ខុន ស៊ីចាន់ឈ្នះនៅ One Championship ស្ថិតក្រោមការបង្វឹករបស់អង្គរក្សល្បី

2018-03-16 02:11:13
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ អ្នកប្រដាល់ក្នុងទ្រុងកម្ពុជា ខុន ស៊ីចាន់ ទទួលបានជ័យជម្នះលើកីឡាករឥណ្ឌូណេស៊ី Riski Umar ក្នុងព្រឹត្តិការណ៍ One Championship នៅប្រទេសប្រទេសម៉ាឡេស៊ី។ មុនឈានដល់ទទួលបានលទ្ធផលល្អប្រសើរនេះ ខុន ស៊ីចាន់បានខិតខំហ្វឹកហាត់យ៉ាងខ្លាំងក្រោមការបង្វឹករបស់គ្រូល្បីឈ្មោះ Alan Mccune។

ខុន ស៊ីចាន់ ទទួលបានជ័យជម្នះ

លោក Alan Mccune ជា [អង្គរក្សការពារបុគ្គលល្បីៗ](http://news.sabay.com.kh/article/1026740#utm_campaign=onpage) នៅប្រទេសកម្ពុជាបានឲ្យដឹងថា ការត្រៀមខ្លួនរបស់ ខុន ស៊ីចាន់ សម្រាប់ការប្រកួតនៅ One Championship មានរយៈពេល២ខែ។ ការវ៉ៃគុនចម្រុះ MMA ពិតជាលំបាកខ្លាំងដែលត្រូវតែហ្វឹកហាត់ឲ្យដិតដល់ និងត្រៀមខ្លួនឲ្យល្អ។ វាត្រូវការធាតុផ្សំនៃក្បាច់គុនជាច្រើន និងក្បាច់ផ្នែកក្រោមជាគ្រឹះដ៏សំខាន់សម្រាប់កីឡាករ MMA។ ទាំងនេះជាអ្វីដែល ខុន ស៊ីចាន់បានត្រៀមខ្លួនបានយ៉ាងល្អ។

គ្រូបង្វឹកក្លឹប Phnom Penh MMA លោកAlan បន្តថា លោកបានស្វែងយល់ពីចំណុចខ្លាំង និងខ្សោយរបស់ដៃគូ ហើយបន្ទាប់មករកយុទ្ធសាស្ត្រដើម្បីឈ្នះ។ ខុន ស៊ីចាន់បានអនុវត្តតាមផែនការរបស់លោកតាមរយៈការគ្រប់គ្រងស្ថានភាពឲ្យបានល្អ និងការប្រើកែង។ ស៊ីចាន់មានបញ្ហាដៃក្នុងទឹកទី៣ ប៉ុន្តែគេបានបង្ហាញភាពជាអ្នកប្រយុទ្ធពិតប្រាកដរហូតទទួលបានជ័យជម្នះ។

មកស្គាល់កំពូលអង្គរក្សនៅខ្មែរការពារបុគ្គលល្បីៗមានទាំងតារាហូលីវូដ

Alan និយាយថា ៖«យើងបានរង់ចាំមួយឆ្នាំហើយដើម្បីបង្កើតកម្មវិធីទាំងនេះសម្រាប់ក្បាច់គុនចម្រុះ MMA ហើយខុន ស៊ីចាន់ជាកីឡាករទី១ដែលទទួលបានជ័យជម្នះពីការរៀបផែនការទាំងនេះ»។

ទោះជាយ៉ាងណា ខុន ស៊ីចាន់ ទទួលបានជ័យជម្នះដោយពិន្ទុប៉ុណ្ណោះក្នុងការប្រកួត៣ទឹក។ ២ទឹកដំបូងកីឡាករកម្ពុជារូបនេះវ៉ៃបានល្អទាំងកណ្តាប់ដៃ ទាត់ កែង និងក្បាច់ក្រោម ប៉ុន្តែទឹកទី៣បែរជាខ្សោយកម្លាំងត្រូវបានដៃគូយកប្រៀបវិញ។

គ្រូបង្វឹករូបនេះឲ្យដឹងថា ក្លឹប Phnom Penh MMA ចាប់ផ្តើមជ្រើសរើសកីឡាករកម្ពុជាល្អៗដើម្បីហ្វឹកហាត់ និងបណ្តុះបណ្តាលពួកគេតាមរយៈសម្ភារៈហ្វឹកហាត់ទំនើបៗនៅក្លឹប Prokout Gym និង Banteay Center៕