“Mission: Impossible – Fallout” ជួយ Henry Cavill កាន់តែល្បីខ្លាំងនៅហូលីវូដមួយកម្រិតទៀត
- 2018-08-08 02:50:00
- ចំនួនមតិ 0 | ចំនួនចែករំលែក 0
“Mission: Impossible – Fallout” ជួយ Henry Cavill កាន់តែល្បីខ្លាំងនៅហូលីវូដមួយកម្រិតទៀត
ចន្លោះមិនឃើញ
តារាសម្ដែងសញ្ជាតិអង់គ្លេស Henry Cavill ឆ្លងកាត់ការតស៊ូជាច្រើននៅក្នុងវិស័យភាពយន្ត ទម្រាំមានឱកាសសម្ដែងជាតួអង្គ Superman នៅក្នុងរឿង "Man of Steel” កាលពីឆ្នាំ ២០១៣។ មុននឹងបានសម្ដែងតួអង្គនេះ Henry ឆ្លងកាត់ការហាត់យកសាច់ដុំយ៉ាងលំបាក ប៉ុន្តែការសម្ដែងជា Superman របស់លោកក៏មិនសូវទទួលបានការទទួលស្គាល់នៅហូលីវូដខ្លាំងនៅឡើយ ព្រោះតែបណ្ដាភាពយន្តរបស់ DC ទាំងនោះមិនទទួលបានភាពជោគជ័យខ្លាំង។ ថ្មីៗនេះ Henry បានបង្ហាញខ្លួននៅក្នុងភាពយន្ត "Mission: Impossible – Fallout” ដោយសម្ដែងជាតួអង្គសំខាន់មួយ ដែលតួអង្គនេះធ្វើឲ្យលោកទទួលបានការចាប់អារម្មណ៍ជាខ្លាំងពីបណ្ដាអ្នកស្រលាញ់វិស័យភាពយន្ត។
**នេះជាបណ្ដារឿងរ៉ាវខ្លះៗរបស់ Henry ចាប់ពីចូលប្រឡូកក្នុងវិស័យសិល្បៈ៖**
ចាប់ផ្ដើមបាន៥ឆ្នាំប៉ុន្តែនៅតែមិនសូវមានអ្នកស្គាល់
Henry កើតនៅទីក្រុង Jersey ចក្រភពអង់គ្លេស ដែលមានបងប្អូនប្រុសចំនួន៤នាក់ ហើយឪពុកម្ដាយលោកជាអ្នកធ្វើការធនាគារ។ កុមារភាពរបស់លោកគឺមិនមែនងាយស្រួលនោះទេ ដោយសារតែលោកមានរូបរាងធាត់ និងចូលចិត្តតែអានសៀវភៅ។ ពេលខ្លះ Henry ត្រូវគេធ្វើបាបនៅសាលាដោយ ដាក់ឈ្មោះក្រៅឲ្យលោកថា "Fatty Caviar”។
មិនត្រឹមតែប៉ុណ្ណោះ ពេលមកដល់វ័យជំទង់តារារូបនេះមានបញ្ហាជង្គង់ឈឺចាប់ ធ្វើឲ្យលោកមិនអាចលេងកីឡាផ្សេងៗបាន។ ដូច្នេះទើបលោកចំណាយពេលនៅតែឯងច្រើន និងជួនកាលមានអាការៈបាក់ទឹកចិត្ត។ ទោះបីជាគ្រួសារលោកមិនមានអ្នកណាមាននិស្ស័យក្នុងវិស័យសិល្បៈ Henry តែងតែចាប់អារម្មណ៍នឹងការសម្ដែង ដោយធ្លាប់ចូលរួមសម្ដែងក្នុងរឿងល្ខោនរបស់សាលាតាំងពីនៅវ័យក្មេង។ លោកធ្លាប់បញ្ជាក់កាលពីវ័យក្មេងថា បើសិនជាលោកមិនអាចក្លាយជាតារាសម្ដែងបាន លោកនឹងចូលបម្រើកងទ័ពឬទៅប្រទេសអេហ្សីបដើម្បីសិក្សាប្រវត្តិសាស្ត្របុរាណ។
តារារូបនេះទទួលបានឱកាសក្នុងការសម្ដែងពេលលោកមានវ័យ១៧ឆ្នាំ ដោយបានជួបជាមួយតារាសម្ដែងល្បីឈ្មោះ Russell Crowe។ ខណៈពេលនោះលោក Russell បានទៅសាលារៀនរបស់ Henry ដើម្បីថតរឿង "Proof of Life” ហើយពេលនោះ តារាជើងចាស់រូបនេះផ្ដល់ដំបូន្មានជាច្រើនដល់ Henry ចំពោះបញ្ហាផ្សេងៗជុំវិញអាជីពជាអ្នកសម្ដែង។
ក្រោយមក Henry ក៏ចាប់ផ្ដើមប្រឡូកក្នុងវិស័យសម្ដែងយ៉ាងពេញទី រហូតមានឱកាសសម្ដែងជាមួយលោក Russell Crowe តែម្ដងក្នុងរឿង "Man of Steel” កាលពីឆ្នាំ ២០១៣។ នេះមិនមែនជាការងាយស្រួលនោះទេ ដោយលោកបានចាប់ផ្ដើមក្នុងអាជីពនេះតាំងពីឆ្នាំ ២០០២។ តួអង្គដែលធ្វើឲ្យមានការទទួលស្គាល់ច្រើនគឺតួអង្គ Duke of Suffolk ឈ្មោះ Charles Brandon ក្នុងរឿងភាគ "The Tudors” បញ្ចាំងឆ្នាំ ២០០៧ ដល់ ២០១០។ ដូច្នេះគឺលោកចំណាយពេលអស់រយៈពេល ៥ឆ្នាំតាំងពី ២០០២ ដល់ ២០០៧ ជាតារាសម្ដែងមិនសូវមានអ្នកស្គាល់។
លោកជាតារាសម្ដែងដែលមិនសូវលេចធ្លោនៅហូលីវូដ
ទោះជាល្បីឈ្មោះនៅក្នុងរឿងភាគនេះក៏ដោយ Henry មិនសូវជាទទួលបានភាពជោគជ័យក្នុងការសម្ដែងរឿងខ្នាតធំប៉ុន្មាននោះឡើយ។ ជាមួយរូបរាងស្រស់សង្ហាដូច្នេះ មនុស្សជាច្រើនបាននិយាយថា Henry Cavil មិនមានសំណាងល្អក្នុងអាជីពជាតារាសម្ដែងទាល់តែសោះ។ មិនត្រឹមតែប៉ុណ្ណោះតារារូបនេះបាត់បង់ឱកាសជាច្រើនក្នុងការសម្ដែងជាតួអង្គល្បីៗ តួយ៉ាងលោកបានត្រូវគេជ្រើសរើសឲ្យសម្ដែងជាតួអង្គ Superman កាលពីឆ្នាំ ២០០៤ ក្នុងរឿង "Superman Return” បញ្ចេញឆ្នាំ ២០០៦ ប៉ុន្តែលោកត្រូវបានជំនួសដោយតារាសម្ដែង Brandon Routh។ ក្រោយមកលោកក៏បាត់បង់ឱកាសសម្ដែងជាតួអង្គ ០០៧ ក្នុងរឿង "Casino Royale” ជំនួសដោយតារាសម្ដែង Daniel Craig។ មិនត្រឹមតែប៉ុណ្ណោះលោកក៏បាត់បង់ឱកាសសម្ដែងក្នុងរឿង "Harry Potter” និង "Twilight” ទៀតផង។
“Mission: Impoossible – Fallout” ធ្វើឲ្យ Henry Cavill មានភាពល្បីល្បាញខ្លាំងជាងមុន
បន្ទាប់ពីសម្ដែងជាតួអង្គស៊ើបអង្កេតក្នុងរឿង "The Man from UNCLE” ឆ្នាំ ២០១៥ តារារូបនេះត្រូវបានគេទទួលស្គាល់ថាមានសមត្ថភាពសម្ដែងជាតួអង្គក្នុងរឿងប្រភេទនេះបានល្អ រហូតធ្វើឲ្យលោកមានឱកាសសម្ដែងក្នុងរឿង "MI6”។ ជាមួយនឹងរូបរាងសង្ហារនិងមុខមាត់ដ៏ស្រស់ស្អាត Henry បានធ្វើឲ្យទស្សនិកជនជាច្រើនឈ្លក់វង្វេង និងចាប់អារម្មណ៍ចំពោះការសម្ដែងរបស់លោកជាខ្លាំង។
ទស្សនាវដ្ដី Entertainment Weekly បាននិយាយថា "Mission: Impossible – Fallout” បានបើកឱកាសឲ្យ Henry គេចផុតពីការជាប់អន្ទាក់ក្នុងការសម្ដែងជាតួអង្គ Superman ឲ្យបានក្លាយជាតារាលំដាប់កំពូលក្នុងហូលីវូដ។ សូម្បីតែ Henry ផ្ទាល់ខ្លួនក៏ទទួលស្គាល់ថា តួអង្គនេះបានផ្លាស់ប្ដូរខ្លួនឯងជាច្រើនដូចគ្នា។ ដូច្នេះថាមិនត្រូវលើកនេះលោកនឹងមានឱកាសសម្ដែងជាតួអង្គសំខាន់ក្នុងសេរីរឿង ០០៧ ជំនាន់ថ្មី និងរឿងហូលីវូដលំដាប់កំពូលជាច្រើនទៀត៕