ក្រុមហ៊ុនអាល្លឺម៉ង់ ឲ្យរថយន្តបើកខ្លួនឯងតាមអំពើចិត្ត តៃកុងអង្គុយមើលលេង

2019-06-25 08:57:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនរថយន្ត Volkswagen បានចាប់ផ្ដើមប្រតិបត្តិការសាកល្បងប្រព័ន្ធបើកបរស្វ័យប្រវត្តិនៅក្នុងទីក្រុង Hamburg ប្រទេសអាល្លឺម៉ង់ កាលពីពេលកន្លងទៅ។

យ៉ាងតិចមានរថយន្តចំនួន ២ គ្រឿងដែលយកទៅសាកល្បងរួមទាំងមានអ្នកបើកបរខាងក្នុងដែរ ប៉ុន្តែគ្រាន់តែអង្គុយលេងប៉ុណ្ណោះមិនប៉ះចង្កូត ឬបញ្ជាអ្វីនោះទេ។ យ៉ាងណាមិញ បច្ចេកវិទ្យានោះធ្វើការបានល្អគួរសម ដោយមានកម្រិតភាពត្រឹមត្រូវច្រើន ទៅតាមគន្លងផ្លូវត្រង់និងបត់ជាដើម។

បច្ចេកវិទ្យាដែល Volkswagen តេស្តនោះគឺជាលើកដំបូងបំផុត ដែលឡើងដល់កម្រិត ៤ ឯណោះ(Level 4 Self-driving Testing) ដែលជាលក្ខខណ្ឌ ឬកម្រិតដែលបើកក្នុងស្ថានភាពជាក់ស្ដែងតែម្ដង។

ចំពោះដំណើរការនៃការតេស្តទៀតសោត ក្រុមហ៊ុនបានបំពាក់កាមេរ៉ាជុំវិញរថយន្តទាំងខាងក្នុង ទាំងលើ-ក្រោម ដោយឲ្យរថយន្តបើកសាក ៣ គីឡូក្រាមក្នុងតំបន់មានចរាចរណ៍មមាញឹកខ្លាំង។ ចំណែកលទ្ធផលនឹងបញ្ចូលទៅស្វ័យប្រវត្តិទៅក្នុងប្រព័ន្ធរបស់គម្រោង Automated driving research project របស់ក្រុមអ្នកជំនាញប្រចាំនៅ Volkswagen ។ ដោយកាលពីលើកមុនក្រុមហ៊ុន Volkswagenធ្លាប់បានតេស្តនៅអាកាសយានដ្ឋានទីក្រុង Hamburg ដោយឲ្យវាចូលចតដោយខ្លួនឯង។

សម្រាប់គម្រោងបន្ទាប់នឹងតេស្តដល់កម្រិត ៥ ទៀតដើម្បីឲ្យប្រាកដ មុននឹងដាក់ឲ្យដំណើរការជាសាធារណៈ។ កន្លងមកការតេស្តនេះ ធ្លាប់មានក្រុមហ៊ុនជាច្រើនបានសាករួចហើយដែរតាមកម្រិតផ្សេងៗ នៅទីក្រុងធំៗក្នុងសហរដ្ឋអាមេរិក ក៏ដូចជាប្រទេសកាណាដានិងជប៉ុនធ្លាប់បានធ្វើរួចដែរ ប៉ុន្តែសុទ្ធតែស្ថិតក្នុងដំណាក់កាលមិនទាន់សម្រេចនៅឡើយ៕