កូរ៉េខាងជើង នឹងរំកិលម៉ោង ៣០នាទី ឲ្យដូចកូរ៉េខាងត្បូងវិញ

2018-05-01 03:09:12
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលកូរ៉េខាងជើង បានសម្រេចនឹងផ្លាស់ប្ដូរម៉ោងរបស់ខ្លួនឲ្យដូចទៅនឹងប្រទេសកូរ៉េខាងត្បូង ចាប់ពីថ្ងៃទី៥ ខែឧសភា ឆ្នាំ២០១៨ខាងមុខ។ ក្នុងន័យនេះ ម៉ោងនៅក្នុងកូរ៉េខាងជើងនឹងត្រូវរំកិលទៅមុខលឿនជាងមុន ៣០នាទី។

កូរ៉េខាងជើងបានប្ដូរម៉ោងខុសពីកូរ៉េខាងត្បូង ចាប់តាំងពីឆ្នាំ២០១៥មកម៉្លេះ ហើយការសម្រេចចិត្តកែម៉ោងឲ្យដូចដើមវិញនេះធ្វើឡើងក្រោយពីជំនួបជាប្រវត្តិសាស្ត្ររវាងលោក មូន ជេអ៊ីន និងលោក គីម ជុងអ៊ុន កាលពីថ្ងៃទី២៧ ខែមេសា ឆ្នាំ២០១៨។

គួររំលឹកឲ្យដឹងថា ក្រោយជំនួបពិភាក្សាពេញមួយថ្ងៃ ប្រទេសកូរ៉េទាំងពីរ បានប្រកាសលទ្ធផល នៃកិច្ចប្រជុំជាប្រវត្ដិសាស្រ្ដហើយ។ ចំណុចសំខាន់ៗ នៃលទ្ធផលកិច្ចប្រជុំនោះ រួមមាន៖

១. បញ្ឈប់រាល់សកម្មភាពដែលបង្កជាជម្លោះដាក់គ្នាទៅវិញទៅមក

២. បង្កើតការិយាល័យទំនាក់ទំនងអចិន្រ្ទៃយ៍នៅព្រំដែននៃប្រទេសកូរ៉េទាំងពីរ

៣. បញ្ឈប់ការអភិវឌ្ឍកម្មវិធីនុយក្លេអ៊ែរទាំងស្រុង

៤. កាត់បន្ថយសព្វាវុធ និងផ្អាកសកម្មភាពដែលបង្កភាពតានតឹងផ្នែកយោធា

៥. ប្រធានាធិបតីកូរ៉េខាងត្បូង មូន ជេអ៊ីន នឹងធ្វើទស្សនកិច្ចទៅក្រុងព្យុងយ៉ាង នៅរដូវស្លឹកឈើជ្រុះ (អំឡុងខែកញ្ញា)៕

ចុចអាន៖

អត្ថបទ៖ សេង ឡុង