តារាហូលីវូដល្បីៗទាំង៨រូប សម្រេចចិត្តមិនផ្ដល់មរតកដល់កូនៗ

2018-04-11 08:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជារកចំណូលបានយ៉ាងច្រើនយ៉ាងណាក្ដី ក៏តារាល្បីៗទាំងនេះសម្រេចចិត្តមិនបន្សល់មរតកយ៉ាងច្រើនសន្ធឹកសន្ធាប់ទៅកាន់កូនៗរបស់ខ្លួនឡើយ។ ដោយសារតែមិនចង់ឲ្យកូនៗ របស់ខ្លួនឈ្លក់វង្វេងនឹងទឹកប្រាក់យ៉ាងច្រើនសន្ធឹកសន្ធាប់ ដែលជួនកាលអាចបំផ្លាញអនាគតពួកគេផងដែរ។ ដូច្នេះហើយទើប តារាៗទាំងនេះសុខចិត្តផ្ដល់ការសិក្សាអប់រំជំនួសប្រាក់មរតកវិញ ដើម្បីឲ្យធានាបានថាពួកគេនឹងទទួលបានអនាគតល្អ។

នេះជាបណ្ដាតារាល្បីៗ សម្រេចចិត្តមិនដល់មរតករាប់លានដល់កូនៗ៖

១. អ្នកដឹកនាំរឿងល្បីឈ្មោះ George Lucas

អ្នកណាក៏ដឹងដែរថាលោក George Lucas ដែលជាផលិតកររបស់ភាពយន្តល្បីៗ ដូចជា "Indiana Jones” និង "Star War” ជាដើម មានទ្រព្យសម្បត្តិដល់ទៅ ៥ប៊ីលានដុល្លារឯណោះ។ ក៏ប៉ុន្តែទឹកប្រាក់ទាំងនេះនឹងមិនបានដល់ដៃកូនៗ ទាំង៤របស់លោកគឺ Amanda, Jeff, Everest Hobson និង Katie នោះទេ។

២. តារាសម្ដែង Philip Seymour

តារាសម្ដែង Philip Seymour ដែលទទួលមរណភាពកាលពីឆ្នាំ ២០១៤ ខណៈពេលកំពុងថតរឿង "The Hunger Games: Mockinjay – Part II” មានទ្រព្យសម្បត្តិនៅសល់ដល់ទៅ ៣៥លានដុល្លារឯណោះ។ លោកមិនបានបន្សល់ទឹកប្រាក់ទាំងនេះឲ្យកូនៗ Tallulah, Willa និង Cooper Alexander នោះទេ ប៉ុន្តែបន្សល់ទុកដីធ្លីឲ្យមិត្តស្រីរបស់ខ្លួន ដែលជាម្ដាយកូនៗទាំង៣រូបនេះ។

៣. ចុងភៅល្បីឈ្មោះ Gordon Ramsey

ចុងភៅដ៏ល្បីឈ្មោះប្រចាំចក្រភពអង់គ្លេស Gordon Ramsey ល្បីឈ្មោះយ៉ាងខ្លាំងមិនថាជានៅអង់គ្លេស សហរដ្ឋអាមេរិកនោះទេ។ លោកមានកម្មវិធីទូរទស្សន៍ផ្ទាល់ខ្លួនជាច្រើន ព្រមទាំងកាន់កាប់ភោជនីយដ្ឋានជាច្រើនទូទាំងពិភពលោកផងដែរ។ គិតត្រឹមពេលនេះលោកមានទ្រព្យសម្បត្តិ ១៥៩លានដុល្លារ តែមិនបន្សល់ទុកឲ្យកូនៗឡើយព្រោះគិតថាទឹកប្រាក់ទាំងនេះ នឹងបំផ្លាញពួកគេ។

៤. ចុងភៅល្បីឈ្មោះ Nigella Lawson

មិនខុសពី Gordon Ramsey ប៉ុន្មានទេ Nigella Lawson ក៏មិនបន្សល់ទុកមរតកឲ្យកូនៗច្រើនសន្ធឹកសន្ធាប់នោះទេ។ ក្នុងនាមជាចុងភៅ អ្នកនិពន្ធ និងជាពិធីការ Nigella មានទ្រព្យសម្បត្តិមិនតិចជាង ២៥លានដុល្លារនោះទេ។ នាងមានកូន២នាក់គឺ Cosima និង Bruno ប៉ុន្តែអ្នកទាំងពីរនឹងមិនទទួលបានប្រាក់មរតកវាល់លាននោះទេ។

៥. ពិធីករ Simon Cowell

ពិធីករល្បីឈ្មោះសម្រាប់កម្មវិធីប្រឡងចម្រៀងឬបង្ហាញទេពកោសល្យ Simon Cowell នឹងមិនបន្សល់មរតកទៅឲ្យកូនៗ នោះទេ។ គិតត្រឹមពេលនេះលោកមានទ្រព្យសម្បត្តិ ៤៥៣លានដុល្លារ ប៉ុន្តែលោកនឹងមិនបន្សល់ទុកឲ្យកូនប្រុសលោក Eric Cowell នោះទេ ដោយបរិច្ចាគទៅឲ្យអង្គការមនុស្សធម៌ផ្សេងៗទៅវិញ។

៦. តារាចម្រៀង Elton John

បន្ទាប់ពីចូលសិល្បៈចម្រៀង តារាជើងចាស់ Elton John រកចំណូលបានដល់ទៅជាង ៤៥០លានដុល្លារឯណោះ។ បូករួមជាមួយទ្រព្យសម្បត្តិរបស់ស្វាមីលោក David Furnish អ្នកទាំងពីរមានទ្រព្យសម្បត្តិដល់ទៅ ៥០០លានដុល្លារ ក៏ប៉ុន្តែកូនប្រុសទាំងពីរ Elijah និង Zachary នឹងមិនទទួលបានទឹកប្រាក់ទាងនោះទេ ដោយសារ Elton មិនចង់ឲ្យជីវិតពួកគេមានភាពច្របូកច្របល់ដោយសារទឹកប្រាក់ច្រើនពេក។

៧. តារាចម្រៀង Sting

តារាចម្រៀង Sting ឈ្មោះពិត Gordon Matthem Thomas Sumner ដែលជាតារាចម្រៀងនិងអ្នកនិពន្ធបទភ្លេងម្នាក់ មានទ្រព្យសម្បត្តិដល់ទៅជាង ៣០០លានដុល្លារឯណោះ ប៉ុន្តែលោកមិនបន្សល់ទុកឲ្យកូនៗ ទាំង៥ឡើយ ដោយបានបណ្ដុះបណ្ដាលពួកគេឲ្យមានមុខរបរពិតប្រាកដវិញដូចជា តន្ត្រី ការសម្ដែង និង ជាតារាម៉ូដែលជាដើម។

៨. តារាសម្ដែង Jackie Chan

លោក Jackie Chan ឬ ឈិន ឡុង ល្បីឈ្មោះទាំងនៅប្រទេសចិននិងហូលីវូដ មានទ្រព្យសម្បត្តិដល់ទៅ ៣៩៥លានដុល្លារឯណោះ។ ទោះជាមានទឹកប្រាក់ច្រើនយ៉ាងនេះក្ដី លោកនឹងមិនបន្សល់មរតកនេះទៅឲ្យកូនប្រុស Jaycee Chan នោះទេ ដោយបរិច្ចាគទៅអង្គការមនុស្សធម៌ជំនួសវិញ៕

អានអត្ថបទ៖

ប្រភព៖ The Richest ប្រែសម្រួល៖ ធារ៉ូ