ពូកែដើរព្រៃ រហូតក្លាយជាយុវតីឆ្នើមតំណាងអ្នកអភិរក្សសម្បត្ដិធម្មជាតិនៅកម្ពុជា

2019-01-24 11:18:32
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីកម្ពុជាមួយរូប កញ្ញា អាំង សិរីរតន៍ ត្រូវបានជ្រើសរើសជាបុគ្គលឆ្នើមក្នុងការរួមចំណែកអភិរក្សទន្លេមេគង្គ ដោយគម្រោងអច្ឆរិយភាពទន្លេមេគង្គ។ ភាពអង់អាចរបស់នាងកើតចេញពីចំណង់ចំណូលចិត្តការដើរព្រៃ ការជិះទូក ការជួបសហគមន៍ ការជួបរៀនពីអ្នកសិក្សាស្រាវជ្រាវ និងជួបជាមួយសកម្មជនបរិស្ថាន ជាសហស្ថាបនិកក្រុមមួយឈ្មោះថា "ដើរព្រៃ" រហូតក្លាយខ្លួនជាអ្នកអភិរក្ស។

កញ្ញា អាំង សិរីរតន៍

ចង់ដឹងថា តើអ្វីខ្លះដែលជម្រុញទឹកចិត្តរបស់យុវតីរូបនេះ រហូតដល់មានស្នាដៃ និងជាបុគ្គលឆ្នើមម្នាក់ សូមតាមដានលម្អិតដកស្រង់ពី [Mekong Fish Network](https://www.mekongfishnetwork.org/mekong-conservation-heroes/aing-sereyrath/?fbclid=IwAR39SD16A2kOESNBQ4YcL3rvlsPC57I7FPy_B3O1wjp2sEIUwuvE2FUQ2CE) ខាងក្រោមនេះ៖

អ្វីដែលខ្ញុំចងចាំជាងគេ ហើយធ្វើឲ្យខ្ញុំសម្រេចចិត្ដ ដាក់តាំងខ្លួនប្រាណ មកធ្វើការងារអភិរក្សនោះ គឺដំណើរទស្សនកិច្ចសិក្សាពីព្រៃឈើ និងជីវចំរុះនៅខេត្ដមណ្ឌលគីរី ដែលដឹកនាំដោយក្រុមប្រឹក្សាយុវជនរបស់ឯកអគ្គរាជទូតសហរដ្ឋអាមេរិក។ ការសិក្សាស្វែងយល់ពីបញ្ហា និងការប្រឈមដែលសហគមន៍កំពុងតែជួបប្រទះ ព្រមទាំងជួបមន្រ្ដីជំនាញពីអង្គការដែលពាក់ព័ន្ធលើការងារអភិរក្ស នៅក្នុងដំណើរទស្សនកិច្ចសិក្សានោះ បានធ្វើឲ្យខ្ញុំកាន់តែច្បាស់ក្នុងចិត្ដថា ខ្ញុំត្រូវតែការពារ អភិរក្សសម្បត្ដិធម្មជាតិរបស់ខ្មែរយើង។

ពេលបច្ចុប្បន្នខ្ញុំជាអ្នកសម្របសម្រួលគម្រោងរបស់អេកូយុវទូត ដែលផ្ដោតលើការអប់រំផ្សព្វផ្សាយអំពីបរិស្ថាន និងជីវចំរុះទៅដល់យុវជន។ ប្រធានបទដែលខ្ញុំកំពុងតែធ្វើការផ្សព្វផ្សាយនោះគឺ អច្ឆរិយភាពនៃទន្លេមេគង្គ។ នៅក្នុងគម្រោងនេះ ខ្ញុំទទួលខុសត្រូវលើកការងាររៀបចំវគ្គបណ្ដុះបណ្ដាល និងដំណើរទស្សនកិច្ចសិក្សាតាមដងទន្លេមេគង្គ ព្រមទាំងការផ្សព្វផ្សាយនៅតាមកម្មវិធីសាធារណៈដែលមានអ្នកទស្សនារាប់ពាន់អ្នកផងដែរ។ បទពិសោធន៍ការងារទាំងនេះបានធ្វើឲ្យខ្ញុំយល់កាន់តែច្រើនពីទន្លេ ព្រមទាំងទំនាក់ទំនងរវាងទន្លេនឹងជីវភាពរស់នៅរបស់ប្រជាពលរដ្ឋ ហើយនេះក៏បានជួយផ្ដល់នូវចំណេះដឹងដ៏ទូលំទូលាយដែលអាចឲ្យខ្ញុំចែករំលែកទៅកាន់យុវជនខ្មែរ។

ខ្ញុំស្រលាញ់ការងារ ដែលអប់រំផ្សព្វផ្សាយយុវជនពីគុណតម្លៃរបស់ធនធានធម្មជាតិនៅក្នុងប្រទេសកម្ពុជាខ្លាំងណាស់។ ជាពិសេសការងាររៀបចំដំណើរទស្សនកិច្ចសិក្សាសម្រាប់យុវជន ដើម្បីបានស្វែងយល់ ព្រមទាំងទទួលបានបទពិសោធន៍ពីធម្មជាតិ និងសហគមន៍។ ការងារទាំងនេះជា សេចក្ដីសង្ឃឹមរបស់ខ្ញុំចំពោះធម្មជាតិ ពីព្រោះខ្ញុំជឿថាបើមានយុវជនកាន់ច្រើនស្រលាញ់ និងយល់ពីទំនាក់ទំនងរវាងយើងនឹងធម្មជាតិ នោះពួកគេនឹងខ្វល់ខ្វាយ ហើយចាប់ផ្ដើមផ្លាស់ប្ដូរ ព្រមទាំងរិះរកនូវដំណោះស្រាយផ្សេងៗដើម្បីបរិស្ថាន តាមរយៈភាពច្នៃប្រឌិតរបស់ពួកគេ។

ខ្ញុំចង់ឲ្យប្រជាជនខ្មែរដឹងពីសារប្រយោជន៍នៃទន្លេមេគង្គ ជីវចំរុះ ព្រៃឈើ និងស្ថានប្រព័ន្ធសំខាន់ៗផ្សេងៗទៀតរបស់ប្រទេសកម្ពុជាយើង។ ខ្ញុំក៏ចង់ឲ្យប្រជាជនខ្មែរជាច្រើនអ្នកទៀតបានដឹងពីកត្ដាគំរាមគំហែងដែលធម្មជាតិ និងមនុស្សដែលពឹងអាស្រ័យលើធនធានធម្មជាតិកំពុងជួបប្រទះផងដែរ ហើយភ្ញាក់ឡើងចូលរួមដោះស្រាយទាំងអស់គ្នា។ ខ្ញុំនឹងរៀបចំកម្មវិធីផ្សព្វផ្សាយបន្ថែមទៀត ដើម្បីឲ្យមានមនុស្សកាន់ច្រើនចូលរួមក្នុងកិច្ចការពារសម្បត្ដិធម្មជាតិរបស់យើង។