ដេញជើងឥតឈប់! Xiaomi ដើរគន្លងចាស់ចម្លង Apple ម្តងទៀតហើយ

2019-07-04 01:36:48
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនថាតែរចនាបថនៃស្មាតហ្វូននិងកុំព្យូទ័រយួរដៃជាច្រើនម៉ូឌែល ក្រុមហ៊ុន Xiaomi បានធ្វើការចម្លងឥតឈប់ឈរចេញពីរូបរាងនៃផលិតផលរបស់ក្រុមហ៊ុន Apple រហូតជាប់រហ័សនាមជា 'Apple ចិន' ទៀតផង។

អ្វីៗក៏មិនទាន់បញ្ចប់ ដោយ Xiaomi នៅតែបន្តចម្លងមុខងារថ្មីមួយទៀតប្រើប្រាស់ឈ្មោះ 'Mimoji' ដែលមានគំរូដើមចេញពី Memoji របស់ Apple ចេញផ្សាយក្នុង iOS 12 កាលពីចុងឆ្នាំ ២០១៨។ មានលក្ខណៈស្រដៀងគ្នាបេះដាក់ ដោយ Mimoji របស់ក្រុមហ៊ុនចិនក៏អនុញ្ញាតឲ្យអ្នកប្រើប្រាស់អាចធ្វើការបង្កើតរូបភាព 3D Avatar បែបរស់រវើកតាមរយៈកាមេរ៉ាមុខដូចទម្រង់នៃការអភិវឌ្ឍរបស់ក្រុមហ៊ុនអាមេរិកអ៊ីចឹងដែរ។

ការចម្លងប្រភេទនេះ មិនថាតែ Xiaomi ឬក្រុមហ៊ុនផលិតស្មាតហ្វូន Android ដទៃ នឹងមិនទទួលការប្តឹងផ្តល់ទេ ព្រោះ Apple ពុំបានចុះប៉ាតង់បញ្ជីពាណិជ្ជកម្មនៃឈ្មោះ Memoji ឬទម្រង់នៃតួអង្គ Avatar ណាមួយនោះឡើយ។

Mimoji កំណត់បើកឲ្យប្រើប្រាស់ជាលើកដំបូងនៅលើស្មាតហ្វូនជំនាន់ក្រោយបង្អស់ Xiaomi CC9 ដែលមានរូបរាងស្រដៀងនឹងសេរ៊ី P របស់ Huawei។ ម៉ូឌែលនេះមានប្រើប្រាស់មុខងារស្កេនខ្ចៅដៃបង្កប់ក្រោមអេក្រង់ អមអេក្រង់រាងដំណក់ទឹក ទំហំ ៦,៤ អ៊ីញ កម្រិត Full HD+ ប្រភេទ AMOLED លាយឡំកាមេរ៉ា ៣ គ្រាប់ទំហំ 48MP + 8MP + 2MP។