ស្វែងយល់ពី Saenchai និង Saensatharn ម្នាក់ណាស័ក្ដិសមនឹង សោភ័ណ្ឌ?

2018-07-24 05:09:14
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញ លោក ស.ដានឆ័យ អ្នកដឹកនាំកីឡាករថៃមកប្រកួតនៅកម្ពុជាបានប្រាប់ MSR Sport អំពីគម្រោងនាំយកជើងខ្លាំងគុនខ្មែរ រឿង សោភ័ណ្ឌ ទៅវ៉ៃ ក្នុងកម្មវិធី Thai Fight នៅទឹកដីថៃថ្ងៃទី២៥ សីហា ២០១៨ខាងមុខនេះដែលអាចជួបខ្លាចាស់កំពូលល្បិចថៃ សែនឆ័យ (Saenchai) ប៉ុន្តែ រឿង សោភ័ណ្ឌ បានប្រាប់ថា បើអាចចង់ជួប សែនស្ថាន (Saensatharn)ជាង។

កីឡាករថៃទាំងពីរនាក់នេះសុទ្ធតែមានកេរ្តិ៍ឈ្មោះល្បីដូចគ្នា និងជាជើងខ្លាំងលំដាប់ A របស់ប្រទេសថៃ។ ថ្ងៃនេះ Sabay លើកយកពីប្រវត្តិរបស់កីឡាករទាំងពីរឲ្យប្រិយមិត្តអ្នកទស្សនាយល់ឲ្យបានច្បាស់ថា តើម្នាក់ណាដែលស័ក្ដិសមជាដៃគូរបស់កំពូលអ្នកលេងគុនខ្មែរ រឿង សោភ័ណ្ឌ។

ខ្លាចាស់ Saenchai

Saenchai ប្រើក្បាច់ពិសេស

-អាយុ៣៧ឆ្នាំ កម្ពស់ ១.៦៨ម៉ែត្រ ទម្ងន់៦១គីឡូក្រាម។ -ចាប់ផ្តើមប្រដាល់៖ ចាប់ប្រដាល់តាំងពីឆ្នាំ១៩៨៨ដែលរហូតដល់ពេលនេះមានរយៈ២៨ឆ្នាំហើយ និងគ្រងខ្សែក្រវាត់ជាច្រើនស្ថាប័នលំដាប់ជាតិ អន្តរជាតិ។ ប្រហែលជាជិត៤០ប្រកួតចុងក្រោយ រូបគេឈ្នះរហូតគិតចាប់តាំងពីខែវិច្ឆិកា ឆ្នាំ២០១៤មក។ -ស្ថិតប្រកួត៖ ប្រកួតសរុប៣៣១ដង ឈ្នះ២៨៥ដង (ឈ្នះសន្លប់៣៥ដង) ចាញ់៤១ និងស្មើ៥ដង។ -ចំណុចខ្លាំង៖ បំឡាស់ទីលឿន និងចេញស្នៀតរហ័សប្រកបដោយបច្ចេកទេសពិតៗ។ -ចំណុចខ្សោយ៖ វ័យកាន់តែចាស់ កម្លាំងចុះខ្សោយ វ៉ៃពឹងផ្អែកលើបច្ចេកទេសទាំងស្រុង។ -ក្បាច់ពិសេស៖ ផ្តួលខ្លួនទាត់ផ្កាប់ចាន។

ជើងខ្លាំង Saensatharn

Saensathan ពេលកីឡាករប្រេស៊ីលធាក់ចូលមុខ

-អាយុ២៤ឆ្នាំ កម្ពស់ ១.៨៣ម៉ែត្រ ទម្ងន់ ៧៩គីឡូក្រាម -ចាប់ផ្ដើមប្រដាល់៖ ចាប់ប្រដាល់តាំងពីក្មេងតូច ដោយសារកាយសម្បទា និងកម្ពស់ខ្ពស់ធ្វើឲ្យក្លាយជាជើងខ្លាំងរហូតឈ្នះខ្សែក្រវាត់កម្រិតជាតិ និងអន្តរជាតិជាច្រើនក្លាយជាកីឡាករលំដាប់ A នៅថៃទាំងវ័យក្មេង។ -ស្ថិតប្រកួត៖ ឈ្នះ១៣០ដង ចាញ់២៩ដង និងស្មើ៥ដង។ -ចំណុចខ្លាំង៖ កម្លាំងខ្លាំង និងកម្ពស់ខ្ពស់ជាអំណោយផលល្អសម្រាប់រូបគេ។ -ចំណុចខ្សោយ៖ ចន្លោះប្រហោងផ្ទៃមុខពេលចូលវ៉ៃកៀក។ -ក្បាច់ពិសេស៖ ការវ៉ៃចេញកណ្តាប់ដៃប្រយោល និងចាប់ឡើងជង្គង់ជាអាវុធសម្លាប់គូប្រកួត។

រឿង សោភ័ណ្ឌ ទាត់ដៃគូក្នុងការប្រកួត Kun Khmer World

និយាយជារួម ជើងខ្លាំងចាស់វស្សា Saenchai មិនលើសខ្វះគ្នាប៉ុន្មានឡើយជាមួយរឿង សោភ័ណ្ឌ ទាំងទម្ងន់ កម្ពស់ និងកាយសម្បទា។ បើទោះជាគេមានបទពិសោធច្រើន បច្ចេកទេសល្អ ប៉ុន្តែកម្លាំងស៊ុហ្វអាចខ្សោយជាងរឿង សោភ័ណ្ឌ។ ចំណែក Saensatharn កំពុងឡើងជើងខ្លាំងដូចដែល រឿង សោភ័ណ្ឌ កំពុងឡើងជើងសព្វថ្ងៃនេះដែរ។ កីឡាករថៃម្នាក់នេះមានប្រៀបលើកីឡាករកម្ពុជាផ្នែកកាយសម្បទា និងកម្ពស់ ប៉ុន្តែបើនិយាយពីស្នៀតប្រយុទ្ធវិញមិនលើសខ្វះគ្នាប៉ុន្មានឡើយ។

អត្ថបទ៖ ជាន ចាន់រ៉ា