ម៉ន រដ្ឋា ប្រើរន្ទះជើងទម្លាក់សិស្សច្បង អ៊ឹង បូរ៉ា នៅត្រឹមជុំទី២

2018-03-20 02:31:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករជើងខ្លាំងគុនខ្មែរមកពីព្រែកឯង ម៉ន រដ្ឋា ប្រើរន្ទះជើងទាត់ទម្លាក់សិស្សច្បង អ៊ឹង បូរ៉ា ឲ្យហាលអាវត្រឹមជុំទី២ កាលពីល្ងាចថ្ងៃសៅរ៍កន្លងទៅនេះ។

កីឡាករ ម៉ន រដ្ឋា

អ្នកប្រដាល់ទាំងពីរនាក់នេះបានធ្វើឲ្យអ្នកទស្សនាជក់ចិត្តជាខ្លាំង ព្រោះសមត្ថភាពប្រកួតប្រហាក់ប្រហែលគ្នា ស្នៀតប្រកួតក៏ស្រដៀងគ្នាផងដែរ។ ពេលវេលាត្រឹម៣ទឹក អ្នកលេងគុនខ្មែរទាំងពីរមិនបង្អង់ដៃនោះទេ គឺចាប់ផ្ដើមបញ្ចេញស្នៀតដាក់គ្នាទៅវិញទៅមក។ រដ្ឋា ហាក់មានប្រៀបជាង អ៊ឹង បូរ៉ា ដោយសារកម្ពស់ខ្ពស់ជាង និងវ័យក្មេងជាង ជាហេតុធ្វើឲ្យគេបានល្អ ដូចជាចូលវ៉ៃជង្គង់ និងទាត់ ចំណែកកម្លាំងក៏ល្អផងដែរ។ បើទោះជា អ៊ឹង បូរ៉ា ព្យាយាមវ៉ៃតបតទៅវិញក្ដី ក៏មិនសូវបានផលឡើយ។

កីឡាករ ម៉ន រដ្ឋា(ក្រហម)

ម៉ន រដ្ឋា ក៏ឲ្យដឹងខ្លះៗក្រោយប្រកួតនោះដែរថា ជំនួបជាមួយសិស្សខាងលើនេះ ពិតជាមិនស្រួលឡើយ និយាយជារួមពិបាកក្នុងការយកឈ្នះ និងផ្ដួលតែម្ដង ប៉ុន្តែក៏សប្បាយចិត្តពេលបានឈ្នះពិន្ទុដូចនេះ។ វាខុសពីការប្រកួតជុំទី១របស់ខ្លួន ដែលប្រើពេលត្រឹម១ទឹកប៉ុណ្ណោះយកឈ្នះដៃគូរ។

កីឡាករ ម៉ន រដ្ឋា(ក្រហម)

ម៉ន រដ្ឋា ជាកីឡាករមកពីក្លឹបការិយាល័យទី៥ ប្រកួតចុងក្រោយឈ្នះកីឡាករ អ៊ឹង បូរ៉ា នៅសង្វៀន TV5 កាលពីថ្ងៃសៅរ៍ ទី១៧ ខែមីនា ឆ្នាំ២០១៨ បច្ចុប្បន្នឡើងទៅជុំទី៣ (៨នាក់ចុងក្រោយ) នៃពានរង្វាន់នេះហើយ៕

អត្ថបទ៖ នួន ស៊ីណា