ក្រុមតន្រ្តី ២៨០ វង់ជាង គ្រោងដាក់លិខិតទៅអាជ្ញាធរជួយរឿងលុបបំបាត់ការលេងភ្លេងសម័យក្នុងពិធីហែកំណត់

2018-06-27 06:09:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការបង្ហើបឲ្យដឹងពីនាយក្រូច ដែលជាថៅកែវង់ភ្លេងមួយរូបក្នុងខេត្តកំពង់ស្ពឺ មានក្រុមតន្រ្តី ២៨០ វង់ជាង ទូទាំងប្រទេស គ្រោងធ្វើលិខិតមួយទៅអាជ្ញាធរពាក់ព័ន្ធ ដើម្បីលុបបំបាត់រឿងលេងភ្លេងសម័យពេលព្រឹកក្នុងកម្មវិធីហែកំណត់ ព្រោះខុសពីប្រពៃណីខ្មែរ និងជាហេតុធ្វើឲ្យមានការគ្រោះថ្នាក់ចរាចរណ៍ដោយសារតែការខំទៅឲ្យទាន់កម្មវិធីទាំងយប់ទាំងមិនបានដេកពូន។

ក្នុងគម្រោងលិខិតដែលក្រុមតន្ត្រីសម័យទូទាំងប្រទេសដែលមានជាង២៨០វង់ជាង នាយក្រូច បានឲ្យដឹងថា សិល្បករ សិល្បៈការិនី ជាតន្រ្តីករ តន្រ្តីការនីផ្នែកតន្ត្រីសម័យ ដែលរស់នៅក្នុងខេត្ត នឹកមកពីបណ្តាខេត្តនានា ដែលបានទៅបម្រើការសិល្បៈមហាជនទូទៅ កំពុងតែមានការព្រួយបារម្ភយ៉ាងខ្លាំងអំពីសុវត្ថិភាពនៃអាយុជីវិតរបស់ពួកគាត់ ដោយសារតែ គ្រប់ថៅកែក្រុមតន្រ្តីសម័យទាំងអស់តែងតែប្រឡងប្រណាំងគ្នាដោយចង់បានការចំណេញច្រើន និងចង់បានភាពល្បីឈ្មោះដោយចាប់ផ្ដើមឲ្យអ្នកភ្លេង ដើម្បីទទួលក្នុងកម្មវិធីហែកំណត់កូនកំលោះចូលរោងការ ដែលជាប្រពៃណីមួយខុសពីទំនៀមទម្លាប់ខ្មែរបុរាណដែលគេតម្រូវឲ្យតែផ្នែកតន្ត្រីបុរាណជាអ្នកប្រគំដង្ហែកូនកំលោះប៉ុណ្ណោះ។

ដោយសារតែមូលហេតុនេះហើយធ្វើអោយសិល្បករ សិល្បៈការិនី ជាតន្ត្រីករ តន្ត្រីការិនីផ្នែកតន្ត្រីសម័យត្រូវចេញដំណើរមិនថាថ្ងៃ ឬយប់ម៉ោងប៉ុន្មានក៏ដោយ គឺត្រូវទៅរៀបចំឆាកឲ្យទាន់វេលាហែកំណត់ជាកំហិត ដូច្នេះវាបានធ្វើឲ្យរងការប៉ះពាល់ជាច្រើន ដូចជា អត់ងងុយ សម្រាកមិនគ្រប់គ្រាន់ ព្រោះត្រូវធ្វើដំណើរតាមផ្លូវមិនថាជិតឆ្ងាយ គ្រោះថ្នាក់ចរាចរណ៍បណ្ដាលមកពីតៃកុងប្រញាប់ តៃកុងអត់ងងុយ ខ្យល់គរស្លាប់ ហើយអ្នកខ្លះ ឈានដល់ការប្រើប្រាស់គ្រឿងញៀនដែលវាអាចជួយមិនអោយដេកលក់បាន និងមានមូលហេតុផ្សេងៗទៀត។

ក្នុងសំណើដដែលនោះក្រុមវង់ភ្លេងទាំងនោះ ចង់ឲ្យរដ្ឋាភិបាលក៏ដូចជាស្ថាប័នមានសមត្ថកិច្ចជួយបញ្ចប់នូវកំហុសឆ្គងរបស់ថៅកែភ្លេងទាំងអស់នេះផង ដូចជាសុំឲ្យលោកគណៈអភិបាលចេញលិខិតបង្គាប់ជូនលោកចៅហ្វាយស្រុក លោកមេឃុំ លោកនាយប៉ុស្តិ៍ ឲ្យចុះជូនដំណឹងមិនឲ្យមានការប្រគំតន្ត្រីសម័យទទួលហែកំណត់ពេលព្រឹកជាដាច់ខាត ហើយជាពិសេសសុំជូនដំណឹងដល់លោកថៅកែភ្លេងសម័យឲ្យបានដឹងគ្រប់ៗផង ។

តាមការបញ្ជាក់ពី នាយក្រូច លិខិតនោះនៅមិនទាន់ឯកភាពគ្នាទាំងស្រុងនៅឡើយទេ ដោយក្រុមរបស់លោកគ្រោងប្រជុំគ្នានៅដើមខែកក្កដា ខាងនេះទៀត ដើម្បីសម្រេចដាក់ទៅជូនស្ថាប័នដែលពាក់ព័ន្ធ ឬធ្វើសន្និសីទកាសែតតែម្ដង៕

អត្ថបទៈ ស៊ុនហួត