ជនជាតិជប៉ុននិយមជួលឡាន ប៉ុន្តែមិនមែនយកទៅបើកជិះឡើយ

2019-07-08 07:19:31
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សភាគច្រើនចំណាយលុយលើសេវាកម្មជួលរថយន្តដោយសារតែមានគោលដៅនៅក្នុងចិត្ត ពួកគេត្រូវការមធ្យោបាយធ្វើដំណើរ ហើយរថយន្តជាមធ្យោបាយពេញនិយមមួយ។ ប៉ុន្តែនៅជប៉ុនខុសប្លែកពីនេះ។

សេវាកម្មជួលរថយន្តជិះរបស់ជប៉ុន Orix បានប្រទះឃើញកាលពីថ្មីៗនេះថា អតិថិជនរបស់ខ្លួនជួលរថយន្ត មិនមែនយកទៅបើកបរនោះឡើយ។ ក្រុមហ៊ុនបានធ្វើការត្រួតពិនិត្យលើចម្ងាយបើកបរ និងបានឃើញថារថយន្តមួយចំនួនបានយកត្រឡប់មកវិញ ដោយគ្មានកំណត់ត្រាចម្ងាយដែលបានបើកបរនោះទេ។ ក្រុមហ៊ុន Times24 ដែលផ្ដល់សេវាកម្មជួលនេះនិងមានអ្នកប្រើប្រាស់ ១,២ លាននាក់ ក៏រាយការណ៍ដូចនេះដែរ។

ដើម្បីដឹងថាមានរឿងអ្វីកើតឡើង ក្រុមហ៊ុនទាំងពីរបានបង្កើតការស្ទង់មតិមួយអំពីអតិថិជនរបស់ខ្លួន។ អ្វីដែលគេប្រទះឃើញ បានឲ្យគេដឹងច្បាស់អំពីបែបបទនៃការធ្វើការសម័យថ្មី និងអំពីភាពជាឯកជន។

ក្រុមបានរកឃើញថា រថយន្តដែលបានជួលត្រូវបានគេយកប្រើប្រាស់ជាកន្លែងធ្វើការសម្រាករយៈពេលខ្លី, ជាកន្លែងធ្វើការ, ជាកន្លែងផ្ទុកឥវ៉ាន់, សម្រាប់សាកទូរសព្ទ, ហូបអាហារ, និយាយទូរសព្ទ, មើលទូរទស្សន៍, រៀបចំខ្លួនសម្រាប់វិធីបុណ្យខ្មោច (Halloween) និង អនុវត្តន៍ការរ៉េបជាដើម។

រឿងរ៉ាវទាំងនេះអាចទៅរួច ព្រោះថាសេវាកម្មជួលរថយន្តនៅជប៉ុនមានភាពទូលំទូលាយណាស់។ អតិថិជនអាចកក់រថយន្តសម្រាប់ពេលប៉ុន្មានម៉ោង ឬពេញមួយថ្ងៃតាមរយៈស្មាតហ្វូន ដែលចំណាយមិនដល់ ៤ ដុល្លារ សម្រាប់ការប្រើ ៣០ នាទី។ គេអាចទៅយករថយន្តនៅកន្លែងចំណតដែលមាន ១២ ០០០ កន្លែងនៅទូទាំងប្រទេសជប៉ុន៕

ចុចអាន៖

ប្រភព៖ The Verge ប្រែសម្រួល៖ សុខហេង