តោះ! ដឹងពីចំណាប់អារម្មណ៍របស់ឪពុក សុខ ធី វិញម្ដង

2018-11-16 07:52:02
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈពេលចុងក្រោយនេះ នៅតាមបណ្ដាញសង្គមហ្វេសបុក ក៏ដូចជាសារព័ត៌មានច្រើនលើកឡើងអំពីការហ្វឹកហាត់ ការតាំងចិត្ត ការត្រៀមខ្លួន និងចំណាប់អារម្មណ៍កីឡាករផ្ទាល់ ឬគ្រូបង្វឹករបស់ សុខ ធី។ ឥលូវនេះមកដឹងពីអារម្មណ៍ឪពុករបស់កីឡាកររូបនេះវិញម្ដង ទាក់ទិនទៅនិងការប្រកួតស្អែកនេះប៉ះ ឡឺតសិលា។

សុខ ធី អោបឪពុកម្ដាយ មុនចេញទៅឥណ្ឌូណេស៊ី

លោក សុខ ញិល បានឲ្យដឹងថា ការប៉ះគ្នាជាមួយ ឡឺតសិលា លើកទី២នេះ លោកមិនមានការបារម្ភអ្វីនោះទេ ព្រោះអីឃើញកូនហ្វឹកហាត់បានល្អ និងយូរ។ កីឡាប្រដាល់នេះសំខាន់លើការហាត់នេះឯង បើនរណាហាត់បានល្អ ពេលប្រកួតក៏ល្អដូចគ្នា។

ឪពុករបស់ សុខ ធី ខាងលើនេះបន្ថែមថា លើកនេះសង្ឃឹមច្រើនថានឹងអាចទទួលបានជ័យជម្នះនាជំនួបមិត្តភាពអន្តរជាតិនៅឥណ្ឌូណេស៊ីនេះ ព្រោះបើប្រៀបធៀបនិងលើកមុននេះ គឺហាត់ល្អជាងឆ្ងាយណាស់។ លោកក៏សំណូមពរដល់មហាជនទាំងអស់ឲ្យជួយគាំទ្រការប្រកួតមួយនេះ ដោយសារជាការប្រកួតតំណាងឲ្យប្រទេសកម្ពុជា។

សុខ ធី និងឪពុកម្ដាយ

រំលឹកដែរថា អ្នកលេងគុនខ្មែរ សុខ ធី នឹងត្រូវឡើងសង្វៀននៅឯប្រទេសឥណ្ឌូណេស៊ី នាថ្ងៃស្អែកនេះជាមួយខ្លាចាស់របស់ថៃ ឡឺតសិលា ជាលើកទី២ក្នុងកម្មវិធី One Championship ចាប់ពីម៉ោង៥ល្ងាចតទៅ៕

អត្ថបទ៖ នួន ស៊ីណា