កូនអ្នកនេសាទម្នាក់ Live លក់គ្រឿងសមុទ្រលើ Facebook រកបានជិត ១ លានដុល្លារ/មួយខែ

2019-07-03 02:33:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Anurak Saruethai ជាកូនអ្នកនេសាទម្នាក់ តែងតែធ្វើការ Live លក់បង្គាគ្រាម, មឹកគ្រាម និងត្រីគ្រាមលើបណ្ដាញសង្គម Facebook។ ពេល Live ម្ដងៗអាចទាក់ទាញចំនួនទស្សនារហូតដល់ ៣០ ម៉ឺននាក់ តាមរយៈការប្រើប្រាស់ពាក្យពេចន៍កំប្លែងៗ និងមានទំនាក់ទំនងល្អជាមួយអតិថិជន។

នៅពីក្រោយខ្នងរបស់ Anurak មានមនុស្សមួយក្រុមចាំជួយឆ្លើយតបការកុម្ម៉ង់ទិញ, ឆ្លើយសំនួរលើកម្មវិធី Facebook, ត្រួតពិនិត្យការបង់លុយតាមគណនីធនាគារ និងប្រាប់ពីឃ្លាកំប្លែងសម្រាប់ប្រើពេល Live ផងដែរ។ វិធីសាស្ត្រនេះដំណើរការរលូនខ្លាំង ដោយ Anurak និយាយថាអាចលក់បានចំណូល ២៦ លានបាត (ស្មើប្រមាណ ៨២៩ ០០០ ដុល្លារ) ក្នុងខែមីនា។

ជោគជ័យរបស់ Anurak ជាការសម្គាល់មួយអំពីជំនួយលើបណ្ដាញសង្គមដែលកំពុងផ្ទុះខ្លាំងនៅថៃ ដោយអ្នកលក់អាចលក់ទំនិញទៅឲ្យអតិថិជនដោយផ្ទាល់តាម Facebook, Instagram និងកម្មវិធីផ្ញើសារដូចជា Line ជាដើម។

តាមរយៈការជំរុញនៃកម្មវិធីធនាគារលើទូរសព្ទ (Mobile Banking) ការលក់លើបណ្ដាញសង្គមនៅថៃ បានកើនឡើងទ្វេដងនៅឆ្នាំ ២០១៧ ដល់តួលេខ ១០,៩ ពាន់លានដុល្លារ។ នេះបើផ្អែកតាមរបាយការណ៍ចុងក្រោយនៃភ្នាក់ងារអភិវឌ្ឍន៍ប្រតិបត្តិការអេឡិចត្រូនិក។ លើសពីនេះចំនួនលក់នេះស្មើនឹង ៤៤% នៃការលក់ទំនិញអនឡាញនៅថៃ។ ចាប់តាំងពីនោះធនាគារបានទម្លាក់កម្រៃសេវាផ្ទេរប្រាក់ ធ្វើឲ្យទីផ្សារនេះកើនឡើងរឹតតែខ្លាំង។

នៅអាស៊ី មានតែឥណ្ឌូណេស៊ីប៉ុណ្ណោះដែលកំពុងប្រកួតប្រជែងនឹងថៃ លើការលក់ទំនិញលើបណ្ដាញសង្គម។ នៅឥណ្ឌូណេស៊ីការលក់លើបណ្ដាញសង្គមស្មើនឹង ៤០% នៃការលក់ទំនិញអនឡាញ ដែលស្មើប្រមាណ ៣ ពាន់លានដុល្លារ។ ក្នុងប្រទេសអាស៊ីផ្សេងទៀតការទិញទំនិញលើអនឡាញដូចជាលើ Alibaba, Amazon និង Walmart នៅតែទទួលបានការពេញនិយមដដែល ហើយការលក់លើបណ្ដាញសង្គមកំពុងរីកនៅប្រទេសមួយចំនួន៕

ចុចអាន៖

ប្រភព៖ Chiangraitimes ប្រែសម្រួល៖ សុខហេង