ប៉ុន្មានចំណុចប្រៀបធៀបរវាង Animoji និង AR Emoji បានដឹងខុសគ្នាឆ្ងាយ

2018-03-20 04:22:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន SAMSUNG ទើបតែប្រកាសឲ្យប្រើប្រាស់នូវមុខងារ AR Emoji លើស្មាតហ្វូនជំនាន់ក្រោយ Galaxy S9/S9+ ស្របពេលមុខងារ Animoji នៃក្រុមហ៊ុន Apple បានលេចចេញមុនលើ iPhone X អំឡុងខែកញ្ញា ឆ្នាំ ២០១៧។ មានភាពខុសគ្នា ៧ ចំណុច រវាងបច្ចេកវិទ្យាទាំងពីរ ហើយក៏ជាចម្លើយដើម្បីចែកឲ្យដាច់ថាមួយណាខ្លាំងជាងមួយណា។

១.Animoji ដំណើរការក្នុងកម្មវិធី Messages:

បើអ្នកចង់ផ្ញើចេញទៅលើបណ្តាញសង្គមតាម iPhone ជំនាន់ក្រោយ នោះការប្រើ Animoji ត្រូវឆ្លងកាត់ផ្ញើចូលនរណាម្នាក់លើ Messages ជាមុនសិន ខុសពី AR Emoji របស់ SAMSUNG ជាប្រភេទ Built-in មានស្រាប់ក្នុង Camera App បែបនេះ មិនថាការផ្ញើ Email, លើបណ្តាញសង្គម ឬ Upload ទៅលើ Cloud ក៏សុទ្ធសឹងតែបង្កើតបានយ៉ាងឆាប់រហ័សបំផុត។

២.រូបចេញពី Animoji មានស្តង់ដារជាង:

ជាធម្មតា Animoji ផលិតចេញតួអង្គតុក្កតាផ្អែកតាមស្តង់ដារ Unicode Emojis ធ្វើឲ្យរូបភាពមានភាពប្រាកដប្រជា ច្រើនជាង AR Emoji ដែលប្រើប្រភេទតួអង្គតុក្កតាផលិតដោយខ្លួនឯង ហើយអ្វីដែលជាចំណុចខ្សោយគឺគ្មានបច្ចេកវិទ្យា 3D បែបនេះដំណើរការមិនរលូនដូចលើ iPhone X នោះទេ។

៣.AR Emoji អាចថតបានយូរជាង:

ស្របពេល Animojis កំណត់ត្រឹមរយៈពេល ១០ វិនាទី ក្រឡេកទៅបច្ចេកវិទ្យា SAMSUNG អាចថតបានដោយសេរី តែត្រូវចាំថាទំហំផ្ទុកក៏ស៊ីធំដូចគ្នា។

៤.Animoji មានជម្រើសប្រើប្រាស់តិចជាង:

គ្រាចេញដំបូង Animoji មានតួអង្គត្រឹម ១២ ប៉ុណ្ណោះ ដោយមានសត្វឆ្មា, មាន់, ឆ្កែ, ស្វា និងខ្លាឃ្មុំជាដើម ប៉ុន្តែក៏នឹងវិវត្តបន្ថែមទៀតក្នុង iOS 11.3 គ្រាន់ចំនួនមានកំណត់។ ខុសអ្វីពី SAMSUNG ជម្រើសនៃប្រភេទ Sticker អនុញ្ញាតឲ្យអ្នកប្រើ រើសបានតាមចិត្តរាប់មិនអស់។

៥.អាចបង្កើតទម្រង់មុខមាត់ខ្លួនឯងតាម AR Emoji:

ទម្រង់តុក្កតាលើ Animoji មានកំណត់មកពីនាយ ពុំអនុញ្ញាតឲ្យអ្នកប្រើប្រាស់កែប្រែសូម្បីទម្រង់មុខមាត់ ខុសពីលើស្មាតហ្វូន Galaxy S9/S9+ អាចបង្កើតតួអង្គ Avatar បានដោយខ្លួនឯង ឲ្យសក្តិសមទៅនឹងទម្រង់មុខក៏ដូចជាកាយវិការរបស់អ្នកប្រើផ្ទាល់។

៦.Animoji ដំណើរការបានល្អជាង:

ដោយឆ្លងកាត់បច្ចេកវិទ្យា TrueDepth Camera បន្សំចលនាបែប 3D ជំរុញឲ្យការចាប់យកកាយវិការឬទឹកមុខរបស់អ្នកប្រើ មានភាពស៊ីចង្វាក់និងប្រសើរជាង កម្រិត 2D ធម្មតារបស់ SAMSUNG។

៧.Truedepth ដំណើរការលើកម្មវិធីដទៃ:

ផលប្រយោជន៍នៃបច្ចេកវិទ្យា TrueDepth មិនត្រឹមតែជួយលើមុខងារ Face ID និង Animoji មួយមុខនោះទេ ទៀតសោតបើនិយាយពីប្រភេទកម្មវិធីផ្សេងដែលមានភាពស្រដៀងគ្នានេះដូចជា Snapchat គុណភាពប្រើប្រាស់ស្កេនផ្ទៃមុខ ពិតណាស់ដែលអ្នកអាចឆ្លើយបានថា iPhone X នឹងធ្វើបានល្អជាង Galaxy S9។