World Kun khmer និង Khmer Fight ធ្វើឲ្យអ្នកតាមដានប្រដាល់មួយចំនួនចង់វិលមុខ

2019-01-03 03:33:52
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈពេលប៉ុន្មានថ្ងៃចុងក្រោយនេះទាក់ទិនទៅនិងកម្មវិធីប្រដាល់៣ផ្សេងគ្នា ធ្វើឲ្យអ្នកតាមដានវិស័យកីឡាមួយចំនួនចែកមិនដាច់ និងភាន់ច្រឡំ ដោយសារតែខាងកម្មវិធីមិនបានផ្សព្វផ្សាយឲ្យច្បាស់ថាកម្មវិធីមួយណាចាប់ផ្ដើមប្រកួតពីថ្ងៃណាដល់ថ្ងៃណា និងមានកីឡាកររូបណាដែលប្រកួតខ្លះ ប្រកួតក្នុងន័យអ្វី។

បើមែនទែនទៅមានមហាជនក៏ដូចជាអ្នកតាមដានប្រដាល់មួយចំនួនយល់ច្រឡំថាកម្មវិធីប្រដាល់ដែលធ្វើឡើងរយៈពេល៥ថ្ងៃ បន្តបន្ទាប់គ្នានេះគឺជាកម្មវិធីប្រដាល់តែមួយ។ ប៉ុន្តែមិនដូច្នោះនោះឡើយ ពោលគឺមានកម្មវិធីប្រដាល់ចំនួន៣ផ្សេងគ្នា។ ការផ្សព្វផ្សាយមិនបានទូលំទូលាយ ឬធ្វើសន្និសីទសារព័ត៌មានមុនការប្រកួតធំៗនេះហើយជាហេតុធ្វើឲ្យអ្នកតាមដានយល់ច្រឡំ។

ទី១ World Kun Khmer គឺគេប្រកួតចាប់ពីថ្ងៃទី២៨-៣០ ខែធ្នូ ជាការប្រកួតដែលរៀបចំដោយសហព័ន្ធប្រដាល់គុនខ្មែរពិភពលោក សហការជាមួយសហព័ន្ធប្រដាល់គុនខ្មែរ ហើយនេះជាការប្រកួតលើកទី២ ដែលសហព័ន្ធទាំងនេះបានរៀបចំរួចម្ដងហើយកាលពីចុងឆ្នាំ២០១៧។ ការប្រកួតនេះដែរក៏ជាការអបអរក្នុងពិធីសម្ពោធវិមានឈ្នះឈ្នះ។

World kun khmer

**ទី២ ពានរង្វាន់ TV5** ទម្ងន់៥៧គីឡូក្រាម កម្មវិធីប្រកួតមួយនេះជាទូទៅគឺប្រកួតរៀងរាល់ថ្ងៃសៅរ៍នោះទេ ប៉ុន្តែត្រូវបានលើកពេលមកប្រកួតថ្ងៃចន្ទ ទី៣១ ដែលជាថ្ងៃឆ្លងឆ្នាំទៅវិញ ចំណែកម៉ោងប្រកួតនោះចន្លោះពីម៉ោង៥ល្ងាចតទៅ។ កីឡាករដែលជាបេក្ខភាពប្រកួតជម្រុះដណ្ដើមពានក៏ត្រូវឡើងប្រកួតចាញ់ធ្លាក់ជាធម្មតា។

សៀវ ង៉ុយ ឈ្នះឡើងទៅជុំទី៣ ពានរង្វាន់ TV5

ទី៣ កម្មវិធី Khmer Fight ជាការប្រកួតថ្មី១ទៀតដែលទើបលេចរូបរាងឡើងក្នុងថ្ងៃឆ្លងឆ្នាំនោះដែរ ពោលគឺចាប់ផ្ដើមបន្តពីការប្រកួតពានរង្វាន់ TV5 រួច ចន្លោះពីម៉ោង ៨យប់តទៅ។ បើតាមការផ្សព្វផ្សាយតាមសារព័ត៌មានមួយចំនួនកម្មវិធីប្រដាល់នេះជាការសហការគ្នារវាងគណៈកម្មការជាតិអូឡាំពិកកម្ពុជា និងស្ថានីយទូរទស្សន៍ប៉ុស្តិ៍លេខ៥។ ចំពោះការប្រកួតកម្មវិធីខាងលើនេះ គឺគូបរទេសជាមួយខ្មែរភាគច្រើនជាកីឡាករខ្លាំងៗជួរមុខរបស់កម្ពុជាតែម្ដង។