តើវាសនា Hacker កំពូល ៥ រូប ដល់ថ្នាក់ពិភពលោកប្រកាសខ្លាចរអា ពេលនេះទៅជាយ៉ាងណា?

2018-06-04 01:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ឧក្រិដ្ឋជនលើប្រព័ន្ធអ៊ីនធឺណិត Hacker ត្រូវបានបែងចែកជា ៣ ប្រភេទ ដោយមួយជាបុគ្គលមានបំណងល្អធ្វើការ Hack ដើម្បីពង្រឹងប្រព័ន្ធសុវត្ថិភាពកុំព្យូទ័រ (White-hat Hacker), ប្រភេទផ្សេងទៀតជាការលេងសើច (Gray-hat Hacker) និងប្រភេទចុងក្រោយប្រើក្នុងគោលបំណងបង្កបញ្ហា (Black-hat Hacker)។

Sabay ណែនាំឲ្យស្គាល់ពីជើងខ្លាំង Hacker ៥ រូប ដែលតាមរំអុកបង្កមហន្តរាយដល់ពិភពលោក ដើម្បីដឹងថាតើបច្ចុប្បន្នបុគ្គលទាំងនោះជានរណា នៅទីណា ហើយបម្រើការអ្វី?

១.Kevin Mitnick:

ក្រសួងយុត្តិធម៌របស់អាមេរិកបានហៅ Kevin ថាជាឧក្រិដ្ឋជនកុំព្យូទ័រមួយរូបដែលគេតាមចាប់ខ្លាំងបំផុតក្នុងប្រវត្តិសាស្រ្តប្រទេសខ្លួន។ រហូតរឿងរ៉ាវរបស់លោក ត្រូវបានចងក្រងចេញជាខ្សែភាពយន្តមួយកាលពីឆ្នាំ ២០០០ មានចំណងជើង Track Down។

តើលោកបានធ្វើខុសអ្វី? លោកបានជាប់ពន្ធនាគាររយៈពេល ១ ឆ្នាំ ពីបទលួចចូលក្នុងបណ្តាញឌីជីថលឧបករណ៍អេឡិចត្រូនិក DEC ក្រោយមកក៏ត្រូវបានភៀសខ្លួនហើយបន្តលុកលុយប្រព័ន្ធក្រសួងការពារជាតិ និងលួចយកទិន្នន័យសម្ងាត់សាជីវកម្មអស់រយៈពេលជាង ២ ឆ្នាំទៀតផង(២,៥ឆ្នាំ)។

បច្ចុប្បន្នលោកនៅទីណា? ទីបំផុតលោកត្រូវជាប់ទោសរយៈពេល ៥ ឆ្នាំ ប៉ុន្តែក្រោយចេញមកវិញបានកែខ្លួនមកក្លាយជាអ្នកពិគ្រោះយោបល់និងជាអ្នកនិយាយជាសាធារណៈអំពីប្រព័ន្ធសុវត្ថិភាពកុំព្យូទ័រ មុនពេលដំណើរការដឹកនាំក្រុមហ៊ុន Mitnick Secuirty Consulting LLC។

២.Jonathan James:

James ជាឧក្រិដ្ឋជនកុំព្យូទ័រមួយរូបដែលរងសោកនាដកម្មធំបំផុតក្នុងលោក។ លោកចាប់ផ្តើមចេះ Hack តាំងពីនៅវ័យជំទង់ ពោលគឺការលុកលុយចូលប្រព័ន្ធពាណិជ្ជកម្មនិងរដ្ឋាភិបាល។

តើលោកបានធ្វើខុសអ្វី? ធ្លាប់បានលួចចូលធ្វើស៊ីទិន្នន័យនៃប្រភពកូដ NASA ដែលមានតម្លៃស្មើ ១,៧ លានដុល្លារ ដើម្បីចង់សិក្សាពីដំណើរការស្ថានីយអវកាសអន្តរជាតិ។ រហូតបង្ខំចិត្តឲ្យ NASA ត្រូវផ្អាកប្រព័ន្ធ Network ពេញរយៈពេល ៣ សប្តាហ៍ ក្រោមការស៊ើបអង្កេតបន្ថែមត្រូវចំណាយខ្ទង់ ៤១ ០០០ ដុល្លារ។

បច្ចុប្បន្នលោកនៅទីណា? លុះដល់ឆ្នាំ ២០០៧ អំឡុងពេលក្រុមហ៊ុនជាច្រើនធ្លាក់ក្នុងរណ្ដៅនៃការវាយប្រហារ James ក៏ត្រូវបានចោទប្រកាន់ពីបទផ្សែផ្សំគំនិត លុះកន្លងផុតមួយឆ្នាំដោយទ្រាំពុំបាននឹងការសង្ស័យពីមនុស្សរាល់គ្នា ខ្លួនក៏សម្រេចធ្វើអត្តឃាតតែម្តងទៅ។

៣.Albert Gonzalez:

Gonzalez បានចាប់ផ្តើមប្រលូកដឹកនាំក្រុម ShadowCrew ដែលត្រូវបានគេស្គាល់ជាក្រុមលួចនិងលក់លេខកាតគណនីធនាគារ បន្សំនឹងការក្លែងបន្លំលិខិតឆ្លងដែន កាតធានារ៉ាប់រងសុខភាព និងសំបុត្រកំណើត។

តើលោកបានធ្វើខុសអ្វី? លោក Albert Gonzalez បានមានឈ្មោះបោះសំឡេងក្នុងវិស័យ Hack ក្រោយពេលលួចប្រមូលបានលេខកាតឥណទាននិង ATM ដល់ទៅ ១៧០ លានប័ណ្ណត្រឹមរយៈពេល ២ ឆ្នាំ។ បន្ទាប់មកលួចចូលមូលដ្ឋានទិន្នន័យក្រុមហ៊ុន TJX Companies និង Heartland Payment Systesm ក្នុងបំណងលួចយកកាតឥណទានដែលក្រុមហ៊ុនរក្សាទុក។

បច្ចុប្បន្នលោកនៅទីណា? Gonzalez ត្រូវបានជាប់ពន្ធនាគាររយៈពេល ២០ ឆ្នាំ ពោលគឺត្រូវកំណត់ឲ្យចេញមកវិញនៅឆ្នាំ ២០២៥។

៤.Kevin Poulsen:

លោក Kevin បានប្រើពេល ១៥ នាទី ក្លាយជាជនល្បីឈ្មោះ ក្រោយ Hack ចូលទៅក្នុងប្រព័ន្ធទូរគមនាគមន៍នៃខ្សែស្ថានីយវិទ្យុមួយកន្លែង ហើយបានជាប់ឈ្មោះថា Dark Dante។

តើលោកបានធ្វើខុសអ្វី? Poulsen ត្រូវបានចាប់ខ្លួននៅក្នុងផ្សារទំនើប ហើយកាត់ទោសឲ្យជាប់ពន្ធនាគាររយៈពេល ៥១ ខែ ជាមួយនឹងការសងថ្លៃខូចខាត ៥៦ ០០០ ដុល្លារ ក្រោយលួចលុកលុយក្នុងប្រព័ន្ធតាមចាប់ខ្លួនរបស់ FBI។

បច្ចុប្បន្នលោកនៅទីណា? ក្រោយដោះលែងនៅឆ្នាំ ១៩៩៥ លោក បានចាប់ផ្តើមបម្រើការជាអ្នកសារព័ត៌មាន រហូតក្លាយជាអ្នកកែសម្រួល (Editor) ជាន់ខ្ពស់ក្នុងឆ្នាំ ២០០៦ ឲ្យកាសែត Wired។ ក្នុងឆ្នាំ ២០០៦ លោកថែមទាំងបបានជួយដល់ការអនុវត្តច្បាប់ក្នុងការកំណត់អត្តសញ្ញាណជនល្មើសផ្លូវចំនួន ៧៤៤ នាក់លើ MySpace ទៀតផង។

៥.Gary McKinnon:

ឲ្យឈ្មោះហៅក្រៅថា Solo លើប្រព័ន្ធអ៊ីនធឺណិត លោក Gary ត្រូវបានគេស្គាល់ជាអ្នកលុកលុយប្រព័ន្ធយោធាខ្លាំងបំផុតក្នុងពិភពលោក។

តើលោកបានធ្វើខុសអ្វី? ក្នុងរយៈពេល ១៣ ខែរាប់ចាប់ពីខែកុម្ភៈ ឆ្នាំ ២០០១ ដល់ មិនា ឆ្នាំ ២០០២ លោក McKinnon បានចូលលួចប្រើកុំព្យូទ័រ ៩៧ គ្រឿង ដែលជាកម្មសិទ្ធិរបស់កងកម្លាំងប្រដាប់អាវុធសហរដ្ឋអាមេរិក។ តាមការបញ្ជាក់ពីសាមីខ្លួនផ្ទាល់ ថាលោកបានចូលស្វែងរកព័ត៌មានអំពីដំណើរការ UFO ប៉ុន្តែយោងតាមអាជ្ញាធរអាមេរិកសង្កត់ធ្ងន់ថាបុរសម្នាក់នេះបានលុបចោលឯកសារសំខាន់ៗជាច្រើន រហូតបណ្តាលឲ្យកុំព្យូទ័រ ៣០០ គ្រឿងលែងដំណើរការ និងខាតបង់សាច់ប្រាក់ជាង ៧០០ ០០០ ដុល្លារ។

បច្ចុប្បន្នលោកនៅទីណា? បុរសមានដើមកំណើតនៅចក្រភពអង់គ្លេសរូបនេះ បានគេចវេះពីរដ្ឋាភិបាលអាមេរិករហូតដល់ឆ្នាំ ២០០៥ នៅពេលលោកប្រឈមនឹងទោសបត្យាប័ន (ការប្រគល់អ្នកទោសឧក្រិដ្ឋឲ្យទៅអ្នកមានសមត្ថកិច្ចនៃប្រទេសខ្លួនវិញ)។