របាយការណ៍មួយទម្លាយថា ត្រឹមចុងឆ្នាំនេះ Apple នឹងឈប់លក់ iPhone X

2018-03-26 01:42:39
ចំនួនមតិ 0 | ចំនួនចែករំលែក 0

ចន្លោះមិនឃើញ

របាយការណ៍ចេញពីប្រទេសកូរ៉េខាងត្បូងបង្ហើបឲ្យដឹងថាក្រុមហ៊ុន Apple នឹងសម្រេចផ្តាច់ចង្វាក់ផលិតកម្ម iPhone X ត្រឹមខែកញ្ញា ឆ្នាំ ២០១៨ នេះ។ ឈរលើហេតុផលក្រោយចំនួនតួលេខចេញលក់ សង្កេតឃើញមានការធ្លាក់ចុះខ្លាំង ថ្វីបើនេះជា iPhone ដំបូងដែលបំពាក់អេក្រង់ OLED ក៏ដោយក្តី។

សារព័ត៌មាន ETNews បានចុះផ្សាយកាលពីថ្ងៃសុក្រ ថាការធ្លាក់ចុះទំហំលក់ចេញ iPhone X អាចបង្កផលប៉ះពាល់យ៉ាងធ្ងន់ធ្ងរដល់អាជីវកម្ម iPhone ទាំងមូល។ ពុំមានការលាក់បាំងអ្វីនោះទេ ដោយកាលពីខែមករា ការស្រាវជ្រាវរបស់ IBTimes បានរកឃើញថាក្រុមហ៊ុនលោក Tim Cook ចាប់កាត់ផ្តាច់ចង្វាក់ផលិតកម្មទូរសព្ទតម្លៃថ្លៃមួយនេះអស់ពាក់កណ្តាល ដោយដំបូងមានគោលដៅផលិត ៤០ លានគ្រឿង ក្រោយមកកុម្ម៉ង់ទៅក្រុមហ៊ុនផ្គត់ផ្គង់តែ ២០ លានគ្រឿង វិញ។

យ៉ាងណាមិញក្នុងឆ្នាំ ២០១៨ ក៏មិនប្រាកដថាវត្តមាន iPhone X ម៉ូឌែលថ្មីលេចចេញទៀតនោះដែរ ព្រោះរំពឹងមាន iPhone ផ្សេងបីម៉ូឌែល ដោយ ២ ជាប្រភេទអេក្រង់ OLED និងមួយជា LCD ក្រោមការសហការជាមួយក្រុមហ៊ុន Japan Display Inc. និង Sharp ។