ប្លែកភ្នែកខ្លាំង កុំព្យូទ័រអេក្រង់ ២ ចេញដោយ Asus (មានវីដេអូ)

2018-06-06 07:56:44
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃច័ន្ទកន្លងទៅនេះ ស្របពេលជាមួយព្រឹត្តិការណ៍ដ៏ធំប្រចាំឆ្នាំរបស់ Apple សម្រាប់អ្នកអភិវឌ្ឍកម្មវិធី WWDC ឆ្នាំ ២០១៨ នោះ ក្រុមហ៊ុន Asus ក៏បានបង្ហាញផលិតផលនៃអនាគតរបស់ខ្លួនដែរ នាព្រឹត្តិការណ៍ Computex ឆ្នាំ ២០១៨ នៅតៃវ៉ាន់។

ក្នុងនោះផលិតផលគំរូ (concept) ដែលគួរឲ្យចាប់អារម្មណ៍ជាងគេគឺមានឈ្មោះថា គម្រោង Precog ។ គម្រោង Precog នេះ គឺសំដៅទៅលើកុំព្យូទ័រយួរដៃមួយ ដែលមានរាងបត់ដូចកុំព្យូទ័រយួរដៃទូទៅអ៊ីចឹង តែវាបំពាក់ជាមួយអេក្រង់មកទាំង ២ ផ្នែកបត់ទាំងពីរនោះតែម្ដង ដោយវាមិនមានក្ដារចុចពិតប្រាកដ និង Trackpad ឡើយ។

វាមានរាងយ៉ាងទាក់ទាញ និងមានអេក្រង់លាតពាសពេញផ្ទៃរបស់វាតែម្ដង ហើយអាចប្រើប្រាស់អេក្រង់ទាំង ២ នោះជាលក្ខណៈបញ្ឈរបានតែម្ដង។ ខាងក្រោមនេះជាលក្ខណៈសម្បត្តិមួយចំនួនរបស់កុំព្យូទ័រនោះ ដែល Asus បានបង្ហើបប្រាប់៖

វាអាចដឹងនៅពេលដែលមានក្ដារចុច ឬ Trackpad នៅជិត ហើយបើសិនជាចាំបាច់ វានឹងផ្ដល់ជាក្ដារចុចលើអេក្រង់ផ្ទាល់ដល់អ្នកតែម្ដង។
នៅពេលដែលអ្នកប្រើប្រាស់ក្ដារចុចលើអេក្រង់ វាដឹងពីទីតាំងនៃដៃរបស់អ្នក ហើយវានឹងបង្វិលក្ដារចុចនោះតាមទីតាំងឲ្យត្រូវតែម្ដង។
វានឹងដឹងពីកិច្ចប្រជុំរបស់អ្នកនៅក្នុងពេលណា ហើយវានឹងសន្សំសំចៃថ្មឲ្យបានច្រើនបំផុតទុកបម្រុងសម្រាប់ការប្រជុំនោះ។
វានឹងប្រើ AI ជាមួយកម្មវិធី Microsoft Office ឧទាហរណ៍ កម្មវិធី Microsoft Excel នឹងដាក់ស្នើជាជម្រើសដល់អ្នកដោយខ្លួនវាផ្ទាល់ ធ្វើយ៉ាងណាឲ្យអ្នកអាចបង្ហាញទិន្នន័យទាំងនោះបានល្អបំផុតនៅក្នុង spreadsheet របស់វា។
វាអាចបត់ជាពីរ ធ្វើជាសៀវភៅ ឬកុំព្យូទ័រធម្មតា ដោយអាចប្រើប្រាស់ប៊ិចសម្រាប់គូសវាសបាន ហើយវាក៏មានកាមេរ៉ាសម្រាប់សម្គាល់មុខ និងវត្ថុនានាផងដែរ ដោយប្រើបច្ចេកវិទ្យា AI។

ចង់ដឹងថា Project Precog នេះមានរូបរាងស្អាតយ៉ាងណា សូមមើលរូបភាពខាងក្រោមទាំងអស់គ្នា៖