អ្នកជ្រមុជទឹក១៩នាក់ ចូលទៅជួយមនុស្ស៥នាក់ចុងក្រោយ ក្នុងរូងភ្នំថាំហ្លួងហើយ!
- 2018-07-10 06:30:00
- ចំនួនមតិ 0 | ចំនួនចែករំលែក 0
អ្នកជ្រមុជទឹក១៩នាក់ ចូលទៅជួយមនុស្ស៥នាក់ចុងក្រោយ ក្នុងរូងភ្នំថាំហ្លួងហើយ!
ចន្លោះមិនឃើញ
អាជ្ញាធរថៃបានបញ្ជាក់ថា បេសកកម្មជួយសង្គ្រោះក្មេងថៃ៥នាក់ចុងក្រោយនៅថ្ងៃនេះ បានចាប់ផ្ដើមហើយនៅវេលាម៉ោង ១០៖០៨នាទីព្រឹក ដោយមានអ្នកជ្រមុជទឹក ១៩នាក់ចូលទៅក្នុងរូងភ្នំថាំហ្លួង។
ទោះបីជាមានភ្លៀងធ្លាក់យ៉ាងខ្លាំងពេញមួយយប់ក៏ដោយ លក្ខខណ្ឌក្នុងរូងភ្នំមិនបានផ្លាស់ប្តូរច្រើននោះទេ។ ប្រសិនបើអ្វីៗគ្រប់យ៉ាង ដំណើរការដូចបានគ្រោងទុក នោះពួកគេនឹងអាចចេញពីរូងភ្នំខាងលើអស់ក្នុងថ្ងៃនេះតែម្តង។
លោក Narongsak Osatanakorn ប្រធានសម្របសម្រួលប្រតិបត្តិការនេះ បាននិយាយថា «ថ្ងៃដំបូងយើងបានចំណាយពេល១១ម៉ោង, ម្សិលមិញយើងបានចំណាយពេល៩ម៉ោង, ថ្ងៃនេះយើងសង្ឃឹមថាអាចធ្វើវាបានលឿនជាងមុន ឬដូចថ្ងៃម្សិលមិញដែរ»។
បើយោងតាមការត្រួតពិនិត្យសុខភាពបឋមលើក្មេងប្រុស៤នាក់ដំបូង កាលពីម្សិលមិញនេះ វេជ្ជបណ្ឌិតបាននិយាយថា ២នាក់បានឆ្លងមេរោគសួតតិចតួច ហើយម្នាក់ទៀតគ្រុនក្តៅ។ ប៉ុន្តែពួកគេបានលេបថ្នាំ ហើយស្ថានភាពសុខភាពគ្រាន់បើវិញ រហូតអាចលេងសើចបាននៅពេលល្ងាចទៀតផង។
គួរបញ្ជាក់ថា ក្មេងប្រុសដែលត្រូវគេសង្គ្រោះរួច បានឃើញមុខឪពុកម្ដាយរបស់ពួកគេតាមកញ្ចក់ ប៉ុន្តែមិនទាន់អាចប៉ះពាល់ ឬឱបគ្នាបាននោះទេ។ ខាងមន្ទីរពេទ្យសង្ឃឹមថា ពួកគេអាចសន្ទនាគ្នាទៅវិញទៅមកតាមទូរសព្ទនៅថ្ងៃនេះ។
យ៉ាងណាមិញ រហូតមកដល់ពេលនេះ ពួកគេនៅតែពាក់វ៉ែនតាដើម្បីការពារភ្នែក ជាការប្រុងប្រយ័ត្នមួយ ក្រោយពីចំណាយពេលជាង២សប្តាហ៍នៅក្នុងទីងងឹត៕
ចុចអាន៖