អ្នកប្រើ iPhone ចង់ដូរចិត្តប្រើ Android Device អាចពិចារណា Pixel 2 បាន

2018-06-03 04:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រើ iPhone រយៈពេលយូរ ធុញទ្រាន់មិនចង់ឡើងស៊េរីប្រើ iPhone X ហើយចង់ផ្លាស់ប្ដូរបទពិសោធន៍ថ្មីជាមួយ Android Device គួរពិចារណាម៉ូដែល Pixel របស់ Google។

ម៉ូដែលថ្មី Pixel 3 និង Pixel 3 XL ទំនងជាអាចនឹងប្រកាសចេញនៅខែតុលា អាចពន្យារពេលរង់ចាំប្រើម៉ូដែលថ្មីចុងក្រោយបាន។ ត្រួសៗ ពីចំណុចប្រៀបធៀបអាចគិតគូរបាន។

តម្លៃ Pixel 2 64GB ថ្មី ធូរថ្លៃជាង iPhone X 64GB។

Google បានផលិតជំនាន់ទូរសព្ទទំហំធំ ប្រើ Processor និងកាមេរ៉ាដូចគ្នានោះគឺ Pixel 2 XL ខណៈ Apple ផលិត iPhone 8 ប្រើ Processor និង កាមេរ៉ា Wide-angle ដូចនឹង iPhone X ហើយតម្លៃជិតខ្ទង់ពាន់។

Notch (ក្បាលឆកនៅផ្នែកលើផ្ទៃខាងមុខ) iPhone X ស្តើង និងតូចជាង តែមានអេក្រង់ធំជាង ទំហំ ៥.៨ អ៊ីង បើប្រៀបនឹង អេក្រង់ទំហំ ៥ អ៊ីងរបស់ Pixel 2 បើនិយាយពីទម្ងន់វិញ iPhone X ធ្ងន់ជាង Pixel 2។

Pixel 2 មានជ្រុងកោង និង Sensor ស្កេនក្រយៅដៃខាងក្រោយ។ ពិសេស មានផ្ទៃកញ្ចក់ខាងក្រោយតូចមួយចំណិតដាក់កាមេរ៉ាផងដែរ។ អាលុយមីញ៉ូមផ្នែកក្រោមក្រោយ ងាយស្រួលកាន់ប្រើ និងមិនសូវបារម្ភ ពេលធ្លាក់។ ការសាកល្បងទម្លាក់ iPhone X ត្រឹមមួយដង បានធ្វើឲ្យកញ្ចក់ក្រោយប្រេះស្រាំ។

Apple បានជំនួសមុខងារស្កេនក្រយៅដៃ ជាមួយ FaceID ដោយទូរសព្ទ Unlock ចូលប្រើបានពេលសម្លឹងទៅអេក្រង់។ ខណៈ Pixel 2 មានប្រើមុខងារស្កេនក្រយៅដៃ ដែលមនុស្សភាគច្រើនចូលចិត្តជាង។

Speaker លើទូរសព្ទទាំងពីរ លឺ ពីរោះ ជាង Pixel និង iPhone 7, 7 Plus។

ការសាកថ្ម និងរន្ធកាស Pixel 2 មាន Fast Charger អាចបន្ថែមអាយុថាមពលថ្មបាន ៧ ម៉ោង ក្រោយសាក ១៥ នាទី។ iPhone X អាចប្រើមុខងារ Fast Charging និងអាចសាកថ្មតាម Wireless តែតម្រូវទិញឧបករណ៍បន្ថែម។ Pixel 2 មិនទាន់អាចប្រើមុខងារសាកថ្មតាម Wireless បានទេ តែល្បឿនសាក ១៥ នាទីរៀបរាប់ខាងលើ ក៏មិនមានចំណុចបារម្ភដែរ។

ទូរសព្ទទាំងពីរមិនមានរន្ធកាសនោះទេ តែអាចប្រើជាមួយ Adapter ភ្ជាប់ខ្សែកាសបាន។ Apple លក់កាស Wireless ហៅថា AirPods ខណៈ Google ផ្តល់ជម្រើស Google Buds។

Android Oreo ដំណើរការល្អ ការផ្លាស់ប្ដូរធំមួយ ត្រូវការពិចារណា មែនទែនទៅអាចមិនមែនតួទូរសព្ទ តែជាការប្តូរប្រព័ន្ធប្រតិបត្តិការ។ Android Oreo ដំណើរការបានយ៉ាងល្អលើ Pixel 2 ដូច iOS 11 លើ iPhone X ចឹង។

ពេលផ្លាស់ប្តូរអាចមិនបានប្រើសេវាកម្មកម្មវិធី iMessage និង FaceTime របស់ Apple ជាពិសេសបើមិត្តភក្ដិ ឬក្រុមគ្រួសារពឹងផ្អែកលើកម្មវិធីនេះ។

ទាំង Android Oreo និង iOS 11 បានផ្តល់មុខងារល្អៗ សុវត្ថិភាព និងភាពងាយស្រួលក្នុងការប្រើប្រាស់។

Google ផលិតទាំង Hardware និង Software ដូចនឹង Apple ដែរ ដូច្នេះការអាប់ដេតប្រព័ន្ធមានភាពទៀងទាត់ និងលឿន។

iPhone X មាន Apple Pay និង Siri ខណៈ Pixel 2 មាន Android Pay និង Google Assistant ដែលក៏អាចដំណើរការលើ iPhone ផងដែរ។ បើអ្នកប្រើ Apple Music សេវាកម្មប្រភេទនេះក៏មានប្រើលើ Android ផងដែរ។

បើធ្លាប់បានទិញកម្មវិធី ឬហ្គេមជាច្រើនលើ iOS ប្រហែលត្រូវការទិញម្តងទៀតលើ Android តែបច្ចុប្បន្នកម្មវិធីល្អៗឥតគិតថ្លៃមានប្រើច្រើន។

Google ថ្មីៗនេះបានប្រកាសចេញ Android P ជាការអាប់ដេតបន្ទាប់។ Apple អាចនឹងចេញជំនាន់ Developer ជាមុនសិនសម្រាប់ប្រព័ន្ធ iOS បន្ទាប់ នៅព្រឹត្តិការណ៍ Worldwide Developer Conference (WWDC)។

កាមេរ៉ា Pixel 2 មានកាមេរ៉ាក្រោយមួយគ្រាប់ តែលើ iPhone X មានពីរគ្រាប់។ ទូរសព្ទទាំងពីរ អាចផលិតរូបភាព និងវីដេអូបានយ៉ាងល្អ។ តែបើមើលទៅដូចជា Pixel 2 ថតរូបភាពបានស្អាតជាង iPhone X ដោយពឹងជំនួយពីបច្ចេកវិទ្យា AI។

ទូរសព្ទទាំងពីរមានមុខងារ Portrait Mode ដែលផ្តល់រូបភាពព្រាលក្រោយ ច្បាស់ផ្ទៃខាងមុខបានដាច់ស្អាត ស្រដៀងនឹងការថតប្រើកាមេរ៉ា DSLR ដែរ។ ត្រង់ចំណុចនេះ iPhone X ចេញលទ្ធផលបានស្អាតជាង។

កាមេរ៉ាមុខទូរសព្ទទាំងពីរ ក៏មាន Portrait Mode ដែរ។ Pixel 2 កាមេរ៉ាមុខ មុខងារ Portrait ដំណើរការល្អដូចកាមេរ៉ាក្រោយដែរ ខណៈកាមេរ៉ាមុខ iPhone X ពេលខ្លះផ្តាច់ផ្ទៃខាងក្រោយខុសប្រក្រតី។

និយាយពីវីដេអូវិញ iPhone X ស៊ីដាច់ ដោយផ្តល់គុណភាពរូបភាពច្បាស់ល្អ និងមានជម្រើសថតច្រើន។ តែមុខងារទប់លំនឹងពេលថតវីដេអូរបស់ Pixel 2 ក៏ស៊ីដាច់វិញដែរ។

ថាមពលថ្ម និងល្បឿន Processor Chip A11 របស់ iPhone X និង Chip Snapdragon 835 របស់ Qualcomm បំពាក់ក្នុង Pixel 2 មិនអាចបែងចែកដាច់មួយណាយឺតជាងនោះទេ។

ការសាកល្បងចាក់វីដេអូសារចុះឡើង Pixel 2 បានរយៈពេល ១៣ ម៉ោង ២៨ នាទី ខណៈ iPhone X ត្រឹម ១១ ម៉ោង ៤៥ នាទី។ នេះក៏មិនខុសគ្នាធំពេកនោះទេ អាចប្រើបានស្ទើរពេញមួយថ្ងៃ ក្រោយសាកមួយដង។

Pixel 2 មាន Connector អាចបញ្ជូនទិន្នន័យពី iPhone ចាស់ទៅទូរសព្ទ Google ថ្មីបាន ហើយបើ Space រក្សាទុករូបភាព និងវីដេអូជិតអស់ អាចប្រើ Google cloud storage របស់ Pixel 2 ជាមួយនឹងទំហំ និងតម្លៃតាមតម្រូវការ។

ទូរសព្ទនេះក៏អាចប្រើជាមួយឧបករណ៍ DayDream View អាចចូលប្រើ Content VR ពី Youtube, Netflix និងច្រើនទៀត។ មួយវិញទៀត Pixel 2 អាចប្រើកម្មវិធីប្រភេទ ARCore ជាច្រើន។

iPhone អាចប្រើកម្មវិធីប្រភេទ AR និងមាន FaceID ដែលអាចលេងសារជាលក្ខណៈ Animoji បាន៕