ធ្ងន់ធ្ងរ! មានតាំងពី PUBG/Fortnite និងហ្គេមល្បីៗច្រើនទៀត ប្រឈមនឹងការបិទចោលក្នុងប្រទេសចិន

2018-12-13 11:41:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ហ្គេមល្បីឈ្មោះជាច្រើនធ្លាប់ដាក់ឲ្យប្រកួតក្នុងកីឡាអេឡិចត្រូនិក esport មានដូចជា League of Legends (LoL), Overwatch, PlayerUnknown's Battlegrounds (PUBG) និង Fortnite កំពុងប្រឈមនឹងការហាមឃាត់ក្នុងប្រទេសចិន បន្ទាប់ពីរកឃើញថាមានរំលោភលើច្បាប់សង្គមនិងក្រមសីលធម៌។

ការហាមប្រាមនេះធ្វើឡើងបន្ទាប់ពីមានការចេញផ្សាយនូវគណៈកម្មាធិការត្រួតពិនិត្យ Online Ethics Review Committee ដោយរដ្ឋាភិបាលប្រទេសចិនកាលពីដើមខែធ្នូ ឈរលើគោលដៅត្រួតពិនិត្យរាល់ហ្គេម Online ដើម្បីប្រាកដថាពុំមានល្មើសលើច្បាប់សង្គមត្រង់ប្រការណាមួយ។

ក្នុងបណ្តាហ្គេម Online ធំៗទាំង ២០ នោះ មាន ១១ ត្រូវបានចាត់វិធានការឲ្យកែតម្រូវជាបន្ទាន់ (Corrective Action) សោតយ៉ាងមានដូចជាហ្គេម LoL, Overwatch, Diablo និង WoW ស្ថិតក្រោមការអភិវឌ្ឍដោយក្រុមហ៊ុន Blizzard Entertainment។ តាមលទ្ធផលត្រួតពិនិត្យចេញផ្សាយលើ Reddit បានឲ្យដឹងថាភាគច្រើននៃហ្គេមទាំងនោះល្មើសលើគោលការណ៍ បង្ហាញអាក្រាតតួអង្គស្រីជ្រុល និង Chatroom ពោរពេញដោយការនិយាយពាក្យមិនសមរម្យទាក់ទងនឹងការបំពុលសង្គមនិងផ្នែកនយោបាយ។

ដោយឡែកហ្គេម ៩ ផ្សេងទៀតដែលប្រឈមនឹងការបិទចោល ក្នុងនោះមានហ្គេមល្បីឈ្មោះដូចជា PUBG, Fortnite, H1Z1 និង Ring of Elysium ល្មើសលើគោលការណ៍ដែលមានការបង្ហូរឈាមនិងមាតិកាអាសអាភាស។

រំឭកថាច្បាប់ត្រួតពិនិត្យថ្មីនេះក៏ជះឥទ្ធិពលខ្លាំងបំផុតដល់ក្រុមហ៊ុនយក្សប្រទេសចិន ២ រួមមាន Tencent និង NetEase ដោយសម្រាប់ Tencent គឺប៉ះពាល់ធ្ងន់បំផុត ព្រោះមានកាន់ភាគហ៊ុនក្នុងហ្គេម PUBG, LoL, Paladins និងហ្គេមបីទៀតក្នុងចំណោមហ្គេមទាំង ២០។