ពាក់កណ្ដាលអាធ្រាត្រ សង្សារដែលស្លាប់ទៅហើយ ឆាតមកសុំទោស ពីទង្វើរបស់នាងកាលនៅរស់!!!
- 2018-07-13 11:31:00
- ចំនួនមតិ 0 | ចំនួនចែករំលែក 0
ពាក់កណ្ដាលអាធ្រាត្រ សង្សារដែលស្លាប់ទៅហើយ ឆាតមកសុំទោស ពីទង្វើរបស់នាងកាលនៅរស់!!!
ចន្លោះមិនឃើញ
ជួបគ្នាទៀតហើយក្នុងទំព័រ "នឹកឡើងហួសចិត្ត" នៅថ្ងៃចុងសប្ដាហ៍នេះ មានរឿងខ្មោចមួយទៀត ចែកចាយដោយមន្ត្រីរាជការមួយរូប...Admin អានក៏ព្រឺសម្បុរដែរ...តោះ...តាមដានទាំងអស់គ្នា៖
អ្វីដែលខ្ញុំចង់ប្រាប់បងប្អូននៅគ្រាដំបូងនេះ គឺថា នេះជារឿងពិតអត់ប្រឌិតអីទេ វាទើបតែកើតមានចំពោះខ្ញុំថ្មីៗ ដោយថែមទាំងបានធ្វើឲ្យខ្ញុំបែកញើសញ័រខ្លួនដេកលែងលក់ទល់ភ្លឺ។ ខ្ញុំបាទឈ្មោះ ធី បុគ្គលិកស្ថាប័នរដ្ឋមួយរូប។ ខ្ញុំមានទំនាក់ទំនងជាមួយនារីម្នាក់ដែលជាអ្នកសិល្បៈ ពួកយើងទើបបានទាក់ទងគ្នាប្រមាណជាង១ឆ្នាំចុងក្រោយ។
នៅអំឡុងពេលមានទំនាក់ទំនងជាមួយគ្នា ច្បាស់ណាស់មានទាំងប្រៃផង ល្វីងផង ផ្អែមផង។ ប៉ុន្តែទំនាក់ទំនងជាមួយតារា ដែលមានរូបឆោមលោមពណ៌ល្អឆើតខុសពីផ្កានានា មិនមែនជារឿងស្រួលប៉ុន្មានទេ។ ពេលខ្លះ ខ្ញុំដឹងច្បាស់ថា នាងទៅជួបអ្នកណា ធ្វើអី ក៏ខ្ញុំដឹង ប៉ុន្តែខ្ញុំ នៅតែប្រឹងធ្វើគធ្វើថ្លង់។ និយាយនេះមិនមែនកំពុងប្រឌិតរឿងតាមបទ "សង្សារតារា" របស់លោក ឆាយ វីរៈយុទ្ធ ទេ។
ប៉ុន្តែក៏ព្រោះតែទំនាក់ទំនងមួយនេះ វាកើតចេញពីការអាណិត មុនការស្រឡាញ់ ព្រោះថាសង្សារខ្ញុំនាងមានប្រវត្តិកម្សត់ខ្លាំង កំព្រីកំព្រាគ្មានសាច់ញាតិឡើយ។ ដូច្នោះហើយ បើទោះនាងខុស ឬត្រូវក៏ដោយ ខ្ញុំតែងជាអ្នកអនុគ្រោះឲ្យនាងជានិច្ច សុខចិត្តធ្វើជាទីប្រឹក្សានាងពេលនាងមានបញ្ហា ឬក៏ហោចណាស់ ក៏ធ្វើជាកន្លែងចាក់ចោលទុក្ខសោករបស់នាងដែរ ដោយពេលខ្លះសុខចិត្តគេងស្ដាប់នាងរៀបរាប់ រឿងរ៉ាវនាងផ្សេងៗពីមុនបានជួបខ្ញុំជាដើម ដើម្បីឲ្យនាងបានធូរស្បើយក្នុងទ្រូងខ្លះ។
ទំនាក់ទំនងដែលមិនទាន់បានរលូនផង ស្រាប់តែរឿងតក់ស្លុត ក៏បានកើតឡើង សង្សាររបស់ខ្ញុំបានជួបគ្រោះរហូតដល់ស្លាប់ ដោយមិនបានពោលពាក្យលាគ្នា ឬក៏សុំអភ័យទោសគ្នាអីមួយម៉ាត់ឡើយ។ វេលាដែលនាងមានគ្រោះ គឺវេលាដែលខ្ញុំ កំពុងជាប់បេសកកម្មទៅបរទេសរយៈពេល២សប្ដាហ៍។ ដូច្នេះហើយខ្ញុំបានត្រឹមទួញសោកពីចម្ងាយ និងបួងសួងជូនដំណើរនាងទៅកាន់ឋានសុខ សូមកុំអោយមានឆាកជីវិតអភ័ព្វដូចជាតិនេះទៀត។
ខ្ញុំភ្លេចប្រាប់រឿងមួយ អំឡុងពេលដែលខ្ញុំមានទំនាក់ទំនងជាមួយនាង ខ្ញុំក៏មានសង្សារម្នាក់ទៀតជាបុគ្គលធម្មតាដែរ ហើយនេះអាចនិយាយថាជាស្នេហាពិតក៏បាន ខណៈទំនាក់ទំនងខ្ញុំជាមួយតារាស្រីខាងលើ វាដូចជាទីប្រឹក្សាស្នេហាមួយ ដូចដែលបានប្រាប់ពីខាងលើ។
នៅយប់មួយ ម៉ោងប្រហែលជា ១១យប់ទៅហើយ ខ្ញុំទទួលបាន ឆាត ពីសង្សារខ្ញុំឈ្មោះ មីគី(ឈ្មោះប្រឌិត)។ នាងសួរផ្ញើសារមក នាងសួរថា "នឹកខ្ញុំទេ?” ខ្ញុំឆ្លើយថា "នឹក" នាងផ្ញើមកទៀតថា "ខានជួបគ្នាយូរហើយ ដឹងទេថា ខ្ញុំនឹកបងណាស់"។ ខ្ញុំក៏ឆ្លើយទៀតថា "នឹកអូនដូចគ្នា"។
បន្តមក នាងក៏ឆាតមកទៀត "ដឹងទេថាខ្ញុំជានរណា?” ខ្ញុំក៏តបវិញថា "មីគី...អូនឯងលេងអី?"។ "ខានជួបបងយូរ បងនៅតែដដែល...សុំទោសដែលមិនបានល្អដាក់ពីមុន...អរគុណដែលបានកំដរ"។ "មីគី អូនឯងធ្វើអី? ខ្ញុំសួរទៅវិញដោយការងឿងឆ្ងល់។
សារនាងក៏បន្តមកទៀត "សង្ឃឹមថាគេនោះ មិនដូចខ្ញុំ ធ្វើបាប និងកុហកបង សុំទោស...សុំទោស...សុំទោស...លាហើយ!។ តាមពិត ខ្ញុំចាប់ផ្ដើមសង្ស័យ តាំងពីសារនាងថា "ខានជួបគ្នាយូរ" ម្ល៉េះ ព្រោះខ្ញុំ និងសង្សារទើបតែជួបគ្នាម្សិលមិញទេ។ លុះមកដល់សារចុងក្រោយនេះ ខ្ញុំដឹងច្បាស់ហើយថា នាងជានរណា...ហើយក៏ចាប់ផ្ដើមបែកញើសជោគខ្លួន។ "បើសិនជាអ្នក សូមទៅកាន់ទីសុខ ខ្ញុំអហោសិកម្មឲ្យគ្រប់យ៉ាង សូមបានក្ដីសុខ“ ខ្ញុំប្រមូលស្មារតីប្រឹងបន្តសារទៅនាង។
ដើម្បីកាន់តែច្បាស់ ខ្ញុំបានទូរសព្ទទៅសង្សារខ្ញុំភ្លាមៗ សួរពីរឿងដែលកើតឡើង។ សង្សារខ្ញុំប្រាប់ថា នាងគេលក់តាំងម៉ោងខ្ទង់៩ ម្ល៉េះ មិនដឹងរឿងទេ។ ខ្ញុំក៏ឲ្យនាងបើកមើលឆាតរបស់នាង...ព្រះអើយ...នៅក្នុងឆាតនាង មានតែសាររបស់ខ្ញុំនិយាយតែម្នាក់ឯង មិនមានសារនាងទេ ខុសពីសារក្នុងឆាតរបស់ខ្ញុំមាន សារឆ្លើយឆ្លងគួរឲ្យព្រឺក្បាល។
នៅយប់នោះ រហូតទល់ភ្លឺខ្ញុំគេមិនលក់សូម្បី១នាទី ព្រោះហេតុការណ៍វាដូចជាស្រស់ៗពេក ភ័យឡើងបែកញើសជោគខ្លួន ធ្វើចិត្តយ៉ាងណា ក៏ធ្មេចមិនលក់...សូមទៅឲ្យបានសុខចុះ នារីកម្សត់ ខ្ញុំអហោសិកម្មឲ្យគ្រប់យ៉ាង...!
សារមួយខាងក្រោមនេះ ជាសារនៅក្នុងឆាតទូរសព្ទសង្សារខ្ញុំ ដែលខ្ញុំស្នើឲ្យនាងថតផ្ញើមកឲ្យ បង្ហាញថា ខ្ញុំឆាតតែម្នាក់ឯង។