ពូទីនដឹកឡានពាសដែកទើបផលិតថ្មី ទៅជិះដល់ហ្វាំងឡង់

2018-07-14 07:08:16
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្ត Limousine របស់លោកប្រធានាធិបតីរុស្ស៊ី លោក វ៉្លាឌីមៀ ពូទីន ត្រូវបានបញ្ជូនទៅកាន់ប្រទេសហ្វាំងឡង់ នៅមុនជំនួបកំពូលរវាងប្រធានាធិបតីរុស្ស៊ី និងសមភាគីអាមេរិក លោក ដូណាល់ត្រាំ ដែលនឹងត្រូវធ្វើឡើង នាថ្ងៃទី ១៦ កក្កដា ឆ្នាំ២០១៨ខាងមុខ។

រថយន្តម៉ូដែល Kortezh នេះ ត្រូវបានបញ្ជូនទៅកាន់ប្រទេសហ្វាំងឡង់ តាមរយៈយន្តហោះ II-76 មួយគ្រឿង។ រូបភាពរបស់រថយន្តនេះ ត្រូវគេថតបាន នៅក្បែរអាកាសយានដ្ឋាន Helsinki ក្នុងទីក្រុង Helsinki ប្រទេសហ្វាំងឡង់។

រថយន្ត Limousine នេះ គឺជាផ្នែកមួយនៃគម្រោងផលិតរថយន្តក្នុងស្រុក សម្រាប់ក្រុមមន្ត្រីជាន់ខ្ពស់រុស្ស៊ី ដែលត្រូវបានចាប់ផ្ដើម តាំងពីឆ្នាំ២០១៣មកម្ល៉េះ ជាមួយកញ្ចប់ថវិការដ្ឋជាង១៩៧ លានដុល្លារ។

រថយន្តនេះប្រើម៉ាស៊ីន Turbocharged ចំណុះ ៤,៤ លីត្រ ដែលមានកម្លាំងប្រហែល ៦០០ សេះ និងមានប្រអប់លេខស្វ័យប្រវត្តិ ៩ វគ្គ។ ប្រវែងសរុបគឺ ៦៦២០ ម.ម និង មានទទឹង ២០០០ ម.ម ហើយមានកម្ពស់ពីដី ២០០ ម.ម។ ដោយសារជារថយន្តពាសដែក ហេតុនេះវាមានទម្ងន់ធ្ងន់ដល់ទៅ ៦,៥ តោនឯណោះ៕

ប្រភព៖ Kley Kley ប្រែសម្រួល៖ អឹុម ម៉េងស៊ាង