ទូរសព្ទ (Cellphone) និងស្មាតហ្វូន (Smartphone) ខុសគ្នាដូចម្ដេច?

2018-08-30 08:14:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាតហ្វូន ឬទូរសព្ទវ័យឆ្លាត ជាទូរសព្ទចល័ត មានមុខងារ និងបំពាក់បច្ចេកវិទ្យាល្អៗបន្ថែម។ បើនិយាយឲ្យស្រួល ស្មាតហ្វូនជាប្រភេទទូរសព្ទចល័ត ប៉ុន្តែទូរសព្ទចល័ត មិនវ័យឆ្លាតនោះទេ។

ស្មាតហ្វូនអាចអនុវត្តការងារ បានច្រើនជាងត្រឹម ការហៅចេញ និងទទួលការហៅចូល មានកម្មវិធីប្រើបន្ថែមស្ទើររាប់មិនអស់ រួមមានហ្គេម កម្មវិធីកាត់ត ផែនទី កម្មវិធីគ្រប់គ្រងសាច់ប្រាក់ និងជម្រើស Web Browser ជាច្រើន។ ក្នុងនោះក៏មានបញ្ចូល ប្រព័ន្ធជំនួយដូចជា Siri របស់ iPhone អាចទទួលបញ្ជាបំពេញការងារលើប្រព័ន្ធទូរសព្ទ ដោយសំឡេង។

ទូរសព្ទចល័ត អាច ហៅចេញ ទទួលការហៅចូល និងផ្ញើសារជាអក្សរបាន ខណៈ ស្មាតហ្វូនបំពេញការងារបានច្រើនជាងនេះ អាស្រ័យលើប្រព័ន្ធប្រតិបត្តិការ (Operating System)។

ទូរសព្ទចល័ត និងស្មាតហ្វូនសុទ្ធតែមានប្រព័ន្ធប្រតិបត្តិការ។ កុំព្យូទ័រប្រើ Windows, macOS ឬ Linux ខណៈ ប្រព័ន្ធប្រតិបត្តិការរបស់ស្មាតហ្វូន មាន iOS ឬ Android និងច្រើនទៀត។ ប្រព័ន្ធរបស់ទូរសព្ទចល័ត មិនមានអ្វីច្រើនប្រើនោះទេ មានជម្រើសតិចតួចបំផុត។

បើចង់ប្រើទូរសព្ទត្រឹមហៅចេញ និងទទួលការហៅចូល ទូរសព្ទ ឬស្មាតហ្វូន អាចបំពេញការងារនេះបាន។ រីឯ តម្លៃទូរសព្ទចល័តធូរថ្លៃជាង ស្មាតហ្វូនឆ្ងាយដែរ ប៉ុន្តែសមត្ថភាពបំពេញការងារក៏ទៅតាមនោះដែរ៕