ឃើញឧបករណ៍ផ្សាយ World Cup រៀបចំនៅរុស្សីឆ្នាំនេះ ទើបដឹងថាញាក់សាច់យ៉ាងណា

2018-06-15 07:45:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារៀងរាល់ ៤ ឆ្នាំម្ដង ព្រឹត្តិការណ៍ប្រកួតបាល់ទាត់ពិភពលោក FIFA World Cup ត្រូវប្រារព្ធឡើង ក្នុងនោះក្រុមប្រទេសចំនួន ៣២ នឹងត្រូវប្រកួតប្រជែងគ្នាដើម្បីឈានទៅដល់វគ្គផ្ដាច់ព្រ័ត្ត និងស្វែងរកជ័យជម្នះ ជូនជាតិ។

ដោយឡែកព្រឹត្តិការណ៍ FIFA World Cup ២០១៨ ដែលធ្វើឡើងនៅប្រទេសរុស្សីឆ្នាំនេះ គឺមានការរៀបចំគ្រឿងឧបករណ៍ផ្សាយកាន់តែកម្រិតខ្ពស់ជាងការរៀបចំ World Cup មុនៗ។

រាល់ការថតផ្សាយចេញពីទីលានផ្ទាល់ ស្ថិតក្រោមការគ្រប់គ្រងរបស់ផលិតកម្ម HBS ដែលធ្លាប់ទទួលបន្ទូករៀបចំការថតផ្សាយសម្រាប់ព្រឹត្តិការណ៍ FIFA World Cup បាន ៥ ដងមកហើយ។ ក្នុងឆ្នាំ ២០១៨ ក្រុមហ៊ុនបានបង្កើនកម្រិតការផ្សាយដល់កម្រិត UHD និង 4K HDR ឯណោះ ពីលើវីដេអូកម្រិត Full HD 1080។

HBS House Containter

រាល់ការប្រកួត HBS នឹងប្រើកាមេរ៉ាម៉ាក Sony ចំនួន ៣៤ គ្រឿង ក្នុងចំណោម ៣៧០ គ្រឿងដោយប្រើបច្ចេកវិទ្យា SR Live (Slog3) របស់ Sony បូករួមនឹង XVS switch ចំនួន ២៩ គ្រឿង និងអេក្រង់ជាង ១ ០០០ គ្រឿង ដើម្បីពិនិត្យមើលគុណភាពវីដេអូ និងចែកចាយទៅកាន់បណ្ដាញផ្សព្វផ្សាយ ដូចជា ប៉ុស្តិ៍ទូរទស្សជាដើម តាមកម្រិតវីដេអូ ដែលគេចង់បាន (Full HD, UHD ឬ 4K HDR) ដែលគ្រប់គ្រងដោយ HBS Container House។

អ្វីដែលសំខាន់ ក្រៅពីឧបករណ៍ទាំងនោះ ដើម្បីអាចបញ្ជូនវីដេអូចេញបានគឺ Equipment Room Container (ERC) ដែលជាបន្ទប់សម្រាប់បន្ដការផ្សាយ ដែលវាមានចំនួន ១២ សម្រាប់កីឡដ្ឋានទាំង១២ នៃការប្រកួតនេះ។ គ្រប់សកម្មភាព ប្លង់ថត របស់វីដេអូត្រូវគ្រប់គ្រងដោយ ERC ហើយវាធ្លាប់ផ្ដល់ជោគជ័យ ក្នុងការផ្សាយនាព្រឹិត្តិការណ៍ FIFA World Cup ២០១៤ នៅប្រទេសប្រេស៊ីល ម្ដងរួចមកហើយ តែសម្រាប់ព្រឹិត្តិការណ៍ FIFA World Cup ២០១៨ នៅរុស្សីឯនេះវិញ ECR ត្រូវបានកែច្នៃឲ្យកាន់តែទំនើបជាងមុន។

ក្រៅពី ERC នៅមានកន្លែងមួយទៀត ដែលគេហៅថា Technical Operation Center (TOC) ដែលជាកន្លែងគ្រប់គ្រងរលកសញ្ញានៃការផ្សាយ។ TOC មួយ ត្រូវបានភ្ជាប់ជាមួយ ERC មួយ ហើយវាជាកន្លែងសម្រាប់ដាក់សម្ភារៈសំខាន់ៗ ដូចជា Router, Audio, Patch panel និងអេក្រង់ជាដើម។

ក្នុងប្រតិបត្តិការផ្សាយចេញនេះ គេក៏មិនអាចភ្លេចលើកឡើងពី ខ្សែកាបជាង ៥៣ ០០០ ដុំ ដែលមានប្រវែងជាង ៦៥០ គ.ម ត្រូវប្រើសម្រាប់ភ្ជាប់រាល់ឧបករណ៍នានា បន្ទប់ ECR, TOC និង HBS House Container ដែរ៕

ក្រៅពីការទស្សនា នៅកីឡដ្ឋានផ្ទាល់ ការផ្សាយបន្តតាមទូរទស្សន៍ពាសពេញពិភពលោក ក៏ត្រូវបានធ្វើឡើង ដើម្បីឲ្យអ្នកគាំទ្ររាប់ពាន់លាននាក់ទៀត បានទស្សនាដូចគ្នា ជាមួយគុណភាពរូបភាពកាន់តែជក់ចិត្ត មិនចាញ់ទស្សនាទីលានផ្ទាល់នោះទេ។

ចុចអាន៖

ប្រភព៖ live-production ប្រែសម្រួល៖ ផាត សុវត្ថិ