Samsung ចេញទូរសព្ទធូរថ្លៃថ្មី មានចំណុចខ្លាំងមួយដែល S10 សុំខ្មាស

2019-03-26 04:23:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Samsung បានបន្តចេញផ្សាយនូវត្រកូល A មួយម៉ូឌែលទៀត គឺ Galaxy A70 ដែលមានការវិវត្តអេក្រង់កាន់តែធំដល់ ៦,៧ អ៊ីញ ប្រភេទ Super AMOLED និងមាត្រដ្ឋាន ២០:៩។ រចនាបថអេក្រង់ Infinity-U បន្សល់ស្នាមឆកកាមេរ៉ាមុខទំហំ 32MP។

ផ្នែកខាងក្រោយបំពាក់កាមេរ៉ា ៣ គ្រាប់ដោយមួយទំហំ 32MP មាន Aperture f/1.7 ខណៈគ្រាប់ទីពីរទំហំ 8MP ប្រភេទ Ultra-Wide Angle (១២៣ ដឺក្រេ) និងគ្រាប់ទីបីប្រភេទ Depth Sensor ទំហំ 5MP ។ មានមុខងារប្រព័ន្ធសុវត្ថិភាពពីរ រួមមានជម្រើសស្កេនខ្ចៅដៃលើអេក្រង់ ឬស្កេនមុខដោះសោ។

A70 មានថាមពលថ្មធំដល់ ៤ ៥០០mAh គាំទ្រមុខងារ សាកថ្មរហ័សកម្លាំង ២៥ វ៉ាត់ ដែលធំជាងត្រកូល Galaxy ដទៃៗទៀត ពោលដូចជា Galaxy S10 5G ត្រឹម ១៨ វ៉ាត់តែប៉ុណ្ណោះ។ ប៉ុន្តែធុននេះពុំគាំទ្រប្រព័ន្ធសាកថ្មឥតខ្សែ Wireless Charging ឡើយ។

ស្ថិតក្នុងជម្រើស RAM 6GB ឬ 8GB អមអង្គផ្ទុកក្នុងម៉ាស៊ីនទំហំ 12GB អាចបន្ថែម microSD Card ដល់ទំហំ 512GB នៅអមនឹងប្រអប់ស៊ីមកាតចំនួនពីរ។ ស្តាប់ទៅអេក្រង់ ៦,៧ អ៊ីញអាចជាធំពេក ប៉ុន្តែ Samsung បានរចនាតួខ្លួនជារាងទ្រវែងដែលមានបណ្តោយ ៧៦,៧ ម.ម ពោលគឺកាន់ពេញដៃសមល្មម ឬអាចប្រើប្រាស់មុខងារដៃម្ខាង One Handed Navigation ក៏បាន។

ផ្តល់ជូនអតិថិជននូវជម្រើស ៤ ពណ៌មាន Coral, Blue, Black និង White ប៉ុន្តែចំពោះតម្លៃនិងការចេញលក់លម្អិត ខាងក្រុមហ៊ុនសុំលាក់សិន ដោយអាចនឹងបញ្ជាក់បន្ថែមនាថ្ងៃទី ១០ មេសាខាងមុខ៕