ប៉ះណាហ្គាវើល ក្រុមក្រសួងការពារជាតិ នឹងប្រើកីឡាករខ្មែរឱ្យច្រើន
- 2018-09-14 06:45:00
- ចំនួនមតិ 0 | ចំនួនចែករំលែក 0
ប៉ះណាហ្គាវើល ក្រុមក្រសួងការពារជាតិ នឹងប្រើកីឡាករខ្មែរឱ្យច្រើន
ចន្លោះមិនឃើញ
លោក ភា សុភក្ត្រា គ្រូបង្វឹកក្រុមក្រសួងការពារជាតិបានបញ្ជាក់ថាប៉ះណាហ្គាវើលនៅថ្ងៃស្អែកនេះ នឹងដាក់កីឡាករកម្ពុជាលេងឱ្យបានច្រើន ដើម្បីជាការសមជើង ត្រៀមលេងពានរង្វាន់ Hun Sen Cup វគ្គផ្ដាច់ព្រ័ត្រ។
ក្រុមណាហ្គាវើល នឹងត្រូវប៉ះ ជាមួយក្រុមក្រសួងការពារជាតិ នៅថ្ងៃស្អែកនេះ វេលាម៉ោង៣រសៀល នៅកីឡដ្ឋានស្អាតចាស់។ ដោយនេះជាការប្រកួតលីគកំពូលកម្ពុជាសប្ដាហ៍ទី២០ហើយ។ ណាហ្គាវើលកំពុងឈរនៅកំពូលតារាងលីគកំពូល ត្រូវការឈ្នះប្រកួតនេះដាច់ខាត ខណៈដែលក្រសួងការពារជាតិ វិញអស់ឱកាសប្រជែងយកពានលីគកំពូលនេះទៅហើយ។
លោក ភា សុភក្ត្រា ដែលជាគ្រូបង្វឹកក្រុមទ័ព បានលើកឡើងថាលោកនឹងរៀបចំប្រព័ន្ធលេងឱ្យបានល្អបំផុត ដើម្បីទទួលបានលទ្ធផលល្អ។ ទន្ទឹមគ្នានឹងនោះដែរ លោកក៏បានបន្ថែមទៀតថា ប្រកួតនេះ នឹងដាក់កីឡាករកម្ពុជាលេងឱ្យបានច្រើនបន្តិច ព្រោះដើម្បីឱ្យពួកគេយល់ចិត្តគ្នាកាន់តែខ្លាំង ត្រៀមលេងផ្ដាច់ព្រ័ត្រពាន Hun Sen Cup ជាមួយក្រុមប៉ូលិសនៅថ្ងៃទី៦ខែក្រោយ។
លោក បន្ដទៀតថា ប្រសិនបើប្រើកីឡាករខ្មែរច្រើន ហើយឈ្នះណាហ្គាវើលទៀត នោះក្រុមរបស់លោកមានភាគរយកាន់តែខ្ពស់ហើយក្នុងការយកពានរង្វាន់ Cup នារដូវកាលនេះ។ ដោយពានលីគនៅសល់៣ប្រកួតនេះ ក្រសួងការពារជាតិនឹងផ្ដល់ឱកាសឱ្យកីឡាករខ្មែរលេងបានច្រើនបំផុត តាមតំបន់ទាំងអស់៕