បុគ្គលិកជាង ៣ ០០០ នាក់ ទ្រាំលែងបាន ស្នើមេ Google ដកខ្លួនពីគម្រោងសម្ងាត់មួយ

2018-04-05 08:24:04
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលិករបស់ Google បានផ្ញើញត្តិមួយទាមទារឲ្យលោក Sundar Pichai ដែលជា CEO របស់ Google ដកខ្លួនចេញពីគម្រោង Maven របស់មន្ទីរបញ្ចកោណ (The Pentagon)។ មានបុគ្គលិកមិនតិចជា ៣ ១០០ នាក់ឡើយដែលស្នើឲ្យក្រុមហ៊ុនរបស់ខ្លួនមួយនេះដកខ្លួនចេញជាបន្ទាន់ពី គម្រោងសិក្សាពីការធ្វើ AI ដ៏ធំមួយនេះ។

កាលពីខែមុន Google បានថ្លែងស្ដីពីការផ្ដល់ជាជំនួយ និងប្រភពស្វែងរក ដល់មន្ទីរការពារជាតិក្នុងគម្រោងការ Maven។ Maven ជាគម្រោងការមួយ ដែលចង់សិក្សានិងបង្កើតជា AI ដែលអាចវិភាគរូបភាពដែលថតបានដោយ Drone។ គម្រោងការនេះចាប់ផ្ដើមឡើងតាំងតែពី ខែមេសា ឆ្នាំមុនមកម៉្លេះ ប៉ុន្តែ Google ទើបតែបានប្រកាសក្នុងការចូលដៃជួយដល់គម្រោងការនេះនាខែមុនតែប៉ុណ្ណោះ។ នៅក្នុងសន្និសីទកាសែត អ្នកនាំពាក្យរបស់ Google បានប្រាប់និយាយថា គេអនុញ្ញាតឲ្យមន្ទីរការពារជាតិ អាចចូលមើលទិន្នន័យក្នុង TensorFlow software ដែលជាកម្មវិធី open-sourced ប្រើប្រាស់ Machine Learning ដែលអាចឲ្យវាយល់ថារូបភាពនោះជាអ្វី។

នៅក្នុងញត្តិដែលបានផ្ញើទៅ CEO Google នោះបុគ្គលិកបានទាមទារឲ្យ Google ដកខ្លួនចេញពីគម្រោងការ Maven និងត្រូវពង្រឹងគោលការណ៍ខ្លួនឡើងវិញ អំពីការចូលរួមជាមួយសកម្មភាពនានាដែលមានទាំងទងនឹងផ្នែកយោធា។ ញត្តិនោះក៏បានសរសេរឡើងថែមទៀតថា "ការចុះកុងត្រាធ្វើរឿងនេះវាធ្វើឲ្យអាប់អោន ដល់កេរ្តិ៍ឈ្មោះរបស់ Google ហើយក៏បំពានគោលជំហររបស់ក្រុមហ៊ុនដែរ។ ការជួយបង្កើតបច្ចេកវិទ្យានេះសម្រាប់យោធា នឹងអាចមានលទ្ធផលអាណោចអាធ័មកើតឡើង ហើយក្រុមហ៊ុននឹងមិនអាចទទួលយកវាបានឡើយ" ។

ទាក់ទិនទៅនឹងបញ្ហាប្រគល់ញត្តិចេញនេះ អ្នកតំណាងខាង Google បានចេញមកថ្លែងថា "ការចូលរួមក្នុងការបង្កើតបច្ចេកវិទ្យារបស់យោធានេះ ធ្វើឲ្យអ្នករាល់គ្នាមិនសប្បាយចិត្ត ហើយពួកយើងយល់ច្បាស់ពីបញ្ហានេះ។ ប៉ុន្តែពួកយើងគ្រាន់តែចង់បញ្ជាក់ថា បច្ចេកវិទ្យានេះគឺធ្វើឡើងដើម្បីជួយជីវិតមនុស្សនៅក្នុងស្ថានការណ៍ដែលគ្រោះថ្នាក់ប៉ុណ្ណោះ" ។

ជុំវិញបញ្ហានៃគម្រោង Maven មិនថាបុគ្គលិក Google ឬក៏សាធារណជនឡើយសុទ្ធតែមានកង្វល់ពីរឿងនេះ ព្រោះថា ប្រសិនបើបច្ចេកវិទ្យានេះត្រូវបានប្រើប្រាស់ជា AI សម្រាប់ Drone ដែលមានបំពាក់អាវុធនោះ វាអាចនឹងមានការសម្លាប់រង្គាលយ៉ាងធំសម្បើម ដែល Drone ទាំងនោះជាឃាតកឈាមស្រស់តែម្ដង ហើយវាអាចបង្កការគំរាមកំហែងដល់មនុស្សជាតិទាំងមូលក៏ថាបាន៕

ចុចអាន៖

ប្រភព៖ theverge ប្រែសម្រួល៖ ផាត សុវត្ថិ