៥ ចំណុច កុំភ្លេចធ្វើឲ្យសោះ បើគិតច្បាស់ ចង់លុបគណនី Facebook ចោល

2018-09-05 04:11:10
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនថា ទាក់ទងនឹងព័ត៌មាន Facebook គ្រប់គ្រងទិន្នន័យអ្នកប្រើប្រាស់មិនបានល្អ ហត់នឿយនឹងអូសមើលព័ត៌មាន ឬអស់អារម្មណ៍ជាមួយបណ្ដាញសង្គមយក្សមួយនេះ បើចង់អាចលុបគណនីចោលបាន។

ការលុបគណនី និងការបិទ (Deactivate) គណនី មានភាពខុសគ្នា ដោយការបិទ អាចបើកពេលចង់ចូលប្រើវិញ ប៉ុន្តែបើលុបហើយ មិនអាចចូលប្រើគណនីនោះបានទេ។

១) ពិនិត្យមើលមានកម្មវិធីប៉ុន្មានបានភ្ជាប់ប្រើជាមួយគណនីនេះ

មានកម្មវិធី និងវេបសាយជាច្រើន ប្រហែលបាន Log in ចូលដោយប្រើគណនី Facebook ហើយពេលលុបគណនី មិនអាចចូលទំព័រទាំងនេះបានទេ។

អាចពិនិត្យបាន ដោយចុចលើ Account Settings > Apps and Websites នៅផ្នែកខាងឆ្វេង។ កម្មវិធីមួយចំនួន ប្រហែលអាចផ្លាស់ប្ដូរបែបបទ Log in ដោយប្រើអ៊ីមែលជំនួសវិញ ប៉ុន្តែក៏មានវេបសាយខ្លះ មិនអាចផ្តាច់ពីគណនី Facebook បាននោះទេ ដូចជា Spotify។

ករណីបានបិទគណនី Facebook មិនអាចចូលប្រើ វេបសាយ ឬកម្មវិធីបានភ្ជាប់មកពីមុន អាច Reactivate គណនី Facebook រួចធ្វើការកែប្រែ។

២) ទាញយកព័ត៌មានពី Facebook

សម្រាប់អ្នកប្រើប្រាស់ចង់លុបគណនី Facebook ប៉ុន្តែនៅតែចង់បានរាល់ទិន្នន័យមានលើវេបសាយកន្លងមក អាចទាញយកបាន ដោយចូលទៅកាន់ Account Settings > Your Facebook Information នៅផ្នែកខាងឆ្វេង > Download Your Information បន្ទាប់មកជ្រើសរើសប្រភេទព័ត៌មានចង់បាន ដូចជា បញ្ជីទំនាក់ទំនងមិត្តភក្ដិ ឬអ្វីៗបានបង្ហោះកន្លងមក > ចុចប៊ូតុង Create File។

៣) ស្នើយកទិន្នន័យថ្ងៃកំណើតរបស់មិត្តភក្ដិ

បើចង់លុបគណនី Facebook ប៉ុន្តែចង់ចងចាំថ្ងៃកំណើតរបស់មិត្តភក្ដិនានា អាចប្រើកម្មវិធី Facebook Birthday ក្នុងការជួយប្រមូលរាល់ទិន្នន័យនេះ។

៤) ស្នើយកទិន្នន័យទំនាក់ទំនង

មុនពេលលុប ប្រាកដថាបានទាញយក និងរក្សាទុកព័ត៌មានទំនាក់ទំនងជាមួយមិត្តភក្ដិ តាមអ៊ីមែល សារ ឬការហៅចេញ។

៥) រក្សាទុកព័ត៌មាន Facebook លើ Cloud

Backupify.com ផ្តល់វិធីអាចរក្សាទុកទិន្នន័យអ្នកប្រើប្រាស់ពីវេបសាយលើ Cloud បាន ដោយទំហំរក្សាទុក 1GB ប្រើបានឥតគិតថ្លៃ ហើយចង់បានធំជាងនេះ ត្រូវចំណាយថវិកា៕