ឡើងសាហាវ ដេកក្នុងបន្ទប់ លេងតែហ្គេមសោះ អាចរកបានកន្លះលានដុល្លារក្នុងមួយខែ

2018-07-31 03:53:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងក្នុងកិច្ចសម្ភាសន៍៍ជាមួយសារព័ត៌មាន CNBC បុរសវ័យ ២៧ ឆ្នាំឲ្យឈ្មោះ Richard Tyler Blevins បានលួចបង្ហើបថាខ្លួនអាចរកចំណូលជាងកន្លះលានដុល្លារក្នុងមួយខែ តាមរយៈការផ្សាយផ្ទាល់វីដេអូលេងហ្គេម Fortnite ក្នុងបន្ទប់គេងរបស់លោក។ ជារបាយការណ៍ចុងក្រោយស្រង់ចេញកាលពីខែមិនាកន្លងទៅ ដោយកន្លងផុត ៥ ថ្ងៃ មានអ្នក Follow ជាមធ្យមកើន ៨៣ ០០០ នាក់លើគេហទំព័រ Twitch។

ជាប់ឈ្មោះជាជើងខ្លាំងមួយរូបជំនាញលេងវគ្គ Duos ជាមួយបុគ្គលម្នាក់ទៀតឲ្យឈ្មោះថា Drake ដោយអ្នកទាំងពីរត្រូវប្រឈមការតតាំងរវាងសត្រូវក្បែរមួយរយនាក់ក្នុងវគ្គតែមួយ ដើម្បីធ្វើការស្វែងរកធនធាន ក្នុងការសាងសង់ និងបាញ់សម្លាប់អ្នកដទៃ ហើយរកជើងខ្លាំងដែលអាចរស់បាននៅក្រោយគេបំផុត ក៏មិនខុសពីហ្គេមស្រដៀងគ្នានេះដូចជា PUBG និង ROS។

Blevins ធ្លាប់សង្កត់ធ្ងន់ថាចំណូល ៥០០ ០០០ ដុល្លារប្រចាំខែ ទទួលបានពី Subscribers ច្រើនជាង ១៦០ ០០០ នាក់ដែលបានចំណាយថវិកាទិញកញ្ចប់ទស្សនា ៥ ដុល្លារក្នុងមួយខែ (ដើម្បីមិនឲ្យលោតផ្ទាំងពាណិជ្ជកម្ម) នៃចំនួនសរុប ៤ លាននាក់គិតត្រឹមខែមិនា រហូតមកទល់ពេលនេះកើនដល់ជិត ១០ លាននាក់ ពោលចំណូលក៏នឹងកើនឡើងថែមទៀតផងដែរ។ ជាធម្មតារៀងរាល់ការចុចយកសេវាកម្មចំណាយ នោះអ្នកផ្សាយផ្ទាល់លើ Twitch នឹងទទួលបាន ៣,៥ ដុល្លារ/ម្នាក់។

យ៉ាងណាមិញនេះមិនរាប់បញ្ចូល Subscriber ប្រមាណ ១៥ លាននាក់ លើ YouTube នោះទេ មួយផ្សេងទៀត Ninja ក៏ត្រូវបានគេស្គាល់ថាអាចរកចំណូលពីម្ចាស់ឧបត្ថម្ភផ្តាច់មុខជាច្រើន តាំងតែពីរូបលោកបានបង្ហាញមុខលើប៉ុស្តិ៍ទូរទស្សន៍ជាតិ។

រំឭកថានាកិច្ចសម្ភាសន៍ជាមួយប្រភពដដែល Blevins បានដាស់តឿនឲ្យអ្នកទស្សនាឬអ្នកគាំទ្រទាំងអស់របស់ខ្លួន ថ្វីបើឃើញការរកលុយទាំងលានដុល្លារបែបនេះស្រួលក្តី ប៉ុន្តែលោកមិនណែនាំឲ្យបោះបង់ការងារ ឬការសិក្សានោះឡើយ ព្រោះដំបូងមុនបោះជំហានចូលក្នុងវិស័យហ្គេមមួយនេះ ក៏ខ្លួនលោកផ្ទាល់ធ្លាប់ជាបុគ្គលិកបម្រើការ អ្នកលេងកីឡាបាល់ទាត់ និងទៅសិក្សានៅសកលវិទ្យាល័យដូចគ្នា។ បុរសសញ្ជាតិអាមេរិកបញ្ចប់ថា៖ "អ្នកត្រូវឲ្យប្រាកដប្រជាពីអនាគតទៅថ្ងៃមុខ និងអាចចំណាយពេលផ្សេងបន្ថែមទៀតបើចង់ឲ្យរឿងរ៉ាវនេះក្លាយជាការពិត"។