ចេញពិន្ទុវាយតម្លៃកម្លាំងម៉ាស៊ីន Galaxy S10+ ប្រើឈីប Snapdragon 855 និង RAM 6GB

2019-01-17 13:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិន្នន័យចុងក្រោយបង្អស់ត្រូវបានចុះផ្សាយទាក់ទិននឹងពិន្ទុវាយតម្លៃកម្លាំងម៉ាស៊ីនសម្រាប់ Samsung Galaxy S10+ ដែលត្រៀមនឹងបង្ហាញខ្លួនផ្លូវការនាថ្ងៃទី ២០ កុម្ភៈ ឆ្នាំ ២០១៩ ខាងមុខ។

តេស្តផ្ទាល់លើកម្មវិធី Geekbench 4 ម៉ូឌែលមានកំណែម៉ាស៊ីនលេខ SM-G975U ឬ Galaxy S10+ មានប្រើប្រាស់បន្ទះឈីបជំនាន់ចុងក្រោយ Qualcomm Snapdragon 855 អម RAM ទំហំ 6GB។ ល្បឿនដំណើរការ Single-Core បាន ៣ ៤១៣ ពិន្ទុ ខណៈល្បឿន Multi-Core បាន ១០ ២៥៦ ពិន្ទុ ប៉ុន្តែនឹងទទួលបានខ្ពស់ជាងនេះលើម៉ាស៊ីនប្រើប្រាស់ RAM 8GB បើផ្អែកតាមចចាមអារ៉ាមធ្លាប់ចុះផ្សាយកន្លងមក។

រំឭកថាធុនធ្ងន់ម៉ូឌែលនេះរំពឹងនឹងបំពាក់អេក្រង់ ៦,៤ អ៊ីញ ប្រភេទ Super Amoled រចនាបថអេក្រង់ឆកចំហៀង មានកាមេរ៉ាភ្លោះខាងមុខ និងខាងក្រោយបីគ្រាប់។ ជាងនេះទៅទៀត Samsung ក៏ត្រូវបានគេព្យាករណ៍អាចនឹងចេញលក់ជំនាន់ពិសេសអាចគាំទ្រប្រព័ន្ធ 5G ជាមួយម៉ាស៊ីនធំប្រើ RAM ដល់ 12GB៕