មកស្គាល់កំពូលអង្គរក្សនៅខ្មែរការពារបុគ្គលល្បីៗមានទាំងតារាហូលីវូដ
- 2018-03-14 03:22:56
- ចំនួនមតិ 0 | ចំនួនចែករំលែក 0
មកស្គាល់កំពូលអង្គរក្សនៅខ្មែរការពារបុគ្គលល្បីៗមានទាំងតារាហូលីវូដ
ចន្លោះមិនឃើញ
លោក Alan LM Mccune ជាបុគ្គលម្នាក់ដែលត្រូវបានឃើញលេចមុខការពារបុគ្គលល្បីៗក្នុងកម្មវិធីធំៗផ្លូវការនៅប្រទេសកម្ពុជា។ ថ្មីៗនេះរូបគេទើបតែបញ្ចប់ភារកិច្ចការពារអតីតកំពូលតារាបាល់ទាត់លំដាប់ពិភពលោក Ryan Giggs ដែលបានមកប្រទេសកម្ពុជារយៈពេល៣ថ្ងៃ ប៉ុន្តែមានមនុស្សតិចណាស់ដែលបានស្គាល់ពីប្រវត្តិរបស់គេ។
លោក Alan LM Mccune ប្រាប់សារព័ត៌មាន Sabay ថា លោកជាជនជាតិស្កុតឡែន និងបានមកនៅប្រទេសកម្ពុជាតាំងពីឆ្នាំ២០១៣ ប៉ុន្តែធ្លាប់ធ្វើដំណើរលក្ខណៈកម្សាន្តមកកម្ពុជាតាំងពីឆ្នាំ២០០៧ម៉្លេះ។ បន្ទាប់ពីលោកបានឃើញប្រទេសកម្ពុជា លោកពិតជាស្រលាញ់វប្បធម៌ និងបែបបទនៃការរស់នៅរបស់ប្រទេសកម្ពុជាខ្លាំងណាស់។
លោកបានក្លាយជាអង្គរក្សរយៈពេល៣២ឆ្នាំហើយគិតដល់ពេលនេះ។ រយៈពេល៣២ឆ្នាំកន្លងទៅនេះលោកបានការពារឥស្សរជនល្បីច្រើនណាស់ទាំងតារាភាពយន្តហូលីវូដ តារាបាល់ទាត់ល្បីៗ និងបុគ្គលល្បីៗជាច្រើន។ លោកប្រាប់ថា ៖«ខ្ញុំធ្វើជាអង្គរក្សតាំងពីអាយុ១៨ឆ្នាំ។ ខ្ញុំធ្លាប់ការពារតារាល្បីលំដាប់ពិភពលោកដូចជាតារាហូលីវូដលោក George Clooney លោក Rod Steward លោក Russel Crowe ជាដើម»។ បើនៅស្រុកខ្មែរវិញ លោកធ្លាប់ធ្វើជាអង្គរក្សក្នុងពិធីបើកសម្ពោធធំៗជាច្រើន និងតារាល្បីៗដែលមកកម្ពុជាដូចជា Bono, Jessi និងតារាមកពីថៃផងដែរ។ ចុងក្រោយនេះ លោកបានបំពេញភារកិច្ចការពារអតីតកំពូលតារាបាល់ទាត់ពិភពលោក Ryan Giggs ដែលមកប្រទេសកម្ពុជា៣ថ្ងៃ។
Alan ដែលមានមាឌដំបងដែលមើលទៅគួរឲ្យខ្លាចស័ក្ដិសមជាអង្គរក្សបន្តប្រាប់ទៀតថា លោកបានហ្វឹកហាត់តែតិចនិកកីឡាគុនចម្រុះ MMA រយៈពេល១៧ឆ្នាំជាមួយគ្រូបង្វឹក MMA ល្បីៗលំដាប់ពិភពលោកដូចជាលោកគ្រូ Erik Paulson Rick Young, Roger Gracie ជាដើម។ ឆ្នាំ២០០៥ លោកបានឈ្នះមេដាយមាសពីការប្រកួតក្នុងព្រឹត្តិការណ៍ Gracie Invitational Brazilian Jujitsu ដែលរៀបចំនៅប្រទេសអង់គ្លេស។
ឆ្នាំ២០១៣លោកបានមកប្រទេសកម្ពុជាដែលពេលនោះលោកបានក្លាយជាគ្រូបង្វឹកកីឡា MMA។ លោកនិយាយថា «៖«ខ្ញុំត្រូវបានលោកគ្រូ Paddy Carson និងលោក ម៉ា សេរីអញ្ជើញឲ្យធ្វើជាគ្រូបង្វឹកក្នុងកម្មវិធីប្រដាល់ក្នុងទ្រុង KWC របស់ទូរទស្សន៍ MYTV។ ខ្ញុំបានបង្វឹកបង្ហាត់កម្មវិធីប្រដាល់នោះបាន៣រដូវកាល និងបង្ហាត់កីឡាករខ្មែរប្រហែលជា៧៥នាក់ដូចជាកីឡាករ ខុន ស៊ីចាន់ ដែលទើបតែឈ្នះការប្រកួតនៅ One Championship កាលពីពេលថ្មីៗនេះ»។
បច្ចុប្បន្នលោកបង្ហាត់នៅក្លឹប Phnom Penh MMA, Prokout និង Banteay Center។ លើសពីនេះទៀតលោកជាមួយលោកគ្រូយូដូ ឡាច វុទ្ធីកំពុងរៀបចំបង្កើតការប្រកួត ជើងឯកគុនចម្រុះកម្ពុជា (Cambodian MMA Champion)៕
រូបថតទាំងអស់ខាងលើ ផ្តល់សិទ្ធិឲ្យដោយលោក Alan LM Mccune
Man Utd ខ្ទាតចេញពី Champions League ក្រោមស្នាដៃ Sevilla នៅទឹកដីខ្លួនឯង
Mourinho ឆ្លើយមួយម៉ាត់យ៉ាងអែមក្រោយធ្លាក់ចេញពី Champions League