់ថា ជាអ្នកដែលមានចិត្តសាហាវបំផុតកាលពីសង្គ្រាមលោកលើកទី២ ដែលគេមិនដឹងថាតើសត្វសាហាវ ហើយនិងក្រពើនៅលើកោះនោះគួរឲ្យព្រឺព្រួចប៉ុណ្ណាទៅ ទើបអាចសម្លាប់ទាហានជប៉ុនរង្គាល និង បានធ្វើឲ្យអ្នកសេសសល់បាក់ស្បាតយ៉ាងហ្នឹង៕

ប្រភព៖ thelist ប្រែសម្រួល៖ សុខ លាងហ៊ត