អាមេរិកចោទចិនលួចបច្ចេកវិទ្យា ចិនតបតវិញធ្វើឲ្យផ្សារហ៊ុនអាមេរិកធ្លាក់ជិត ២ ភាគរយ

2018-04-05 01:34:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីលោក Donald Trump បានប្រកាសពីបញ្ជីមួយកាលពីថ្ងៃអង្គារជុំវិញការនាំចូលរបស់ចិន ក្នុងគោលដៅតបតទៅនឹងភាពមិនត្រឹមត្រូវលើការធ្វើពាណិជ្ជកម្មអន្តរជាតិរវាងប្រទេសទាំងពីរ។ សំណើលើការត្រួតពិនិត្យថ្លៃពន្ធសារជាថ្មី ដោយរួមមានផលិតផលមនុស្សយន្ត, ព័ត៌មានបច្ចេកវិទ្យា, ទូរគមនាគមន៍និងអវកាស។

តំណាងភ្នាក់ងារពាណិជ្ជកម្មរបស់សហរដ្ឋអាមេរិក សង្កត់ធ្ងន់ថាផលិតផលដូចបញ្ជាក់ពីខាងលើបានទាញផលប្រយោជន៍ឲ្យឧស្សាហកម្មប្រទេសចិន ប៉ុន្តែបានបង្កផលប៉ះពាល់ដល់សេដ្ឋកិច្ចក្នុងប្រទេសខ្លួន។ ជាពិសេសគោលនយោបាយអយុត្តិធម៌ ដែលបានបង្ខំឲ្យក្រុមហ៊ុនអាមេរិកធ្វើការផ្ទេរនូវបច្ចេកវិទ្យានិងកម្មសិទ្ធិបញ្ញាឲ្យទៅបណ្ដាក្រុមហ៊ុនក្នុងស្រុកចិន។

សេចក្តីប្រកាសនេះអាចនឹងបង្កើនភាពរកាំរកូសរវាងអាមេរិកនិងដៃគូពាណិជ្ជកម្មធំបំផុតរបស់ខ្លួន ដែលកំពុងស្ថិតក្នុងការព្រួយបារម្ភជុំវិញការកើតមានសង្គ្រាមពាណិជ្ជកម្ម ដោយផ្សារហ៊ុនអាមេរិកកាលពីថ្ងៃចន្ទ ស្រាប់ធ្លាក់ចុះអស់ជាង ២ ភាគរយ ប៉ុន្តែស្ទុះងើបឡើងវិញបានកណ្តាលនៅថ្ងៃបន្ទាប់។

រំឭកថាមុនសេចក្តីប្រកាសសម្រេចចេញផ្សាយ នាថ្ងៃចន្ទប្រទេសចិនបានដំឡើងថ្លៃពន្ធលើម្ហូបអាហារសោតយ៉ាងដូចជាសាច់ជ្រូក, ផ្លែឈើ, គ្រាប់ធញ្ញជាតិ និងផលិតផលដទៃទៀតដែលនាំចូលពីអាមេរិក ជាការសងសឹកទៅនឹងនយោបាយរបស់លោក Trump ក្រោយរំអុកថ្លៃពន្ធលើការនាំចេញដែកថែបនិងអាលុយមីញ៉ូមទៅសហរដ្ឋអាមេរិក។