ចង់តាមដានរឿងស្មាតហ្វូន កុំភ្លេចជើងខ្លាំង ៥ រូបនេះ យ៉ាងតូចមាន Subscriber ១ លាននាក់

2018-07-02 00:43:26
ចំនួនមតិ 0 | ចំនួនចែករំលែក 0

ចន្លោះមិនឃើញ

មកណែនាំឲ្យស្គាល់អ្នកស្នេហាវិស័យបច្ចេកវិទ្យា ៥ រូបបាននឹងកំពុងមានឈ្មោះបោះសំឡេងលើគេហទំព័រ YouTube ជុំវិញការចែករំលែកចំណេះដឹងលើឧបករណ៍បច្ចេកវិទ្យានិងការ Review ស្មាតហ្វូន ក៏ដូចជាឧបករណ៍ប្រើប្រាស់មួយចំនួនប្រចាំថ្ងៃ។

១.C4ETech មាន Subscribers ប្រមាណ ១,២ លាននាក់:

Channel ដែលបង្កើតឡើងតាំងពីឆ្នាំ ២០០៧ បច្ចុប្បន្នមានការចុចទស្សនាសរុបក្បែរ ២៤៥ លានដង ដោយអ្នកចាត់ការ C4ETech មានឈ្មោះថា Ash ផ្តោតសំខាន់ជុំវិញវិស័យស្មាតហ្វូននិងប្រព័ន្ធប្រតិបត្តិ Android។

កាលពីជាង ១ ឆ្នាំមុនវីដេអូ Unboxing ស្មាតហ្វូន Nokia 6 ទទួលបានការចុចទស្សនាជាង ៥,៣ លានដង ហើយក៏មានវីដេអូថ្មីៗជាច្រើនទៀតសោតយ៉ាងដូចជាការប្រៀបធៀបស្មាតហ្វូន Xiaomi Mi 8 និង OnePlus 6 ជាដើម។

២.JerryRigEverything មាន Subscribers ប្រមាណ ២ លាននាក់:

បង្កើតឡើងនាឆ្នាំ ២០១២ ជា Channel ដែលផ្តោតសំខាន់លើការតេស្តភាពធុននិងឆែកមើលគ្រឿងក្នុងម៉ាស៊ីនរបស់ស្មាតហ្វូនជំនាន់ក្រោយ។ វីដេអូមានការចុចទស្សនាច្រើនបំផុតរបស់ក្រុមការងារមួយនេះ ទាក់ទងនឹងការសាកល្បងកាច់ iPhone 7 ដោយមានការចុច View រហូតដល់ ១៥ លានដង។

៣.EverythingApplePro មាន Subscribers ប្រមាណ ៥,៧ លាននាក់:

បង្កើតឡើងនាឆ្នាំ ២០០៩ ក្រុមផ្តោតសំខាន់លើផលិតផល Apple មានការចុចទស្សនាសរុបដល់ជាង ១,៣ ពាន់លានដង។ ប្រមូលផ្តុំដោយវីដេអូការ Review ឧបករណ៍ iPhone/iPad/iPod ការប្រៀបធៀប ការ Jailbreak ចំណេះដឹង ក៏ដូចជាការសាកល្បង Drop Test។

៤.TechRax មាន Subscribers ប្រមាណ ៦,១ លាននាក់:

ជាបុរសសញ្ជាតិអ៊ុយក្រែន ស្ថាបនិករូបនេះបានបង្កើត Channel របស់ខ្លួនតាំងពីឆ្នាំ ២០០៩ មកទល់បច្ចុប្បន្នមានការចុចទស្សនាជាង ១,៣ ពាន់លានដងហើយ។ វីដេអូភាគច្រើនរបស់ TechRax ផ្តោតលើការសាកល្បងបែបធ្ងន់ធ្ងរ ពោលដូចជាការប្រើញញួរ កាំភ្លើង និងដាក់ឲ្យរថយន្តកិនទៅលើស្មាតហ្វូនជាដើម ពោលជាមាតិកាចម្លែកមួយដែល Youtuber ភាគច្រើនពុំហ៊ានចំណាយ។

៥.UnboxTherapy មាន Subscribers ប្រមាណ ១១ លាននាក់:

កន្លងទៅទើបតែទទួលបានពាន Diamond Creator Award ជា Channel មានចំនួន Subscribers ច្រើនជាង ១០ លាននាក់ រហូតជំរុញចិត្តឲ្យបុរសរូបនេះបង្កើតកម្មវិធី Give Away ចែក OnePlus 6 ឥតគិតថ្លៃដល់ទៅ ១០៦ គ្រឿង។ ផ្តោតសំខាន់លើមាតិកា Review ឧបករណ៍បច្ចេកវិទ្យានិងស្មាតហ្វូនសេរ៊ីចុងក្រោយ បន្សំរឿងរ៉ាវមួយចំនួនដែលអ្នកពុំធ្លាប់បានដឹង។