ឡុង សុភី ល្អណាស់ ផ្ដួលជើងខ្លាំងថៃ វ៉ាត់ ឆារ៉ាឡេក និង អូប៉រ ដេកស្អាត
- 2018-06-19 02:25:56
- ចំនួនមតិ 0 | ចំនួនចែករំលែក 0
ឡុង សុភី ល្អណាស់ ផ្ដួលជើងខ្លាំងថៃ វ៉ាត់ ឆារ៉ាឡេក និង អូប៉រ ដេកស្អាត
ចន្លោះមិនឃើញ
អ្នកប្រដាល់គុនខ្មែរចាស់វស្សា ឡុង សុភី លួចទៅរៀនក្បាច់ពិសេសនៅឯណា ឥលូវផ្ដួលថៃ ស្ទើររាល់ប្រកួតតែម្ដង ថែមទាំងឈ្នះខ្សែក្រវាត់ និងមេដាយមាសក្នុងកម្មវិធីកីឡាជាតិថ្មីៗនេះទៀតផង។
មួយរយៈពេលធំមកនេះ អ្នកនិយមប្រដាល់គុនខ្មែរ លាន់មាត់សរសើរកីឡាករ ឡុង សុភី ស្ទើរគ្រប់គ្នា ដោយសារជើងខ្លាំងរូបនេះប្រកួតមិនដែលចាញ់ឡើយ បើទោះជាប៉ះអ្នកប្រដាល់ល្អៗរបស់ថៃយ៉ាងណាក៏ដោយ។ ជាក់ស្ដែងកាលពីអាទិត្យមុននោះ អ្នកប្រដាល់កម្ពុជាខាងលើ ផ្ដួលកីឡាករកំពូលឌឺរបស់ថៃ វ៉ាត់ ឆារ៉ាឡេក ឲ្យសន្លប់ក្នុងទឹកទី៣ នៅសង្វៀនបាយ័នស្ទឹងមានជ័យ ដែលស្ទើរគ្មានកីឡាករកម្ពុជាណាមួយ អាចវ៉ៃថៃខាងលើនេះឲ្យសន្លប់បានឡើយ។
ចំណែកការប្រកួតកាលយប់ថ្ងៃសៅរ៍ ទី១៦ មិថុនា ឆ្នាំ២០១៨ កូនសិស្សលោក ឡុង សាលវ័ន្ត រូបនេះ វ៉ៃបច្ចេកទេស និងប្រើក្បាច់ប្រចាំត្រកូល គឺជង្គង់ចាក់ពេញៗ ផ្ដួលជើងខ្លាំងថៃ អូប៉រ ឲ្យសន្លប់ត្រឹមទី២ ប៉ុណ្ណោះនាជំនួបមិត្តភាពអន្តរជាតិសង្វៀន TV5 ។ ថៃដែលសន្លប់នេះ អ្នកតាមដានគុនខ្មែរសុទ្ធតែស្គាល់ពីសមត្ថភាពរបស់គេ ប៉ុន្តែនៅតែមិនអាចដល់ទឹកទី៥បានជាមួយ ឡុង សុភី។
ឡុង សុភី ក៏ធ្លាប់ឲ្យ Sabay ដឹងថា ឥលូវនេះគេផ្ដោតលើការប្រកួតខ្លាំង មិនថាមិត្តភាព ឬកម្មវិធីធំៗផ្សេងៗនោះទេ គឺខំប្រឹងប្រកួតឲ្យអស់ពីសមត្ថភាព ដើម្បីជ័យជម្នះ និងស្តាកេរ្តិ៍ឈ្មោះដែលធ្លាប់ល្បីខ្លាំងពីមុនមកវិញ និងជារួមចង់បានមុខមាត់ខ្លាំងតែម្ដង។ ខណៈការប្រកួតល្អ នឹងមានឱកាសបានឡើងសង្វៀនច្រើន ថវិកាក៏បានច្រើនតាមនិងដែរ។
កីឡាករ ឡុង សុភី ជាកូនសិស្សលោក ឡុង សាលវ័ន្ត មកពីក្លឹបសាលវ័ន្តកីឡា គេជាអ្នកប្រដាល់ចាស់វស្សាមកហើយក្នុងវិស័យនេះ។ មួយចុងក្រោយនេះ គេពិតជាធ្វើបានល្អខ្លាំងណាស់ ពោលឈ្នះ ម៉ឺន សុភា យកខ្សែក្រវាត់ ១គ្រឿង និងឈ្នះមេដាយមាសប្រដាល់សកលនៅកម្មវិធីកីឡាជាតិលើកទី២ ដើមខែមិថុនា ខណៈប្រកួតមិត្តភាពពីរដងផ្ដួលជើងខ្លាំងថៃ វ៉ាត់ ឆារ៉ាឡេក ឲ្យសន្លប់នៅបាយ័ន ចំណែក អូប៉រ វ៉ៃឲ្យសន្លប់នៅសង្វៀន TV5៕