មកមើលវីដេអូ Ford F-350 អូស Tundra ជាប់ផុង ស្ដែងៗយ៉ាងផុយ!

2019-01-04 03:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Toyota Tundra ជារថយន្តប្រភេទ Pick-Up ដែលមានមាឌធំកម្លាំងខ្លាំងក្លា ដែលមានអ្នកនិយមជិះច្រើនមិនថានៅក្នុងពិភពលោក ឬក៏នៅក្នុងស្រុកយើងឡើយ ដោយសារតែសមត្ថភាពជិះបានសឹងគ្រប់ផ្លូវ មិនព្រួយបារម្ភពីការជាប់ផុង ឬក៏បញ្ហាគ្រឿងក្រោមច្រើនឡើយ។

វាពិតជាងាយណាស់សម្រាប់រថយន្ត Pick-Up ក្នុងការបើកបរក្នុងស្ថានភាពផ្លូវភក់ ដោយសារតែវាមានតួខ្ពស់ ប៉ុងពីរ ហើយមានកម្លាំងខ្លាំង ប៉ុន្តែចំពោះស្ថានភាពផ្លូវខ្លះដែលលំបាកខ្លាំងមែនទែន មានតែ Pick-Up ពិសេស ដែលបានកែតម្រូវតាមស្ថានភាពផ្លូវប៉ុណ្ណោះ ដូចជាការលើកតួរថយន្តឲ្យកាន់តែខ្ពស់ ការដូរប្រភេទសម្បកកង់ និងកម្លាំងម៉ាស៊ីនគ្រប់គ្រាន់ ទើបអាចស៊ូទ្រាំជាមួយផ្លូវដ៏លំបាកបែបនោះបាន។

ជាក់ស្ដែង ក្នុងវីដេអូមួយនេះបានបង្ហាញពីការជាប់ផុងរបស់រថយន្តមហាកម្លាំង Toyota Tundra ឆ្នាំ ២០១៩ ដែលមានម៉ាស៊ីនប្រភេទ V ស៊ីឡាំង ៨ ទំហំ ៥,៧ លីត្រ មានកម្លាំង ៣៨១ សេះ និងមានកម្លាំងរមួល ៥៤៣ ញ៉ូតុនម៉ែត្រ (Nm)។ ឃើញថាទោះបីជា Tundra នេះ មានបំពាក់ឈុត TRD Off-Road យ៉ាងណាក៏ដោយ ក៏មិនអាចដកខ្លួនចេញពីផ្លូវភក់ដែលជាប់ផុងនោះបានដែរ។

យ៉ាងណាមិញ រថយន្ត Pick-Up មួយគ្រឿងទៀតបានចូលខ្លួនមកជួយរំដោះ Tundra ចេញពីផ្លូវភក់នោះបាន។ វាមិនមែនជា Tundra ឬក៏ Tacoma ដែលជា Pick-Up របស់ Toyota ទេ តែវាគឺជារថយន្ត Ford F350 ឆ្នាំ ២០១៨ ដែលប្រើម៉ាស៊ូត មានម៉ាស៊ីនប្រភេទ V8 Turbo ទំហំ ៦,៧ លីត្រ ដែលមានកម្លាំង ៤៥០ សេះ និងកម្លាំងរមួលដល់ទៅ ១ ២៦៧ Nm។ មើលតាមវីដេអូនេះ Ford F350 អាចអូស Tundra ចេញពីផ្លូវភក់ដែលជាប់ផុងនោះបានយ៉ាងផុយ ទោះបីជា Ford F350 នោះបញ្ចេញផ្សែងច្រើនបន្តិចក៏ដោយ។