ចម្ងាយប៉ុណ្ណាល្អបំផុត ពេលមើលទូរទស្សន៍?

2018-07-28 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការអង្គុយមើលទូរទស្សន៍កៀកខ្លាំង មិនធ្វើឲ្យពិការភ្នែកនោះទេ តែអាចបង្កឲ្យភ្នែកមានសំពាធ (ប្រឹងមើល) និងអស់កម្លាំង នេះបើតាមអ្នកជំនាញផ្នែកភ្នែកពី CAO (Canadian Association of Optometrists)។

ភ្នែកមានសំពាធ និងអស់កម្លាំង រយៈពេលខ្លីមិនប៉ះពាល់ខ្លាំងនោះទេ តែរយៈពេលវែងអាចជាបញ្ហាឈានដល់ម៉ាញូកភ្នែក។ ចំពោះដំណោះស្រាយ មានភាពសាមញ្ញ គ្រាន់តែបិទភ្នែកសម្រាក គ្រប់យ៉ាងអាចត្រលប់មកធម្មតាបាន។

ពន្លឺសមរម្យសម្រាប់មើលទូរទស្សន៍ ការមើលទូរទស្សន៍ក្នុងស្ថានភាពពន្លឺមិនគ្រប់គ្រាន់ អាចបង្កបញ្ហាកាន់តែច្រើន កើនសំពាធដល់ភ្នែក។ ពន្លឺក្នុងបន្ទប់មើលទូរទស្សន៍ សំខាន់ណាស់ អ្នកខ្លះចូលចិត្តបន្ទប់ភ្លឺ ហើយខ្លះទៀតពេញចិត្តបន្ទប់ងងឹត។

ជាការណែនាំ គួរមើលក្នុងបន្ទប់មានបរិយាកាសពន្លឺសមរម្យ ដើម្បីបន្ធូរបន្ថយភ្នែកកុំឲ្យប្រឹងមើល និងឆាប់អស់កម្លាំង។ បន្ទប់ភ្លឺពេក ឬងងឹតពេក នឹងធ្វើឲ្យភ្នែកប្រឹងមើល ដើម្បីឃើញរូបភាពច្បាស់។ មួយវិញទៀត មិនគួរមើលទូរទស្សន៍ ដោយប្រើវ៉ែនតាការពារពន្លឺថ្ងៃនោះទេ។

ដំណោះស្រាយមួយទៀត អាចកាត់បន្ថយសំពាធដល់ភ្នែក ដោយមានពន្លឺជះពីក្រោយទូរទស្សន៍។

ចម្ងាយសមរម្យពីទូរទស្សន៍ យើងអាចអង្គុយមើលកៀកនឹងទូរទស្សន៍ HDTV ដោយសារភ្នែកអាចមើលផ្ទៃអេក្រង់ធំ ដែលខុសគ្នា ពេលមើលទូរទស្សន៍ចាស់ៗប្រភេទ Analog។

ជាការណែនាំ គួរមើលចម្ងាយពីទូរទស្សន៍ ដោយយកបណ្ដោយអេក្រង់ទូរទស្សន៍គុណនឹង ៥។ រីឯវិធីសាមញ្ញ ពេលមើលទៅភ្នែកប្រឹងពេក ឬឈឺភ្នែក អាចប្ដូរកន្លែង ធ្វើយ៉ាងណាល្មមអាចអានអក្សរយល់។

អាចអនុវត្តតាមរូបមន្ត ២០-២០-២០ ដែលសាកសមពេលមើលកុំព្យូទ័រ ឬទូរទស្សន៍។ មានន័យថា រាល់ ២០នាទី សម្រាក ២០វិនាទី និងបែរចក្ខុទៅអ្វីផ្សេងយ៉ាងហោចណាស់ចម្ងាយ ២០ហ្វីត៕