ម៉ឺន សុភា មានចំណុចពិសេស ដែលសិស្សគុនរួមក្លឹបស្រឡាញ់ និងគោរពជាខ្លាំង

2018-04-18 07:58:23
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជួរមុខ រហស្សនាមកណ្ដាប់ដៃថ្ម ម៉ឺន សុភាព ក្រៅពីមានអត្តចរិតស្លូតបូតមិនប្រកាន់ខ្លួនជាអ្នកល្បីទេ ថែមទាំងចិត្តល្អ ក្រោយប្រកួតចប់តែងតែចែកលុយដល់សិស្សរួមក្លឹបនានាទុកហូបអីទៀតផង។

ម៉ឺន សុភា(ក្រហម)

លោក ធន់ សុភា ដែលជាគ្រូបង្វឹករបស់ ម៉ឺន សុភា ប្រាប់ថា កូនសិស្សរបស់លោកខាងលើនេះ មិនវាយឫក ឬប្រកាន់ខ្លួនជាកីឡាករជួរមុខ ជាកីឡាករល្បីនោះឡើយ គឺតែងតែស្រឡាញ់រាប់អានគេគ្រប់គ្នា។ ចំណុចល្អមួយទៀតនោះ គឺចេះស្រឡាញ់មើលថែសិស្សប្អូនរួមក្លឹប អប់រំអ្នកទាំងនោះឲ្យខំប្រឹង និងជួយបង្វឹកពួកគេទៀត។

ម៉ឺន សុភា ឈ្នះមេដាយប្រាក់នៅម៉ាឡេស៊ី

គ្រូប្រដាល់សមាគមក្រសួងការពារជាតិរូបនេះបន្ថែមថា ម៉ឺន សុភា តែងតែចែកលុយដល់សិស្សប្អូនក្នុងក្លឹប បន្ទាប់ពីរូបគេឡើងប្រកួតរួច ដើម្បីឲ្យអ្នកទាំងនោះបានលុយគ្រាន់ហូបអីប្រចាំថ្ងៃ ទម្រាំពួកគេបានឡើងប្រកួត។ ក្រៅពីនោះ ម្ចាស់មេដាយប្រាក់ស៊ីហ្គេម ក៏ឧស្សាហនាំសិស្សប្អូនទៅហូបអីនៅតាមហាងផ្សេងទៀតដែរ។

ម៉ឺន សុភា ឈ្នះមេដាយមាសកីឡាជាតិលើកទី១

ចំណែកសិស្សរួមក្លឹបមួយចំនួនក៏បានប្រាប់ឲ្យដឹងដែរថា ពួកគេពិតជាស្រឡាញ់ទឹកចិត្តសិស្សច្បងរូបនេះណាស់ ក្រៅតែពីជួយបង្ហាត់បង្ហាញ ថែមទាំងឧស្សាហចែកលុយណាស់ដល់សិស្សប្អូន និងប្រាប់ជានិច្ចឲ្យខំប្រឹងហ្វឹកហាត់។

ម៉ឺន សុភាព ពេលឈ្នះថៃនៅសង្វៀនបាយ័ន

រំលឹកដែរថា ម៉ឺន សុភា ជាអ្នកប្រដាល់ល្បីឈ្មោះម្នាក់នៅកម្ពុជា និងជាម្ចាស់មេដាយប្រាក់ស៊ីហ្គេមឆ្នាំ ២០១៧ នៅ ម៉ាឡេស៊ី។ ឥលូវនេះកំពុងលេងខ្សែក្រវាត់នៅសង្វៀនបាយ័ន ហើយឡើងដល់វគ្គពាក់កណ្ដាលផ្ដាច់ព្រ័ត្រថែមទៀតផង៕

អត្ថបទ៖ នួន ស៊ីណា