ទើបតែចេញបានប៉ុន្មានថ្ងៃ អ្នកសរសេររឿង "A Quiet Place” មានគំនិតសម្រាប់វគ្គថ្មីបាត់!

2018-04-10 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកសរសេរប៉ារ៉ូលរឿង "A Quiet Place” លោក Bryan Woods និង Scott Beck មានគំនិតជាច្រើនរួចស្រេចទៅហើយ សម្រាប់វគ្គថ្មីចំពោះរឿងបែបរន្ធត់នេះ។ វាជារឿងមួយដែលមិននឹកស្មានដល់ ដែលភាពយន្តនេះមានលទ្ធភាពរកចំណូលបានដល់ទៅ ៥០លានដុល្លារចំពោះសប្ដាហ៍ដំបូង។

ដឹកនាំរឿងដោយលោក John Krasinski “A Quiet Place” និយាយពីគ្រួសារមួយ ដែលខិតខំប្រឹងប្រែងគេចពីសេចក្ដីស្លាប់ ដោយពិភពលោកស្ថិតនៅក្នុងស្ថានភាពដ៏គ្រោះថ្នាក់មួយ។ នៅក្នុងរឿងនេះ មានសត្វចម្លែកមួយប្រភេទ អាចប្រមាញ់មនុស្សដោយប្រើញាណពិសេស បានមកពីការឭសំឡេង។ ដូច្នេះហើយទើបបានជារឿងរ៉ាវដែលកើតឡើងនៅក្នុងរឿងនេះ គឺវាពិតជាប្លែកនិងគួរឲ្យចាប់អារម្មណ៍ ដោយទទួលបានការគាំទ្រជាច្រើនពីសំណាក់តារាហូលីវូដល្បីៗ សូម្បីតែអ្នកនិពន្ធរឿងបែបរន្ធត់ Stephen Hawkin ក៏សរសើរពីរឿងនេះដែរ។

ក្នុងកិច្ចសម្ភាសន៍មួយជាមួយសារព័ត៌មាន Fandango អ្នកសរសេររឿងទាំងពីររូបបាននិយាយថា "វាពិតជាពិភពដ៏រំភើបប្លែកមួយ។ យើងអាចបង្កើតរឿងរ៉ាវប្លែកៗជាច្រើន។"

អ្នកទាំងពីរបន្ថែមថា "ពួកយើងមានគម្រោងជាច្រើនដែលមិនទាន់ដាក់បញ្ចូលនៅក្នុងរឿង ដូចជារឿងរ៉ាវថ្មីៗ អាចជាប្រភេទសត្វចម្លែកថ្មីជាដើម ដូច្នេះដោយមានតួអង្គសំខាន់ៗ រួចជាស្រេចដូច្នេះវាមិនពិបាកនោះទេ ចំពោះការបង្កើតអ្វីដែលថ្មីចំពោះវគ្គបន្ទាប់។"