មកដឹងទម្ងន់ទោសតុលាការតាមផ្លូវ ដែលកាត់ក្ដី វាយដំច្រំធាក់ ជនបង្កហេតុគ្រោះថ្នាក់ចរាចរណ៍ហើយរត់

2018-03-12 04:41:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញព័ត៌មានស្តីពីអំពើហិង្សាទៅលើអ្នកបើកបរម្នាក់ ដែលរងការចោទថាបានបង្កគ្រោះថ្នាក់ចរាចណ៍ហើយរត់គេច ត្រូវបានចែករំលែកតគ្នានៅលើបណ្តាញសង្គមហ្វេសប៊ុកជាច្រើន។ អំពើហិង្សានេះ បានធ្វើឲ្យអ្នកបើកបររងរបួសធ្ងន់ និងរថយន្តរងការខូចខាត។

ទាក់ទងនឹងអំពើហិង្សានេះ អ្នកច្បាប់ និងអ្នកធ្វើការលើការងារសុវត្ថិភាពចរាចរណ៍លើកឡើងថាកើតឡើងដោយសារតែចំណេះដឹងផ្នែកច្បាប់របស់ប្រជាពលរដ្ឋមួយចំនួននៅមានកម្រិត។

(រូបភាពScreen Shoot ពីការផ្សព្វផ្សាយសកម្មភាពអំពើហិង្សាលើអ្នកបើកបររថយន្តកាលពីម្សិលមិញ ដែលត្រូវបានផ្សព្វផ្សាយលើបណ្តាញសង្គមហ្វេសប៊ុក)

អនុប្រធានវិទ្យាស្ថានសុវត្ថិភាពចរាចរណ៍ផ្លូវគោកលោក គង់ រតនៈ មានប្រសាសន៍ថាហេតុការណ៍បែបនេះកើតឡើងដោយសារកន្លងមកមានអ្នកបើកបរបង្ករគ្រោះថ្នាក់មួយចំនួនតែងតែរត់គេច មិនដោះស្រាយបញ្ហានៅនឹងកន្លែង។ ត្រង់ចំណុចនេះលោកថាធ្វើឲ្យប្រជាពលរដ្ឋមួយចំនួនមានអារម្មណ៍ខឹងសម្បា និងយល់ថាការប្រើអំពើហិង្សាទៅលើអ្នកបើកបរជារឿងត្រឹមត្រូវ។

លោកបន្តថាៈ «វាជាបញ្ហាបង្ហាញថាប្រជាជនយើងយល់ថាអំពើហិង្សាជារឿងត្រឹមត្រូវ ដែលវាផ្ទុយនឹងផ្លូវច្បាប់... វាទាក់ទងនឹងចំណេះដឹងរបស់ពលរដ្ឋ បើគាត់ដឹងពីប្រព័ន្ធច្បាប់ គាត់មិនបង្កអាហ្នឹងទេ តែក៏មានអ្នកខ្លះគាត់បំពានដែរ...ប្រជាពលរដ្ឋមួយចំនួនតូច នៅយល់ថាវាជារឿងត្រឹមត្រូវ ព្រោះកន្លងមកធ្លាប់មានអ្នករត់គេច មិនទទួលខុសត្រូវ...វាក៏បង្ហាញពីឥទ្ធិពលមិនល្អ មួយដល់ប្រទេសជាតិយើង..វីដេអូបានផ្សាយតាមបណ្តាញសង្គមពេញពិភពលោកតែម្តង (នាំឲ្យគេ)ថាពលរដ្ឋយើងមិនគោរពច្បាប់»។

លោក គង់ រតនៈ លើកទឹកចិត្តឲ្យអ្នកបង្កគ្រោះថ្នាក់ចរាចរណ៍ទាំងឡាយគួរតែដោះស្រាយបញ្ហានៅនឹងកន្លែងជាជាងរត់គេច ដោយថាដើម្បីកុំឲ្យមានរឿងវែងឆ្ងាយ និងថាប្រជាពលរដ្ឋឃើញហេតុការណ៍មួយចំនួនក៏ត្រូវបញ្ឈប់ទម្លាប់ប្រើហិង្សាលើអ្នកបើកបរដូចគ្នា។ ត្រង់ចំណុចនេះលោកថាអ្នកប្រព្រឹត្តិអំពើហិង្សាលើអ្នកបើបរត្រូវតែមានការផ្តន្ទាទោសទៅតាមផ្លូវច្បាប់។

ប្រហាក់ប្រហែលគ្នានេះដែរ លោកមេធាវី សុក សំអឿន លើកឡើងថាប្រជាពលរដ្ឋគ្មានសិទ្ធិប្រើអំពើហិង្សាណាមួយទៅលើអ្នកបង្កគ្រោះថ្នាក់ចរាចរណ៍នោះទេ។ លោកថាប្រជាពលរដ្ឋឃើញហេតុការណ៍មានសិទ្ធិត្រឹមជួយឃាត់ជនបង្កទុកឲ្យសមត្ថកិច្ចតែប៉ុណ្ណោះ។

ក្នុងករណីបង្កហិង្សាឲ្យមានរបួសស្នាម លើអ្នកបើកបរ ឬធ្វើឲ្យអ្នកបើកបរបាត់បង់ជីវិតលោកថាអ្នកប្រព្រឹត្តិអំពើហិង្សាអាចនឹងមានទោសដល់ជាប់ពន្ធនាគារ។

លោកបន្ថែមថាៈ «ការប្រើកម្លាំងទៅលើគេ យើងមានសិទ្ធតែក្នុងន័យការពារខ្លួនទេ យើងមិនមានសិទ្ធិទៅវាយ ឬសម្លាប់អ្នកណាម្នាក់ទេ យើងអាចមានបទប្រើអំពើហិង្សាដោយចេតនា ..ហើយបើស្លាប់អាចមានបទមនុស្សឃាតអីចឹងទៅណា...អាចជាប់គុក បើមានរបួសស្នាម»។

តាមក្រមព្រហ្មទណ្ឌមាត្រា១៩៩ចែងថាទង្វើសម្លាប់មនុស្សដោយចេតនា ដោយមានអាវុធ ឬមិនប្រើអាវុធជាអំពើឃាតកម្ម ដែលត្រូវផ្តន្ទាទោសដាក់ពន្ធនាគារពី១០ទៅ១៥ឆ្នាំ។

ផ្អែកតាមក្រមព្រហ្មទណ្ឌដដែលត្រង់មានត្រា២១៧ ទាក់ទងនឹងបទហិង្សាដោយចេតនា ចែងថាអំពើហិង្សាប្រព្រឹត្តទៅលើអ្នកដទៃ ត្រូវផ្តន្ទាទោសដាក់ពន្ធនាគារពីមួយឆ្នាំទៅបីឆ្នាំ និងពិន័យជាប្រាក់ពីពីរលានរៀលទៅប្រាំមួយលានរៀល។

ដើម្បីលុបបំបាត់អំពើហិង្សាពេលមានគ្រោះថ្នាក់ចរាចរណ៍នេះ ទាំងលោក សុក សំអឿន និងលោក គង់ រតនៈ យល់ថាសមត្ថកិច្ចត្រូវចាប់ជនបង្កមកផ្តន្ទាទោសឲ្យបាន និងបន្តការផ្សព្វផ្សាយឲ្យពលរដ្ឋបានដឹងថាទង្វើបែបនេះជាទង្វើខុសច្បាប់។

Sabay មិនអាចទាក់ទងប្រធាននាយកដ្ឋាននគរបាលចរាចរណ៍ផ្លូវគោក និងសណ្តាប់ធ្នាប់សាធារណៈ នៃក្រសួងមហាផ្ទៃ ឯឧត្តម រ៉ុន រ័ត្នវាសនា ពន្យល់បន្ថែមបានទេនៅព្រឹកនេះ។ ដោយឡែកស្នងការនគរបាលរាជធានីភ្នំពេញ ឯកឧត្តម ជួន សុវណ្ណ ក៏មិនទាន់អាចទាក់ទងបានដែរ ដោយជំនួយការរបស់ឯកឧត្តមថាកំពុងជាប់ប្រជុំ។

ទោះយ៉ាងណា ឯឧត្តម ជួន សុវណ្ណ ថ្លែងប្រាប់សារព័ត៌មានក្នុងស្រុកថា ក្នុងករណីអ្នកបង្កគ្រោះថ្នាក់ចរាចរណ៍រត់គេចពីកន្លែងកើតហេតុ គឺមានច្បាប់សម្រាប់ដាក់ទោសទណ្ឌ។ ចំណែកមហាជនដែលបង្កហិង្សាលើអ្នកបើកបរ ឯឧត្តមថាជាអំពើ «អសីលធម៌» ដែលតាំងខ្លួនជាតុលាការ និងមិនគោរពច្បាប់។

គួរបញ្ជាក់ថាករណីបែបនេះក៏ធ្លាប់កើតមានដែរ ដែលអ្នកបង្កគ្រោះថ្នាក់ចរាចរណ៍ត្រូវបានអ្នកឃើញហេតុការណ៍ចោមរោមវាយដំ និងបំផ្លាញរថយន្តនៅលើផ្លូវព្រះមុនីវង្ស។ អ្នកបើកបររងរបួសធ្ងន់ និងត្រូវដឹកយកទៅសង្គ្រោះបន្ទាន់នៅមន្ទីរពេទ្យរដ្ឋមួយនៅពេលនេះ៕

អត្ថបទ៖ ទូច សុខា