តារាម៉ូដែលប្រចាំកម្មវិធី "Thailand's Next Top Model” បានធ្វើអត្តឃាត ដោយលោតពីលើអគារ
- 2018-09-12 02:10:59
- ចំនួនមតិ 0 | ចំនួនចែករំលែក 0
តារាម៉ូដែលប្រចាំកម្មវិធី "Thailand's Next Top Model” បានធ្វើអត្តឃាត ដោយលោតពីលើអគារ
ចន្លោះមិនឃើញ
កាលពីថ្ងៃទី ០៨ ខែកញ្ញាកន្លងទៅ ក្រុមប៉ូលិសក្នុងស្រុក Chok Chai នៃខេត្ត Nakhon Ratchasima បានទទួលព័ត៌មានមួយពាក់ព័ន្ធនឹងគ្រោះថ្នាក់មានមនុស្សធ្លាក់ពីលើអគារវីឡាកម្ពស់ ៣ជាន់ក្នុងស្រុកខាងលើនេះ។
ភ្លាមៗ ខាងក្រុមប៉ូលិសក៏បានទៅដល់កន្លែងកើតហេតុ និងប្រទះឃើញសាកសពស្ត្រីម្នាក់ដែលបានស្លាប់ ដោយមានរបួសក្បាលធ្ងន់ធ្ងរ។ បើតាមការស៊ើបអង្កេតរបស់ប៉ូលិសបានបញ្ជាក់ថា សាកសពស្ត្រីរូបនោះ មានឈ្មោះ Kay Kanyakorn អាយុ ៣០ ឆ្នាំ ជាតារាម៉ូដែលដ៏ល្បីម្នាក់ប្រចាំប្រទេសថៃ ហើយនាងក៏ធ្លាប់ឈ្នះការប្រកួតកម្មវិធី "Thailand's Next Top Model” ផងដែរ។
ប៉ូលិសក៏បានរកឃើញថ្នាំសម្លាប់សត្វល្អិតមួយដបនៅក្នុងបន្ទប់ទឹករបស់នាង ដោយដបថ្នាំនោះដូចជាត្រូវបានបើកគម្របចោល ដូច្នេះហើយតាមការប៉ាន់ស្មានបឋម ប៉ូលិសដាក់ការសង្ស័យថា ជនរងគ្រោះបានផឹកថ្នាំនោះ មុនពេលលោតសម្លាប់ខ្លួនពីលើអគារ។
បន្ថែមពីនេះទៅទៀត បើតាមមិត្តភ័ក្ដិម្នាក់របស់ជនរងគ្រោះបានប្រាប់ផងដែរថា៖ "មុនពេលកើតហេតុ Kay ជាញឹកញាប់ ជួបបញ្ហាស្មុគស្មាញច្រើនណាស់ក្នុងជីវិតរបស់នាង ជាពិសេសបញ្ហាមុខជំនួញតែម្ដង ដែលពាក់ព័ន្ធនឹងផ្លូវច្បាប់ថែមទៀត លើទីផ្សារភាគហ៊ុន"។
ទោះជាយ៉ាងណាក៏ដោយ ខាងក្រុមប៉ូលិសនៅតែបន្តស៊ើបអង្កេតពីមូលហេតុច្បាស់លាស់ដែលបណ្ដាលឲ្យតារាស្រីរូបនេះស្លាប់ ហើយរហូតមកទល់ពេលនេះ មិនទាន់រកឃើញលទ្ធផលបញ្ជាក់ពីស្លាប់ជាផ្លូវការនៅឡើយទេ៕