ទើបរកឃើញដំណោះស្រាយថ្មី អាចដោះកូដអេក្រង់ iPhone មិនឲ្យបាត់ទិន្នន័យម៉ាស៊ីន

2018-03-19 01:20:04
ចំនួនមតិ 0 | ចំនួនចែករំលែក 0

ចន្លោះមិនឃើញ

មានច្រើនគ្នាហើយដាក់លេខកូដសម្ងាត់លើ iPhone ស៊យអីសុខៗភ្លេចដោយខ្លួនឯង រហូតត្រូវបង្ខំចិត្តទៅឲ្យជាង Restore ម៉ាស៊ីនថ្មី បាត់ទិន្នន័យសំខាន់ឥតអំពើ។ ប្រអប់មួយឲ្យឈ្មោះ GrayKey កំពុងទទួលការចាប់អារម្មណ៍ ពីអ្នកប្រើប្រាស់ក្រៅស្រុក ដោយបញ្ជាក់ថាតម្លៃដោះក្នុង iPhone មួយគ្រឿងថ្លៃប្រហែល ៥០ ដុល្លារ និងរាវរហូតដល់ឃើញកូដសម្ងាត់ពិតប្រាកដ ហើយពុំបាត់ឯកសារអ្វីទាំងអស់។

រូបតំណាងប្រអប់ GrayKey

ដំណើរការនៃ GrayKey ត្រូវបានក្រុមអ្នកស្រាវជ្រាវ **Malwarebytes Labs** ទម្លាយដូច្នោះថាប្រអប់នោះមានរាង ៤ ជ្រុង អមខ្សែ Lightning ចំនួន ២ ដោតភ្ជាប់ពីប្រអប់ស្រាប់។ នៅពេលអ្នកដោតឧបករណ៍ដែលជាប់កូតសម្ងាត់ចូលទៅ វានឹងរាវតាមប្រភេទកូដ ៤ ខ្ទង់ ប្រើពេលយ៉ាងយូរ ២ ទៅ ៣ ម៉ោង ស្របពេលប្រភេទកូដ ៦ ខ្ទង់ត្រូវការពេលដល់ច្រើនថ្ងៃក៏ថាបាន។

ដំណើរការនេះអាចថាជាប្រព័ន្ធធ្វើការទស្សន៍ទាយកូដសម្ងាត់រាប់ពាន់ខ្ទង់ ហើយទិន្នន័យនឹងបង្ហាញទៅលើអេក្រង់ទូរសព្ទ ទាក់ទងនឹងកូដសម្ងាត់ដែលរកឃើញ ក៏ដូចជាថេរវេលាស្វែងរក។ យ៉ាងណាមិញតាមការកត់សម្គាល់ ប្រអប់នេះគាំទ្រដល់ជំនាន់ iPhone X ដំណើរការលើ iOS 11.2.5 ថែមទៀតផង ម្ល៉ោះត្រឹមជំនាន់ iPhone សេរ៊ីទាបឬ iOS 10 មិនជាបញ្ហាចោទអ្វីឡើយ។

គូសបញ្ជាក់ថាការដោះកូដមិនឲ្យបាត់បង់ទិន្នន័យ កន្លងទៅក៏ធ្លាប់លេចលឺថាមានជាងជួលជុលនៅប្រទេសកម្ពុជាអាចធ្វើបានដូចគ្នា ប៉ុន្តែសម្រាប់ជំនាន់ iOS ថ្មីបែបណានោះ យើងពុំទាន់ទទួលដំណឹងច្បាស់ការនៅឡើយ។