រឿងខ្នាតខ្លី ដឹកនាំដោយនារីវ័យក្មេង មានវត្តមានក្នុងមហោស្រពភាពយន្តអន្តរជាតិ ប៊ូសាន

2018-09-27 04:47:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយទទួលបានការគាំទ្រឧបត្ថម្ភពីសាធារណៈ ក្នុងគម្រោង «សំឡេងពីអនាគត» លើបណ្ដាញ Indiegogo រៀបចំដោយ Anti-Archive ជួយដល់អ្នកដឹកនាំរឿងនារីវ័យក្មេង ៣ រូប ក្នុងទឹកប្រាក់ប្រមាណជាង ១៧ ០០០ ដុល្លារ ដើម្បីផលិតខ្សែភាពយន្ត ៣ ចំណង និងជាប្រភេទខុសៗគ្នា។

អ្នកដឹកនាំរឿង សាន ដានិច

ក្នុងចំណោមខ្សែភាពយន្តទាំង ៣ មានខ្សែភាពយន្តមួយរបស់ កញ្ញា សាន ដានិច ដែលបានផលិតមុនគេ និងជាភាពយន្តបែប Fiction ខ្នាតខ្លី មានចំណងជើងថា «១លាន ឆ្នាំ» ឬ A Million Years សម្តែងដោយកញ្ញា ថាច់ ម៉ារី បានជាប់ជម្រើសក្នុងការបង្ហាញវត្តមាននៅប្រទេស កូរ៉េខាងត្បូង ក្នុងកម្មវិធីមហោស្រពភាពយន្តអន្តរជាតិប៊ូសាន ឬ Busan International Film Festival (BIFF) ក្នុងខែ តុលា ឆ្នាំ ២០១៨ នេះហើយ។

រូបភាពពីរឿង «១លាន ឆ្នាំ» ឬ A Million Years សម្តែងដោយ កញ្ញា ថាច់ ម៉ារី

នេះជាលើកទី១ របស់អ្នកដឹកនាំវ័យក្មេង សាន ដានិច វ័យ ២៦ឆ្នាំ ដឹកនាំរឿងដែលសរសេរ និងតែងនិពន្ធដោយខ្លួនឯង ហើយទទួលបានឱកាសចាក់បញ្ចាំងនៅក្នុងមហោស្រពអន្តរជាតិថែមទៀតផង។

រីឯ ភាពយន្ត ២ ចំណងជើងទៀត ដឹកនាំដោយអ្នកនាង មាស ស្រីលីន និងកញ្ញា ទិត្យ កន្និដ្ឋា ដែលស្ថិតក្នុងគម្រោង «សំឡេងពីអនាគត» ដូចគ្នា ក៏កំពុងផលិត ដោយសង្ឃឹមឱកាសបង្ហាញវត្តមានលើមហោស្រពភាពយន្តអន្តរជាតិនានាដែរ៕