LG ចេញកំពូលទូរសព្ទជំនាន់ក្រោយ លើកនេះដាក់ឈ្មោះឡូយកប់

2018-04-24 02:47:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតឧបករណ៍អេឡិចត្រូនិកដ៏ធំរបស់កូរ៉េខាងត្បូង LG នឹងបញ្ចេញកំពូល Smartphone ស៊េរី G ដោយលើកនេះមានឈ្មោះរាងប្លែកបន្តិច។ LG G7 ThinQ ដែល ThinQ ជាឈ្មោះ AI ដែលបង្កើតឡើងដោយ LG ផ្ទាល់តែម្តង។

ប៉ុន្មានថ្ងៃមុននេះ មានរូបភាព Render លេចចេញពីបណ្ដាញសង្គម Twitter របស់អ្នកបញ្ចេញរូបភាពលេចធ្លាយរបស់ smartphone លោក Evan Blass ដែលបង្ហាញពីរូបរាងមុខ ក្រោយ ឆ្វេង ស្ដាំ លើ ក្រោម របស់ទូរសព្ទហៀបនឹងចេញនេះខ្ទេចខ្ទីគ្មានសល់។

G7 ThinQ, redux pic.twitter.com/QBWceCtr1a

— Evan Blass (@evleaks) April 23, 2018

បើតាមរូបភាពដែលយើងឃើញនោះ គេប្រាកដជាដឹងពីលក្ខណៈសម្បត្តិដែលរៀបរាប់ខាងក្រោមនេះហើយដូចជា៖

ក្បាលឆក ៖ គេសង្កេតឃើញថា អេក្រង់របស់ LG លាតសន្ធឹងជិតពេញផ្ទៃអេក្រង់ហើយ បូករួមជាមួយនឹងក្បាលឆកមួយដុំសម្រាប់បំពាក់កាមេរ៉ាមុខ រន្ធបញ្ចេញសំឡេង និង សេនស័រផ្សេងៗ។ ក្បាលឆកនេះពិតជាពេញនិយមខ្លាំងមែនទែន សម្រាប់ទូរសព្ទនានាពីពេលបច្ចុប្បន្ន ជាពិសេសបន្ទាប់ពី iPhone X បានបង្ហាញខ្លួនកាលពីខែកញ្ញាឆ្នាំមុន។ យ៉ាងណាមិញ ប្រព័ន្ធប្រតិបត្តិការ Android P ក៏មានមុខងារលុបបំបាត់ឆកនេះដែរ ដែលមានស្រាប់ដូចជានៅលើ P20 Pro របស់ Huawei ជាដើម តែគេមិនដឹងថា LG G7 ThinQ នេះនឹងមានមុខងារលុបបំបាត់ស្នាមឆកនេះឬក៏អត់ទេ។
ប៊ូតុង Google Assistant ដាច់តែឯងមួយ ៖ ប៊ូតុងនេះនឹងស្ថិតនៅដាច់ដោយឡែកតែម្ដង ស្រដៀងនឹងប៊ូតុង Bixby របស់ Samsung Galaxy ដែរ។ វាអាចស្ថិតនៅផ្នែកខាងឆ្វេង ក្រោមប៊ូតុងបន្ថែម បន្ថយសំឡេង ព្រោះប៊ូតុងមួយគ្រាប់ផ្នែកខាងស្ដាំនោះអាចជាប៊ូតុងចាក់សោ និងបិទបើកម៉ាស៊ីនច្រើនជាង។
រន្ធកាស 3.5mm ៖ បើនេះជាការពិតមែននោះ ក្រុមហ៊ុន LG នឹងទាក់ចិត្តអតិថិជនបានច្រើនហើយ ពីព្រោះកាសជាច្រើនរបស់ពួកគេ ដែលប្រើរន្ធទូទៅ 3.5mm នឹងនៅតែប្រើប្រាស់បានលើ Smartphone នេះ។ ក្រៅពីនេះ គេក៏ឃើញរន្ធសាកថ្ម USB-C ដែលអាចសាកថ្ម និងបញ្ជូនទិន្នន័យបានលឿនខ្លាំង ព្រមទាំងរន្ធបញ្ចេញសំឡេងមួយផងដែរ។
ទ្រនាប់ស្កេនខ្ចៅដៃផ្នែកខាងក្រោយ ៖ តាមរូបភាព Render នេះ យើងក៏បានឃើញទ្រនាប់ស្កេនខ្ចៅដៃស្ថិតនៅផ្នែកខាងក្រោយផងដែរ។ មើលតាមទីតាំងនោះ ទ្រនាប់ស្កេនខ្ចៅដៃមានភាពងាយស្រួលក្នុងការដោះសោ មិនឲ្យអ្នកប្រើច្រឡំដៃវាសម្រាមដៃលើកញ្ចក់កាមេរ៉ាភ្លោះនោះឡើយ ព្រោះវាស្ថិតនៅរាងក្រោមឆ្ងាយនិងមានរាងជារង្វង់ទៀត ងាយស្រួលស្មាន។