អ្នករត់តាក់ស៊ីភ្នំពេញ-កំពត ក៏និយាយរឿង ពែកមី គ្រោះថ្នាក់ចរាចរណ៍ដែរ!

2014-11-13 21:28:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់រថយន្តឈ្នួលភ្នំពេញ-កំពតម្នាក់និយាយថា បានឈប់មើលករណីគ្រោះថ្នាក់ចរាចរណ៍ ដែលកើតឡើងនៅភូមិល្អាង ឃុំល្អាង ស្រុកដងទង់ កាលពីល្ងាចមិញដែរ ហើយឃើញនាយ ពែកមី នៅក្នុងហេតុការណ៍នោះដែរ ខណៈប្រជាពលរដ្ឋផ្សេងទៀតកំពុងចោមរោមមើល។

លោកថា៖ “ខ្ញុំឃើញតែតារាកំប្លែងម្នាក់ហ្នឹង!... នាយ ពែកមី នរណាមិនស្គាល់ មើលទូរទស្សន៍រាល់ថ្ងៃ ស្គាល់តែម្នាក់ហ្នឹង ក្រៅពីហ្នឹងមានស្គាល់នរណា!"។ ប្រភពខាងលើអះអាងថា សូម្បីភ្ញៀវដែលអង្គុយនៅខាងក្រោយរូបលោក ក៏សុទ្ធតែបានឃើញដូចគ្នា និងបុកពោះគ្រប់គ្នាពេលឃើញតារាកំប្លែងល្បី ជួបគ្រោះថ្នាក់ចរាចរណ៍ដូច្នេះ។

លោកបានបន្តថា រថយន្តដែលក្រឡាប់នោះ ជាប្រភេទ Lexus 470 ពណ៌សមិនចាំស្លាកលេខនោះទេ ព្រោះមិនបានចាប់អារម្មណ៍ ដោយផ្ដោតតែលើនាយ ពែកមី ប៉ុណ្ណោះ។

“ឃើញនាយ ពែកមី អត់មានត្រូវអីផង គាត់ដើរចេញពីឡាននោះ ខ្ញុំហួសទៅ! ព្រោះម៉ូយប្រញាប់ផង ល្ងាចហើយ តែបានរាយការណ៍ចូលប៉ុស្តិ៍មហាជនដែរ"។ ម្ចាស់រថយន្តឈ្នួលរូបនោះបញ្ជាក់។

ទោះបីជាយ៉ាងណា កញ្ញា ឆែ ដានី ជាអ្នកសម្របសម្រួលកម្មវិធី "ព័ត៌មានទាន់ហេតុការណ៍" នៃវិទ្យុមហាជន អេហ្វអឹម ៩៥.៣០ បានប្រាប់ថា មានប្រជាពលរដ្ឋជាច្រើននាក់ បានរាយការណ៍ពីករណីនេះដែរអំឡុងម៉ោង៦ល្ងាចមិញ។

កញ្ញា បានបន្តថា ភាគច្រើនមហាជនអះអាងថា ឃើញតារាកំប្លែងនាយ ពែកមី នៅក្នុងហេតុការណ៍នោះប្រាកដមែន ដោយអ្នកខ្លះថា បានជួយរុញច្រានរថយន្តនោះឲ្យផ្កាប់មកវិញទៀតផង។ ចំណែកនាយ ពែកមី ត្រូវបានអ្នកស្រុកជួយបើកទ្វា ដើម្បីរំដោះនាយចេញពីរថយន្ត ខណៈនាយព្យាយាមបាំងមុខគេចចេញពីកាមេរ៉ាទូរសព្ទជាច្រើន។ ប្រភពដដែលបន្ថែមថា មានប្រជាពលរដ្ឋជាច្រើនបានឃើញហេតុការណ៍នេះ។

ភ្លាមៗក្រុមការងារបានរាយការណ៍ទៅក្រុមប្រចាំបញ្ជាអគ្គស្នងការនគរបាលជាតិ ដើម្បីបោះដៃទៅកាន់សមត្ថកិច្ចមូលដ្ឋានចុះទៅអន្តរាគមន៍ទាន់ពេលវេលានៅកន្លែងកើតហេតុ ដើម្បីបង្ការក្រែងមានអ្នករងរបួសធ្ងន់៕

អានអត្ថបទ៖ សមត្ថកិច្ចទម្លាយរឿង ពែកមី គ្រោះថ្នាក់ចរាចរណ៍

អានអត្ថបទ៖ ហេតុអ្វីលោកតា ប្រាជ្ញ ឈួន ហៅតារាល្បីៗទៅជួប

អត្ថបទ៖ សំ ជំនាញ